أشهر 5 لغات للتسويق عشان توّصل منتجك للعالمية

أشهر 5 لغات للتسويق عشان توّصل منتجك للعالمية

 

لو المنتج بتاعك اتعدي السوق المحلي وبتفكر تسوقله عالميًا، أول حاجة لازم تفكر فيها هي اللغات اللي هتستخدمها في التسويق، وده مهم جدًا باعتبار اللغة هي الأساس في عملية التسويق عشان هي الوسيط اللي بنوصل بيه للعملاء، ولما بتستخدم أكتر من لغة في نقل المحتوي ده معناه إنك بتكسب شرائح جديده من العملاء.

 

طيب إزاي نحدد اللغات الي هنستخدمها في التسويق في ظل وجود أكتر من 6 آلاف لغة في العالم؟! 

في البداية وقبل ما تفكر تختار اللغة، لازم تسأل نفسك إيه هو هدف الشركة بتاعتك؟ والمفروض إن ده بيكون واضح بالنسبالك.

 

كمان لازم تحدد الجمهور اللي هتسوقله وتدرسه كويس، وبناءًا عليه هتقدر تختار اللغة المناسبة للتسويق سواء كان عبارة عن نقل محتوي أو ترجمة كتيبات المنتجات أو حتى ترجمة موقع الشركة.

لازم برضه تدرس منافسينك في السوق وتشوف اللغات اللي بيستخدموها والأخطاء اللي بيقعوا فيها وتحاول تتجنبها.

 

بعد كده هتختار اللغة، وطبعًا منقدرش نقولك اختار لغة بعينها لأن الموضوع ليه معايير زي ما قولنا، احنا هنقدملك حقائق ومعلومات عن كل لغة وبناءًا عليها انت تختار المناسب ليك:

 

1) اللغة الإنجليزية:

علي أرض الواقع هي اللغة الأولى عالميا؛ وده لأنها اللغة الأم في 94 دولة في العالم، كمان هي من أكتر اللغات المستخدمة علي الإنترنت؛ عشان حوالي مليار مستخدم للإنترنت بيستعملوها، وأكتر من 52% من المواقع على الإنترنت بتنقل المحتوي التسويقي بيها؛ ومعظم الشركات الكبيرة في العالم -اللي مش لغتها الأولي انجليزي - بترجم مواقعها الإلكترونية وصفحات السوشيال ميديا للغة الإنجليزية؛ عشان تستهدف شريحة كبيره من العملاء على مستوي العالم.

 

2) اللغة الصينية: 

وهي اللغة الأم لأكتر من 14% من سكان العالم، يعني بنتكلم في حوالي مليار شخص بيتكلم صيني، والأهم من كده إن الاقتصاد الصيني بينافس الأمريكي في السيطرة على السوق، وشبكة بلومبرج الألمانية توقعت إنه هيسطير علي العالم في 2026!

 

كمان اللغة الصينية هي تاني أكتر لغة منتشرة على الإنترنت بعد الإنجليزية، وحجم التجارة الإلكترونية اللي بتعتمد على اللغة ديه بيزيد بشكل كبير، لدرجة إن في 2016 حققت مبيعات وصلت 714 مليار دولار!

 

كل المؤشرات دي بتقول إن اللغة الصينية هتحل محل الإنجليزية، وهتبقي أكتر لغة مستخدمة على الإنترنت في وقت قريب؛ وعشان كده شركات كتير بتتجه لترجمة محتواها التسويقي للغة الصينية.

 

3) اللغة الإسبانية:

فيه 405 مليون بني آدم بيتكلموا أسباني في العالم، معظمهم في دول أمريكا اللاتينية، وحتى في أمريكا نفسها 37 مليون شخص لغتهم الأولي أسباني!، والعدد ده - وفقًا للإحصائيات- هيتضاعف في 2050! 

 

وفي إنجلترا نفسها المجلس الثقافي البريطاني بيأكد إن 34% من الشركات بيتعاملوا بالأسباني إلي جانب الإنجليزي طبعًا، ده غير إنها بتعتبر تالت أكتر اللغات انتشارا على الإنترنت وبالتالي لو كنت هتستهدف أحد الأسواق في أمريكا اللاتنية أو حتى في الولايات المتحدة وأوروبا فلازم تكون الإسبانية واحده من اللغات بتاعتك.

 

4) اللغة الألمانية:

رابع اللغات المنتشرة علي الإنترنت، وده لأن حوالي 305 مليون شخص في العالم بيتكلموا ألماني، والعدد ده ممكن يكون قليل بالنسبة للغات التانية، بس لو حسبناها من حيث حجم التأثير هنلاقي إن الانتشار المحدود ده موجود في دول ذات أهمية اقتصادية زي ألمانيا والنمسا وبلجيكا وسويسرا، غير إن ألمانيا نفسها هي أكبر اقتصاد في الاتحاد الأوروبي، وتاني أكبر مساهم في البحث العلمي علي مستوي العالم.

 

وهنلاقي برضه إن الألمانية بتصنف من أهم اللغات في مجالات العلوم الناعمة زي العلوم الإنسانية والصحية وعشان معظم الشركات الكبيرة بتهتم بترجمة محتواها للألماني.

 

5) اللغة البرتغالية:

حوالي 215 مليون شخص بيتكلم برتغالي و هي تاني أكتر لغة منطوقة في أمريكا الجنوبية بعد الإسباني، وفي آخر تحديث لإحصائيات عملتها شبكة "CSA Research" حول استخدام اللغات علي الإنترنت وصلت نسبة استخدامها 6 % على مستوى العالم، واحتلت المركز الخامس عالميا.

 

وبالنسبة للأعمال التجارية وده الأهم.. الاقتصاد البرازيلي بيعتبر الأكبر في أمريكا الجنوبية ده غير إن المجلس الثقافي البريطاني اعتبر البرتغالية من اللغات اللي ليها مستقبل كبير في بريطانيا بسبب تزايد العلوم اللي بتعتمد عليها، بالإضافة للأهمية الاقتصادية في الولايات المتحدة وبعض دول آسيا وأفريقيا لدرجة إن منظمة اليونسكو اعتبرتها اللغة الأسرع نموًا في العالم بعد الإنجليزية، فلو كنت هتنقل محتولك عالميًا لازم تحطها في الإعتبار.

 

في النهاية أيًا كانت اللغة المستخدمة لازم تكون اللغة سهلة ومفهومة بالنسبة للعملاء بتوعك عشان يعرفوا انت عايز توصلهم إيه وتنجح رسالتك في الوصول ليهم، وكمان دمج أكتر من لغة في استراتجية تسويق واحده ده اللي هيوصلك للاستهداف المثالي للجمهور بتاعك.