أحمد عماد الدين .. أصغر قصة نجاح

النجاح فى الحياة وتحقيق حلمك عمره ما كان مرتبط بسن معين أو وظيفة معينة .. النجاح ممكن يتحقق فى أى وقت .

ده اللى حصل مع أحمد عماد الدين وهو شاب مصرى عنده 19 سنة فى كلية صيدلة .. اتولد فى السعودية وإتولدت معاه موهبة التصميم واللي قدر إنه يطورها من خلال التعليم الذاتى عن طريق مواقع الإنترنت .

أغلبنا سمع قبل كده عن فرقة غنائية إنجليزية اسمها بينك فلويد ( Pink Floyd's ) وهى من أشهر فرق الغناء فى أوروبا والعالم .. المهم إن فرقة البينك فلويد دى بقالها أكتر من 20 سنة بدون نشاط غنائى يعنى آخر مرة نزلوا فيها ألبوم كان من عشرين سنة ده غير إن أصغر واحد من أعضاء الفريق عنده 65 سنة وأكتر من نص أعضاء الفريق ماتوا من زمان

فرقة بينك فلويد بدأوا يتفككوا ونشاطهم قل جدًا ( من زمان الحقيقة ) أو يكاد يكون معدوم غير إن مصمم أغلفة الألبومات بتاعهم مات السنة اللى فاتت .. فقرروا إنهم يفاجئوا جمهورهم بألبوم جديد وكلفوا استوديو عشان يصمم الغلاف الجديد عن طريق مصمم مبدع على موقع Behance واللى كان وقتها صاحب قصتنا أحمد عماد الدين واخد تقييم كبير من الموقع نتيجة روعة تصميماته واللى وصل ل5 تقييمات فى أقل من شهر وهى نسبة كبيرة جدًا ونادرة كمان .

بعتوله طلب بتصميم غلاف الألبوم ووافق أحمد .. بعتلهم التصميم وأعجبوا بيه وفعلًا اشتروا التصميم ومن الطريف فى الموضوع أنه من معجبين الفريق ده غير إن آخر ألبوم نزلوه كان قبل أحمد ما يتولد

أحمد فعلاً موهوب جدًا وده يبان لأى مصمم متخصص وعنده حس فنى عالى .. أحمد اجتهد ونشر تصميماته على أشهر المواقع العالمية زى موقع behance و تقدروا تشوفوا تصميماته من هنا

https://www.behance.net/aee

و الصورة فى الموضوع هى تصميم أحمد لغلاف ألبوم بينك فلويد .

أحمد سعى وإجتهد وركز على موهبته وإتخصص فيها وعلم نفسه بنفسه .. يعنى أخد بالأسباب فكانت النتيجة منطقية وطبيعية جدًا

هو ده الدرس اللى عاوزين نستفيد منه .. اجتهد وإسعى وطلع طاقتك كلها واشتغل فى الحاجة اللى بتحبها ساعتها مش هتحس إنك بتشتغل .. لأ ده إنت هتحس أنك بتقضى وقت ظريف وبتستمتع