قصتنا النهاردة ليها علاقة بمواقع التواصل الإجتماعى وتحديداً موقع Linkedin الشهير .. وللى ميعرفش موقع Linkedin هو موقع مخصص فقط لتكوين علاقات خاصة بالبيزنس بالإضافة للبحث عن الوظائف فى جميع أنحاء العالم ده غير إمكانية عمل علاقات تجارية B2B بين الشركات وبعضها .

تعالوا نعرف البداية

مؤسس موقع Linkedin هو "ريد هوفمان" و هو رائد أعمال على الإنترنت ومؤلف ليه كتب كتير عن التحفيز.

نشأة "ريد هوفمان" وطفولته كانت بتشير من البداية لتوجهه ناحية عالم التكنولوجيا وتحديدًا بيئة ريادة الأعمال .. البداية كانت دراسة "هوفمان" لعلم إسمه epistemology وهو علم مختص بكيفية دراسة المعرفة "نظرية المعرفة " وايه المعانى من ورا المعرفة دى .. العلم ده كان البداية الحقيقة لعلوم الفلسفة وكان بيشتغل فى نفس الوقت مزارع لفترة ما أثناء دراسته فى الجامعة واستمر لفترة مش كبيرة بعد تخرجه .

اتخرج "ريد هوفمان" من جامعة ستانفورد المرموقة بدرجة البكالوريوس فى النظم الرمزية والعلوم المعرفية وحصل على درجة الماجستير فى الفلسفة من جامعة أكسفورد .

حلم "ريد هوفمان" كان هو إزاى هيأثر فى العالم بشكل كبير ولقى إن الدراسة فى الأوساط الأكاديمية هوالمكان المناسب ليه واللى هيقدر يوصل من خلاله لحلمه الكبير " إزاى هيأثر فى حياة العالم " .. لكنه فجأة غير البوصلة وقرر إنه هيبقى رائد أعمال وتحديداً على الإنترنت لكنه قبل ما يتوجه بالكامل لريادة الأعمال اشتغل فى شركة أبل سنة 1994 واشتغل كمان فى شركة eworld كأول تجربة ليه فى مجال الشبكات .

اشتغل بعد كده فى شركة Paypal بعد كم الخبرات الكبير اللى اكتسبه من عمله السابق فى Apple و eworld .. تطور "ريد هوفمان" وصعد بسرعة كبيرة جداً وطلع السلم لغاية وصوله لمنصب نائب رئيس الشركة فى الوقت اللى اتباعت فيه شركة Paypal لموقع eBay .

كل الخبرات المهنية اللى اكتسبها فى Paypal والعلاقات القوية اللى كونها ساعدته على إنشاء موقع Linkedin مع اتنين من أصدقائه وبدأ موقع Linkedin العمل سنة 2003 وبسرعة كبيرة أصبح من أكبر شبكات التواصل الإجتماعى ب332 مليون مستخدم من 200 دولة طبقاً لاحصائيات 2014 .

"ريد هوفمان" داهية فى البيزنس .. بعد نجاح Linkedin بفترة بسيطة بدأ يستثمر فى أكتر من 30 موقع تانى أشهرهم

Flickr, Wikia, Coupons, Xapo, OneKingsLane, Edmodo and Wrapp .

فكر"هوفمان" كمان فى تحقيق حلمه القديم بالتأثير فى العالم من خلال القاء محاضرات عن التحفيز وكتابة كتب عن نفس المعنى ده .. "هوفمان" عنده مدونة شخصية بيكتب فيها باستمرار .

"The Startup Of You" هو أشهر كتب "ريد هوفمان" االخاصة بريادة الأعمال واللى أثرت فى متابعيه بشكل كبير واللى خلى مجلة ال New York Times تعتبره واحد من أكثر الكتب مبيعاً .

"هوفمان" دايماً بيحفز متابعيه بإنهم يفكروا بشكل كبير وله مقولة مشهورة بيقول فيها " كل صاحب بيزنس على الإنترنت لازم يسأل نفسه كذا سؤال .. إزاى توصل لأول مليون مستخدم وبعدين إزاى توصل ل10 مليون مستخدم والأهم من كده .. إزاى تتواصل معاهم بفاعلية كبيرة ؟؟ "