كيفية بدء مشروع ناجح 4

المرحلة الرابعة من كيفية بدء مشروع ناجح هنتكلم عن دراسة الجدوي المالية
يعنى ايه دراسة الجدوى المالية وليه انا بعملها؟

أولا دراسة الجدوى المالية هي دراسة بيتم من خلالها قياس الارباح المتوقعة للمشروع من وجهة نظر اصحابه وتحديد مصادر رأسمال للمشروع وطبعاً الدراسة المالية مينفعش تتعمل غير بعد دراسة السوق والدراسة الفنية اللي شرحناهم في البوستات السابقة.

ثانياً اهمية دراسة الجدوى المالية إنها بتساعد صاحب المشروع أو المستثمرين في إتخاذ قرارهم بعمل المشروع أو لأ.. طب إزاي الكلام دة؟

من خلال الدراسة السوقية والدراسة الفنية للمشروع إستنتجنا حاجتين مهمين جداً هيفيدوني في دراستي المالية وهما إن في طلب في السوق على منتجي الخاص وإني هقدر اسوقه وابيعة والخطوة دي هتفيدني في تقدير حجم المبيعات المتوقعة ودة الشىء الاهم بالنسبة لأي شركة.

يبقى دراسة الجدوى هي عملية تقييم نجاح أو فشل المشروع ودة بيتم من خلال حساب كل التكاليف الخاصة للمشروع وإنتاجه مع مراعاة حجم رأس المال بإختلاف طبيعة المشروع.

بتنقسم التكاليف الخاصة للمشروع لنوعين:

1- النفقات الرأسمالية: وهي النفقات الاستثمارية ذات الاجل الطويل يعني أكتر من سنة زي الارض والمباني الانشائية والادوات والالات والماكينات وكل الاصول الثابتة

2- النفقات التشغيلية: وهي النفقات الاستثمارية ذات الاجل القصير اللي اقل من سنة زي حساب تكلفة المادة الخام المستخدمة في المشروع ورواتب العمال والموظفين والايجارات ووسائل النقل و نور وكهرباء وغاز ومياه ومصاريف تأسيس (تكلفة إعداد دراسة الجدوى واتعاب استشارية وقانونية وتكاليف التراخيص والحصول على حق براءة الاختراع لو وجدت الخ....

ومن خلال كل العناصر السابقة اقدر احسب إجمالي التكاليف لعمل التقدير المالي للمشروع مع مراعاة تحديد الجدول الزمني لإنشاء المشروع ومهم جداً اكون عارف الموارد المالية بتاعتي قد ايه بالظبط واسأل نفسي سؤال هل الفلوس دى كافية لإقامة المشروع دة ولّا لأ؟!!

وبعد ما بحسب كل التكاليف الخاصة بالمشروع ممكن اعمل تقدر أو توقع للإيرادات بتاعتي ومن خلالها هقدر أحسب الارباح اللي ممكن تطلعلي وبالتالي دراسة الجدوى بتفيدني في معرفة إذا كان المشروع دة ذو جدوى وهينتج عنه تدفقات نقدية ولّا لأ وبكدة نقدر نقول ان الدراسة المالية هي اللي بترشد العميل الي القرار المهم وهو أبدأ مشروعي ولّا استنى..