FB Instagram Twitter Youtube Linkedin إزاي تتعامل بإيجابية مع إقالتك من وظيفة؟! | أكاديمية اعمل بيزنس
 
الرجوع الى المدونة

إزاي تتعامل بإيجابية مع إقالتك من وظيفة؟!

إزاي تتعامل بإيجابية مع إقالتك من وظيفة؟!

زمان كان ممكن تشتغل في وظيفة حكومية وتضمن مرتبك أول كل شهر وانت متطمن وحاطط رجل علي رجل، بس دلوقتي - وفي ظل إن معظم الوظايف بقت في شركات خاصة - كلنا بقينا معرضين نسيب شغلنا في أي وقت ولأي ظروف، سواء كان بناءًا علي رغبتنا أو ممكن تتم إقالتنا.

بغض النظر عن الأسباب اللي ممكن تخلي الشركة تمشيك لازم تكون حاطط الاحتمال ده فبالك باعتباره أحد السيناريوهات اللي ممكن تحصلك في شغلك.

فيه دراسة عملتها شبكة " CEO Genome" علي أكتر من 2600 مدير شركة على مدار 10 سنين، لقت إن نصهم تقريبا اتعرضوا لنوع من الفشل فشغلهم، و 18% اتفصلوا من شغلهم، وبرغم كده 78% منهم بقوا مدريين تنفذيين في شركات فيما بعد!

وده معناه إنهم مستسلموش للفشل، وبالتاليقدروا ينجحوا بعد كده، فلو اترفدت من شغلك لأسباب مهنية دي بعض النصايح اللي هتساعدك تتعامل مع الموقف ده بشكل إيجابي:

 

• خليك تقيل: 
استقبل قرار فصلك بهدوء، حاول تقعد مع مديرك وتسمع مبرراته واقبلها؛ لأن ده هيساعدك بعد كده تقّيم نفسك بشكل موضوعي، وكمان هيساعدك تبعد عن الأخطاء اللي كانت سبب في رفدك، حاول كمان متدخلش في جدل مع مديرك أو مدير ال HR؛ لأن ده ممكن يقضي على أي فرصة ليك في الاستمرار في الوظيفية أو الرجوع للشركة بعد كده، وحاول تاخد نسخه أوراق التقييم اللي بتكون في الاجتماع ده زي تقييم نهاية العام من المدير بتاعك مثلا.

 

• ازعل براحتك بس متخليش الزعل يسيطر عليك: 
طبيعي يعني إحنا بشر، وأي فشل بيحصلنا بيزعلنا، ماتكبتش مشاعرك، لكن إوعي تخلي الزعل ده يأثر عليك، وعندك "باري هونج" المدير التنفيذي لشركة Riskon بيوجه نصيحة للناس اللي اتعرضوا للإقالة من شغلهم بأنهم ياخدوا أسبوع راحة، ويحاولوا يتخلصوا من أي قلق أو زعل ناتج عن رفدهم، وبعد الأسبوع ده يبدأو يبصوا على ال CV بتاعهم ويحاولوا يظبطوه ويستعدوا للمرحلة الجديدة في شغلهم".

 

• اكتشف نفسك من جديد: 
روب ستيرنز في كتابه" Winning Smart After Losing Big"، بيقول إن فصلك من الوظيفية ممكن يكون في صالحك؛ لأنه بيخلصك من وظيفة مش مناسبة ليك، وبيديك فرصة تقيم نفسك من جديد وتعرف إيه الوظيفة اللي تناسب طموحك وإمكانياتك، فابدأ قيم نفسك وحدد الوظايف المناسبة لمهاراتك وطموحك عشان تبعد عن أسباب الفشل مرة تانية.

 

• استغل معارفك في الشغل:
فيه دراسة عملتها جامعة "هارفرد بيزنس" على مجموعة من الموظفين اللي اتعرضوا للإقالة من شغلهم، وكانت نسبة الموظفين اللي قدروا يلاقوا وظيفة تانية عن طريق معارفهم في الشغل تساوي(59%) يعني ضعف نسبة الموظفين اللي قدروا يشتغلوا عن طريق شبكات التوظيف أو المعارف الشخصية واللي كانت (29%)؛ وده لأن معارفك في الشغل أكتر ناس على صلة بمجالك، وبالتالي أكتر ناس ممكن تساعدك.

 

• ابعد عن وظيفتك القديمة: 
بلاش تدور على نفس الشغلانه القديمة عشان تبعد عن أسباب فشلك، وإذا كان لابد إنك تكمل في وظيفة مشابهة ممكن تختار تخصص تاني جوه الوظيفة نفسها، مثلا لو كنت شغال في مجال زي الإعلام وبتشتغل في الصحافة بالتحديد واتعرضت للفشل وتمت إقالتك، ممكن تشتغل في حاجة مشابهة للصحافة زي الإعداد الإذاعي والتليفزيوني.

 

• متنتقدش مديرك اللي فصلك: 
انتقاد الشركة أو المدير اللي كان سبب في إقالتك في الإنترفيو مش هيكون في صالحك؛ عشان ممكن يتاخد عنك انطباع إنك بتاع مشاكل أو بتبرر فشلك وبترميه على شماعة الآخرين، فحاول تتكلم بشكل موضوعي، ويستحسن تتكلم عن نفسك، كمان حاول تجهز شرح لسبب إقالتك ومتلفش وتدور في الإنترفيو، خليك واضح وصريح، ده هيزيد فرصك في القبول في الوظيفة الجديدة.

في النهاية لازم تعرف إن فصلك من وظيفة ده مش نهاية الكون بالعكس ممكن ده يخليك مرشح لوظيفة تانية أعلي والموضوع كله متوقف علي حسن تعاملك مع الموقف.