إزاي تتعامل مع مديرك البطيخه!

جربت تتعامل مع مدير بطيخه مش فاهم حاجة، وبيوجهك لقررات غلط، ولما تحاول تقنعه بأن قراراته غلط يفضل يلف ويدور عليك، وفي الآخر ينتهي النقاش بجملة "أنا مديرك واعمل اللي بقولك عليه! "...
وياريت الموضوع بيقف عند كونه بطيخه، ده ممكن يطلع بطيخه قرعة كمان، ولما الشغل يوصل لنتيجة مش مرضية يصدرك ويحملك المسؤلية لوحدك ويطلع نفسه قمر 14!

"بيرنارد مار" Bernard Marr الخبير في أداء الشركات بيقول:"لما الموظف بيتحط في موقف بيكون فيه مديره غلط، وعايز يوصله خطأه ده بيكون صعب جدًا على الموظف؛ عشان بيبقي مش عارف هل يواجه مديره بخطأه، ولا الأفضل يمسك لسانه؟ وده لأن مش كل المديرين لو واجهتهم بأخطائهم بيقّدروا ده وبيتراجعوا عن خطأهم، فيه نوع تاني بياخد الموضوع على صدره وبيصر علي خطأه ومش بيقتنع"!

طيب لو كان مديرك من النوع التاني ده – وربنا ما يوقعك فيه – إزاي تحاول إنك توصله خطأه، وفي حالة إنه مقتنعش، المفروض تتعامل مع الموقف إزاي؟!

• شوف الموقف يستحق ولا لأ: مواجهة مديرك بأخطائه دايمًا بتكون موقف حساس، فمش كل خطأ تعلق عليه أو تواجه مديرك بيه إلا لو كان يستحق وهيضر بالشغل؛ لأن ده ممكن يخليه ياخد موقف منك أصلًا، ويُصر على خطأه، وممكن الموضوع يتطور لتحدي ما بينكم ويحطك في دماغه.

• اختار الوقت المناسب: متجيش في الاجتماع قدام الناس كلها وتقوله انت غلط، حاول تختار الوقت والمكان المناسب لتصحيح وجهة نظر مديرك، وتراعي إنه يكون على انفراد عشان متسببلوش ضيق أو إحراج قدام الناس وكمان لو كان ليه منافسين هيستغلوا الموقف ضده فلازم تخلي بالك من كل الاعتبارات دي.

• استخدم الاقتراحات والحلول: لما تيجي توصله إنه غلطان حاول يكون بطريقة مختلفة، يعني متقولوش صراحةً إن طريقته غلط، ممكن تقوله أنا شايف إنه ممكن الموضوع ده يتعمل أفضل بالطريقة X، وبالتالي هيقبلها منك وهيقدرك.

• خلي معلوماتك موثقه: لما تحاول تقنع مديرك إن الحل بتاعك هو المناسب لازم يكون معاك داتا كفاية؛ عشان متحرجش نفسك معاه، وكمان خليك مُوجز ودقيق، ولازم تكون متأكد بنسبة كبيرة من كلامك ويكون مبني على أدلة مش افتراضات.

• ركز على السلوك مش الشخصية: ودي محتاجة سينسور كده، يعني حاول توصله إن ده خطأ وارد وممكن أي شخص يقع فيه، يعني المشكلة مش في شخصه هو، ودي بتعتمد على طريقة عرضك للموضوع واختيارك للكلام.

• خلي تعاملاتك مع مديرك موّثقة: يعني أي تعليمات تجيلك من مديرك حاول تستقبلها مباشرة عن طريق الميل أو من خلال الميل أو بطريقة formal وموّثقة؛ عشان بعد كده لو مديرك أصر على رأيه، ووصل الشغل لنتايج مش مرغوبة، يكون معاك أدلة كافية تقدر تقدمها عشان تتفادى المسؤولية.

• التصعيد: بعد كل ده لو مديرك متقبلش وأصر على رأيه بتلجأ للتصعيد، بس هنا اعرف إن الموضوع مبقاش فيه هزار، فلازم ترجع للخطوة الأولي تاني، وتعيد النظر للموقف وهل فعلًا يستحق وهيأثر على الشغل ولا لأ، بعد كده بتروح لمدير الــ HR -وممكن تطلب منه إن الموضوع يتم بسرية تامة لو عايز -وتحاول تشرحله مخاوفك وهو هيعالج الموضوع بأسلوبه.

• الاستقالة حسب تقديرك لخطورة الموقف: بعد كل ده لو شايف إن مفيش فايدة ووجودك في المكان ده ممكن يسببلك أضرار مادية أو يعرضك لمساءلة قانونيه خصوصًا لو كانت طبيعة شغلك حساسة، ومش معاك وسائل إثبات تقدر تأمن بيها نفسك (مش كل الأوامر اللي بناخدها من المدير بتكون عن طريق الإيميل) هنا بتلجأ لقرار الاستقالة.

ونصيحه أخيرًة بلاش تمشي بمبدأ "ريح الزبون" لأنه أولًا ده مش أخلاقي ومش من الشفافية والأمانة إنك تكون شايف حاجة غلط هتضر ناس وتسكت عنها ، بالإضافة لإنك هتكون جزء من المشكلة ومسؤول النتيجة.

حاجة كمان مهمة .. في بعض المواقف قبل ما تتهم مديرك إنه بطيخه لازم تتأكد الأول من معلوماتك؛ لأن ربما المدير تكون نظرته أبعد من نظرتك، وممكن انت تكون مقدر الموقف كله غلط وهو ليه وجهة نظر أبعد منك فحاول تتحري الدقة.

وفي النهاية نحب تشاركونا تجربتكو.. مين جرب يقول لمديره إنه غلط قبل كده وايهإكان رد فعله ؟

إزاي تتعامل مع مديرك البطيخه!

مقالات مشابهة

كيف تصطاد الموظف العصفورة

ما هي قواعد اجتماع الفيديو

أضرار التفكير في العمل وكيفية التخلص منه

كيف تتعامل مع مديرك

الأكثر قراءة

ادخر بذكاء: تعرف على أفضل طرق استثمار المدخرات الشخصية

كيف تصطاد الموظف العصفورة

دليلك المختصر للوظائف والدورات المطلوبة في سوق العمل 2023

لماذا يستقيل أفضل الموظفين؟

إزاي تتعامل مع مديرك البطيخه!

ما هي اسباب الرفض في الوظيفة الجديدة

المنافسة الشرسة لما تكون شريفة

أهم أسباب عدم حضور المرشح للمقابلة الشخصية

5 نصائح لعدم التفكير في الاخطاء