الغالبية العظمى من الموظفين شغلهم بيأثر على حياتهم الشخصية أو بمعنى تاني مابيعرفوش يفصلوا بين شغلهم وحياتهم الشخصية وده بيأدي إن الإنسان بيكره شغله وحياته وطول الوقت بيكون مكتئب ومش عايز يشتغل علشان مش قادر أو مش عارف " يفصل " بين الاتنين، لما بنيجي ننصح الناس إنها تحاول تفصل يردوا ويقولوا " مابنعرفش " ماتعودناش على كده على الرغم إنهم ماحاولوش، إحنا في البوست ده قررنا إننا نساعد أي شخص مابيعرفش يفصل بين حياته الشخصية والعملية ببعض النصائح والخطوات إللي هتساعده إنه يقدر يفصل إلى حدً ما.

1-افصل.

لازم يكون عندك وقت ليك وبس، في أوقات ضروري إنك تقفل موبايلك وتستمتع بكل لحظة وماتسمحش لحاجة لتكدرك أو تخرجك من المود ده.

2- إنزل جيم.

من افضل الحاجات لتقليل الضغط هو إنك تتمرن خلي عندك حاجات أساسية كده لازم تعملها على الأقل إسبوعياً من ضمنهم إنك تتمرن لأن التمرين بيساعدك في ان تكون حالتك النفسية كويسة وبيحسن مزاجك.

3- حدد أولوياتك.

ضروري جداً إنك تحدد إيه هي الأولويات سواء كانت على المستوى الشخصي أو العملي، شوف إيه الأولويات من حيث تنفيذ المهام الخاصة بالشغل وإعملها الأول، كمان حدد أولويات الأشخاص، مش أي حد تفضيله نفسك ويأخد من وقتك، إختار الناس القريبة منك إللي فعلاً لما تقضي وقتك معاهم تفصل من اي حاجة.

4-نظم وقتك.

قسم وقتك ما بين الشغل والحياة الشخصية، لازم تكون عارف ومحدد إن الوقت ده بتاع الشغل وتعمل حسابك إنك متأجلش أي شغل لتاني يوم أو لما تروح علشان لما تروح يكون بالك رايق و تستغل الوقت الباقي في حاجات تخصك وعايز تعملها.

5- أوقات للتأمل.

حدد وقت معين في اليوم للتأمل وأبعد عن مواقع السوشيال ميديا، انسجم مع نفسك واسمع موسيقى انت بتحبها وفكر في حاجات بتحبها.

6- ماتشتغلش لو مالكش مزاج.

أوقات كتير بتيجي على الواحد إنه مابيكونش ليه مزاج يشتغل من كتر الروتين أو زهقان مثلاً، أجل البدء في شغلك شوية وخد بريك، بعد كده هتلاقي نفسك رجعت الشغل بكامل طاقتك.

7- ابتعد عن المنبهات.

المنبهات او الكافيين من اكتر الحاجات اللي بتخلي الانسان عصبي ومزاجه متقلب خاصة لو وقفها فجأة، حاول تتخلص منها بالتدريج وما تخليش حاجة تكون هي اللي مسيطرة عليك.

8- سافر.

حط في خططك إنك المفروض تسافر مرة شهرياً علشان تقدر تفصل، وتبدأ من جديد.