مش سهل أبدا إنك تبني اسم وسمعة لعلامتك التجارية، ديه حاجة ممكن تاخد سنين طويلة، بس خد بالك إن خمس دقايق بس كفيلة إنها تدمر كل إلي بنيته، وعشان كده زي ما مهم تعرف إزاي تبني علامة تجارية ناجحة، مهم برضه تعرف إيه الحاجات إلي ممكن تدمرها.

شعار شركتك.. وبطاقات العمل.. والخطابات اللي عليها اسم الشركة.. كلها حاجات تعتبر جزء من العلامة التجارية لشركتك، بس مش هي كل حاجة،لأن علامتك التجارية دي بشكل عام تجربة إنسانية شاملة مع شركاؤك والموظفين والعملاء بتوعك، فعلامتك التجارية أكبر من مجرد تصميم.

وعشان كده وإنت مرحلة بناء علامتك التجارية لازم تبقى عارف إن السمعة والإسم اللي إنت بتعمله للبراند بتاعك ممكن يتهدوا في أي لحظة، وعشان كده لازم تكون واعي بالأخطاء اللي ممكن تقع فيها وتؤذي البراند بتاعك واللي بشوية تفكير ومجهود منظم منك تقدر تتجنبها:

1. أخطائك كقائد: وديه ممكن متحسش بيها غير عالى المدى البعيد ومش هتأثر على اسم شركتك بس ولكن كمان على الموظفين بتوعك وعلى أرباحك كمان، ففي دراسة لــ "بيرسون مارستيلر " بتقول إن 48% من سمعة أي شركة ممكن إننا نرجعها لسمعة رئيسها كمان، عشان كده لازم انت كصاحب بيزنس يكون لك براند شخصي ميتعارضش مع اسم وسمعة العلامة التجارية لشركتك وأسوأ أخطاء ممكن تقع فيها كقائد وتؤذي شركتك هي:

• إنك تكون قائد بأهداف غير واقعية: وده هيؤدي إن معدل الدوران بين موظفيك هيكون عالي، ليه؟ لأن دايما بتبقى حاسس إنك مش عارف تلاقي الموظف اللي يحقق أهدافك فبتقعد تغير في الموظفين بس من غير أي نتيجة.

• إنك تكون قائد متسلط: تخلق بيئة عمل كلها ضغط عشان تحاول توصل لأعلى وأفضل أداء من غير مراعاة الناس حواليك، ومتحاولش تخلق وسيلة اتصال مع موظفيك تقدر تبرز بيها مواهب كل فرد عندك من غير ضغط أو عدم تقدير لمجهودهم، أنت ممكن تنجح دلوقتي بس قدام هتبقى شخص الناس ممكن ترفض التعامل معاه ومع شركته وبكده تبقى أذيت اسمك واسم شركتك معاك.

2. متبقاش عارف علامتك التجارية بتمثل إيه في الأساس: قبل أي حاجة لونت مش عارف إيه اللي بتعمله وبتعمله ليه والمفروض علامتك التجارية تمثل إيه لجمهورك المستهدف وإيه القيمة من وجودها أصلا، فعلامتك التجارية هنا ملهاش أي معنى، لأن هيكون من السهل هنا إن شركتك تقع في فخ إنها عايزة تقدم كل حاجة لكل الناس ومعندهاش شيء بتركز عليه، وده بالتأكيد هيعمل تشويش لعلامتك التجارية.

شركة زي HP بدأت سنة 1947 كشركة هندسية كانت بتبيع منتجات زي مولدات الكهرباء والصوت ولكن بعد كده حولت من نشاطها وبدأت بالتركيز بس على بيع أجهزة الكمبيوتر الشخصية والطابعات واكسسوراتهم، وقدرت تحقق نجاح كبير خلاها واحدة من أكبر شركات الكمبيوتر على مستوى العالم.

3. الوقت الطويل عشان تشرح انت بتعمل إيه: الناس مدى اهتمامها بأي حاجة قليل، فلو معرفتش تخلي تأثيرك عليهم فوري نت غالبا هتكون خسرت الشخص اللي بتحاول تجذب انتباهه، وعشان تقدر تقوي علامتك التجارية باستمرار لازم تكون محدد الحاجات اللي هتقولها واللي عارف إنها هتكون ليها صدى عند العملاء بتوعك.

4. التصميم السيء لاسم علامتك التجارية: بالعامي كده مسترخصش في النقطة دي بالذات،نت اه ممكن توفر فلوس في الأول لو تجيب حد هاوي يعملك أي تصميم وخلاص، لكن بعد كده هتضطر تجيب مصممين محترفين يحاولوا يصلحوا الكارثة اللي إلي اتعملت وكنت إنت سببها، لأن التصميم السيئ للوجو ممكن يعمل تأثير سلبي عالمنتج، فالعملاء يفسروا ده إن الشركة مهمتمش بشكل شعارها فأكيد مش هتهتم بالمنتج بتاعها.

5. موقعك الإلكتروني يكون متوسط أو أقل من المتوسط: أي حد البيزنس بتاعه مش موجود على الإنترنت في الوقت الحالي فهو مش موجود أصلا، نقطة ومن أول السطر. فوجودك بموقع لك الإنترنت ممكن يكون فرصة قوية تعرف بيها الناس بعلامتك التجارية، وعدم اهتمامك بالموقع بتاعك عامل زي ما تكون بتدعي ضيوف لبيتك اللي من غير أثاث، إن ميكونش عندك موقع الكتروني أو موجود لكن سيئ ده بيمنع الناس إنها تتعرف عليك بشكل أفضل، ود هيخلي جمهورك يرو لغيرك على طول.

6. عدم التواجد على مواقع التواصل الإجتماعي: إنت بكده بتفوت على نفسك فرصة إنك تكبر البيزنس بتاعك بتواجدك على موقع زي لينكد إن، أو إنك تعرف آراء وردود فعل الناس على منتجاتك من خلال موقع زي الفيس بوك، وإنك تبقى دايما على إطلاع بكل حاجة جديدة بتحصل بوجودك على موقع زي تويتر مثلا.

7. أخطاء لازم تتجنبها أثناء تواجدك على مواقع التواصل الاجتماعي: علامتك التجارية لازم تكون نشطة على مواقع التواصل الاجتماعي عشان بيها هتقدر توصل لجزء كبير من عملائك المحتملين، ومع ذلك في مجموعة أخطاء لازم تاخد بالك منها لأنها ممكن تسبب ضرر لسمعة علامتك التجارية واللي ممكن يكون منها:

• وجود أشخاص غير مؤهلين على إدارة صفحاتك على مواقع السوشيال ميديا.

• مشاركة موضوعات ملهاش علاقة بالبيزنس بتاعك (سياسية، دينية مثلا) لأنها ممكن تضر بسمعة شركتك وتوقف الناس عن متابعتك.

• المحتوى اللي بتقدمه على صفحاتك ميكنش أصلي وخاص بيك، ويبقى مجرد نسخة معدلة من محتوى حد تاني.

في النهاية اسم وسمعة العلامة التجارية لشركتك ده قلب أي بيزنس انت بتحاول تبنيه، وانت بتفكر في تقديم جودة عالية لمنتجاتك وخدماتك تجذب بيها الجمهور، لازم تفكر في كل حاجة ممكن تتعرض لها وتكون سبب في إن علامتك التجارية تفشل، لازم علامتك التجارية تكون عنوان للمصداقية وخيار يعتمد عليه للعملاء بتوعك، لازم تنافس نفسك قبل ما تفكر فمين اللي بينافسك أو بتنافسه.