أشتغل ولا أتعلم

الخبرة أولأ ولا العلم ؟

كتير بيسألنى هو أنا أشتغل الأول وبعدين أدرس البيزنس ولا العكس ؟

وده سؤال مهم ويمكن اجابته تكون بديهية نتعلم وبعدين نشتغل  .

بس دى مش الإجابة الصحيحة لعدة أسباب : 

أولاً إن الحياة مش مثالية وبتدينا خيارات تحب تبدأ بإيه تتعلم الأول ولا تشتغل ؟ معظمنا بيلاقى نفسه جوا بيئة العمل اللى ممكن متكونشى من اختياره انما أجبرته عليها الظروف, الفرق الوحيد اللي بيخللى حد فينا بيوصل والتانى لأ إن فيه حد عنده إصرار على تغيير الواقع والتانى مستسلم للظروف .

ثانيا عملية الخبرة والتعلم دى عملية مستمرة يعنى ماحدش بيتعلم كل حاجة وبينزل يتعلم وماحدش لما بيتعلم أو بياخد مثلا ماجستير أو دكتوراة يبقى كدة مش هايغلط ويتعلم من غلطه ... الخلاصة إن العلم والخبرة دول خطين متوازيين زى قضيب القطر بيمشى عليهم هما الاتنين لو واحد وقف القطر يتوقف ويتوقف هنا معناه إن البيزنس بتاعك مش هايكبر عن حجم معين (ده فى الغالب الأعم إنما فيه استثناءات).

ثالثًاً لما بدأنا ندرس ماجستير في إدارة الأعمال كان فيه مقولة استوقفتنى اننا كدارسين بندرس الممارسات الناجحة لرجال الأعمال اللى أصبحت قواعد بعد كده وده معناه إن فيه ناس معندهاش أى علم جربت ونجحت وحطت القواعد ... طيب ما ده معناه اننا نشتغل احنا كمان وبلاش علم إدارة وزينا زيهم ... طبعًا ده ممكن يبقى صح بس ممكن أثناء التجربة والخطأ توصل لمرحلة متقدرشى بعدها تكمل بمعنى إن فيه ناس جربت وفشلت وعرفت الصح بعد الفشل ده طيب ماناخد الصح ونستفيد بيه ومش لازم نعمل زيهم ونجرب بنفسنا . 

الخلاصة إننا لازم نشتغل وفى نفس الوقت نتعلم ومنوقفشى واحدة من الاتنين وأى واحدة هتتوقف معناه فيه خلل والعلم ملوش طريق واحد ممكن تقرا ممكن تسمع ممكن تدرس وهكذا والله الموفق والمستعان.