جاتلي أسئلة كتيرة على مقال الاستثمار في الذهب وقلت أجمعها علشان الفائدة تبقى للكل

أولاً ليه سعر الذهب صعد من أول ما أصدرت التوصية يوم 27 إبريل لحد 27 يوليو 27% ؟

- الإجابة لأن الذهب صعد عالمياً 8% والدولار صعد في مصر 19% فالذهب داخل مصر صعد مجموع الإثنين

ثانياً ليه سعر الذهب صعد عالمياً ؟

- أسعار الذهب عالمياً بتصعد لسببين ... إما فيه عدم استقرار في الأسواق العالمية فالناس بتلجأ للاستثمار في الذهب نتيجة لعدم الإطمئنان أو الثقة أو السبب الثاني لأن أسعار الذهب نزلت لمستويات قليلة فأصبحت جاذبة للاستثمار فتبدأ تاخد دورة للأعلى مرة أخرى واللي حصل الفترة الحالية إن السببين موجودين .... فيه تباطؤ في الإقتصاد العالمي وفي نفس الوقت سعر أوقية الذهب وصلت لمستوي تحت 1200 دولار وده جاذب جداً والنهاردة في حدود 1320 دولار وبتستهدف 1850 دولار على المدى المتوسط اللي هو من 9-12 شهر.

ثالثاً إيه الأضمن الاستثمار في الذهب أم في الدولار ؟

- طبعاً الذهب لأنه عالمياً بيزيد وكمان الدولار ممكن ينزل جامد جداً لو مثلا روسيا رفعت الحظر على السياحة في مصر أو قرض صندوق النقد اتوافق عليه أو أي أسباب تانية فانا لازلت شايف إن شراء الدولار مخاطرة على مستوى الاستثمار ده غير إن فيه شبهة إنك بتستفيد على حساب اقتصاد بلدك .

رابعاً هل انت شايف إن الذهب لسه هيصعد ؟

أيوة شايف إنه هيزيد الفترة اللي جايه بشكل كويس (سنة) وده للي معاه فلوس زياده مش يستلف مثلا ويشتري

خامساً إزاي نستثمر في الذهب ؟

قلت قبل كده إن شراء جنيهات ذهب بيخليك متخسرش في المصنعية ودي موجودة عند أي جواهرجي ( ممكن تلاقيها شاحة شوية لأن فيه ناس كتير الأيام دي بتستثمر في الذهب)

نصيحة أخيرة فيه فرق إنك تستثمر الفائض من فلوسك اللي مش محتاجها وإنك تعمل بيزنس وربنا يكرمك وتكسب منه .... ما ينفعشي تقول أنا لو كنت اشتريت بفلوسي دهب أودولارات أو عقارات كان هيبقي أكسبلي فيه فرق كبير جداً ممكن نتكلم عليه في مقال تاني وربنا يوفقكم جميعاً