مع الانتشار الواسع للإنترنت في الوقت الحالي والهوس الجماعي بيه اللي عمال يزيد، ودخوله في كل مجالات الحياة بقوة وخاصة في عالم الأعمال وعمليات البيع والشراء اللي بتم أونلاين، بيتجه دلوقتي كتير من رواد الاعمال لفتح متاجر لبيع منتجاتهم أونلاين سواء من خلال منصات تجارية لبيع المنتجات أو من خلال إنشاء صفحات خاصة بيهم على مواقع التواصل الاجتماعي.

"واربي باركر" شركة أمريكية بدأت في 2010 تبيع نضارات طبية وشمسية أونلاين عن طريق موقع خاص بيهم، أصحاب فكرة إنشاء الموقع كانوا شايفين إن النضارات كانت غالية جدا بسبب إنها حكر على مجموعة من البراندات الغالية ومن هنا بدأوا بتصميم وتصنيع النضارات دي في البيت ، ومن خلال تفاعلهم مع العملاء بشكل مباشر من خلال الموقع، قدروا يوفروا مجموعة نظارات بجودة ومظهر أفضل وبسعر أقل بكتير من غيرهم.

وبعد النجاح اللي حققته "واربي باركر" في بيع النضارات أونلاين، بدأوا كمان أنهم يفتتحوا محلات تقليدية ليهم وفي 2017 وصل عدد الأماكن اللي بتعرض لنضاراتهم لحوالي 71 مكان في أمريكا وكندا ووصل قيمة الشركة السوقية ل1.2 مليار دولار أمريكي.

وانت كرائد أعمال بتفكر في بيزنس البيع أونلاين بس مش عارف تبدأ إزاي، إحنا هنحاول نساعدك بمجموعة خطوات ممكن تضمن لمشروعك إنه يكون ناجح:

1.شوف إيه اللي ناقص وحاول تكمله: معظم الناس اللي بتحاول تبدأ البيزنس بتاعهم بيوقعوا نفسهم في خطأ كبير، إنهم بيدوروا على المنتج اللي يبدأوا بيه وبعدين بيحددوا السوق المستهدف، والصح عشان تعزز فرصك في النجاح فإنت محتاج تحدد السوق بتاعك الأول من خلال أنك تدور على حاجة الناس عايزاها ومش لاقيين لها حلول كتير، والإنترنت هيساعدك أنك تلاقيهم إما:

•من خلال بحثك في المنتديات عن الأسئلة اللي الناس بتسألها والمشاكل اللي مش لاقيين لها حلول.

•أو إنك تزور مواقع منافسينك المحتملين وتعرف إزاي هما بيعرفوا يسدوا الطلب على أي منتج عندهم وبكده هتعرف تحدد المنتج اللي هتبدأ بيه في سوق موجود بالفعل وكمان هتحاول تخليه أفضل من منافسيك.

2.المنتج القوي: إنك تبدأ في مجال البيع اونلاين بشكل ناجح ده ممكن يكون سهل جدا لو لقيت منتج قوي، ومن الأفضل إنهم يكونوا مجموعة منتجات قوية.

وإنت مش محتاج أنك تخترع منتج جديد عشان تبدأ بيزنس ناجح فمتروحش لمنتجات هيكون من الصعب عليك إنك تلاقيها أو إن تكلفة تصنيعها متخليش في أي هامش ربح ليك، فكتير من متاجر البيع الأون لاين الناجحة بدأت مثلا ببيع المنتجات المقلدة والهاي كوبي وحققتلهم نجاح كبير جدا، انت بس كل اللي عليك أنك تدور على تجار الجملة واللي عندهم هتلاقي مجموعة كبيرة من المنتجات بأسعار معقولة جدا، هتقدر تحدد منها المنتج اللي هيناسبك، والقابل للتسويق، ويوفرلك هامش ربح كويس.

3.اعرف اللي ليك واللي عليك: عشان تبدأ تبيع أون لاين بنجاح لازم تكون حاطط في بالك وعارف كويس جدا مجموعة اعتبارات مهمة منها:

•إنت هتحتفظ بالبضاعة بتاعتك فين؟ وده هيعتمد على حجم المخزون اللي هتخليه عندك، فلو حجم البضاعة بتاعتك قليلة ممكن تحتفظ بيها فيها بيتك ولو أكتر هتضطر تأجر مخزن مثلا تحطها فيه.

•طرق الشحن اللي هتستخدمها، لو هتتعامل مع شركة شحن فلازم تعرف إن في منتجات بيبقى في قيود في عملية شحنها زي الفواكه الفريش أو الخضار، العطور أو الكولونيا، طلاء الأظافر، المواد سريعة التلف، السجائر والخ، ففي شركات ممكن ترفض عملية شحنها بالأساس وفي شركات ممكن تضطر تدفع مبالغ إضافية، وعشان كده لازم تقرأ بدقة التعليمات الخاصة بكل شركة هتتعامل معاها.

•طرق الدفع فلو كنت هتقبل بطرق الدفع أونلاين لازم تعرف إيه الرسوم اللي ممكن تتفرض عليك والميزات اللي بتوفرها وتقدر تكشف بيها عمليات الاحتيال اللي ممكن تتعرضلها، ولو هيكون الدفع نقدي وقت استلام المنتج مع الشحن فهل تكاليف الشحن هتتحملها انت ولا العميل بتاعك.

•لازم تراعي حقوق الملكية الفكرية والعلامات التجارية وبراءات الاختراع في منتجات معينة واللي ممكن تتطلب منك شروط للحصول عليها، فمتخاطرش بالمجهود اللي بذلته وتضيعه عن طريق الخطأ.

4.تصميم وبناء موقعك الالكتروني: دلوقتي أنت جاهز لتصميم موقع الويب الخاص بشركتك، وبما ان الموقع هو الواجهة لك فلازم تخليه بسيط وجذاب، فأنت قدامك أقل من خمس ثوان لجذب انتباه عملائك، بس خد بالك إن الطريقة دي ممكن تكون مكلفة لأنها باستمرار هتحتاج للتطوير.

وفي حالة لو أنت هتبيع منتجاتك على أحد المنصات التجارية زي جوميا وسوق دوت كوم مثلا فده بيكون الحل الأمثل لأنك مش هتشغل بالك بأي أمور فنية زى تطوير و استضافة و تصميم موقعك, ده غير المنصات دي بتصمم خصيصا للمستخدم العادي وعشان كده التعامل معها بيكون سهل جدا.

5.التسويق: عشان توجه الأشخاص وتجذبهم لموقعك الجديد فالخطوة دي هتعتمد على الاستراتيجية التسويقية اللي انت هتستخدمها واللي ممكن تكون واحدة من الحاجات الجاية:

•جودة منتجك أولا وأخيرا هو العامل الأساسي في البزنس بتاعك عشان كده لازم تختاره بعناية فالجودة بتخلق الثقة والسمعة.

•العروض والتخفيضات على المنتجات اللي بتقدمها من الوسائل المهمة في جذب الزبائن لموقعك.

•التسويق بالإيميل عن طريق ارسال ايميلات بشكل منتظم بها أحدث المنتجات والخدمات والعروض اللي بتقدمها على موقعك.

•تهيئة موقعك لمحركات البحث فأكتر من 88% من مستخدمي الإنترنت يبحثون عن المواقع والمنتجات والخدمات عن طريق محركات البحث وأهمها Google وأكثر من 90% من الكليكات تكون لأعلي 5 نتائج من الصفحة الأولي.

•التسويق على مواقع التواصل الاجتماعي مهم جدا لأنها من أقوى الوسائل للوصول لشريحة كبيرة جدا من الزبائن، ده غير إنها بتوفر سبل للتواصل السريع بينك وبين زبائنك.

•التسويق بالعمولة Affiliate يعني أنك تتيح لزوار متجرك التسجيل على نظام الأفليت عشان يروجوا لمنتجاتك من خلال رابط خاص في مقابل ارسال عمولات على البيع.

•استخدام أدوات تتبع الزيارات على موقعك عشان تتعرف على نقاط القوة والضعف في موقعك وتقوم بتحسينه بشكل دائم، ومن أشهر وأهم الأدوات هي Google Analytics.

بيع المنتجات عن طريق الانترنت هي الطريقة الأرخص والأسهل عشان تبدأ عملك الخاص أو لزيادة مبيعاتك لو كنت بالفعل بدأته، فتكلفة فتح موقع بيع إلكتروني والتسويق له هتكون أقل مقارنة بفتح محل عادي.

أهم شيء لازم تاخد بالك منه هو مراقبة ردود الأفعال والتغيير والتطوير بناء عليها، ومن خلال تحليل اللي بيناسبك واللي مش هيناسبك، هتقدر تنشط تجارتك وتميز نفسك عن منافسينك وتوصل للنجاح.