FB Instagram Twitter Youtube Linkedin إزاي تخلي عملائك الدرع بتاعك | أكاديمية اعمل بيزنس
 
الرجوع الى المدونة

إزاي تخلي عملائك الدرع بتاعك

إزاي تخلي عملائك الدرع بتاعك

اتكلمنا في بوست قبل كده عن الـ Brand attack (تقدر تشوفه من هنا http://bit.ly/2MKw208) وادينا مثال عليه ووضحنا إن للأسف ممكن يحصل هجوم على البراند بتاعك من منافس ليك أو من مستخدم للسوشيال ميديا بهدف انه يبقى مشهور ولو لفترة صغيرة، النهاردة هنجاوبكم على سؤال مهم جداً "إزاي بقى تقدر تصد هجوم عنيف حصل على البراند بتاعك على السوشيال ميديا ؟".

في بعض الشركات بتاخد موقف إنها ترد على أي إشاعة وتتحدى الشركة أو الشخص اللي بيعملوا الهجوم إنهم يثبتوا صحة كلامهم بالدليل، وفي شركات بتطلع تنفي كل إشاعه وخلاص، المشكلة إن في الحالتين إن الشركة بتكون سبب من أسباب إنتشار الإشاعة ؛ لأنها بتطلع ترد في كل مناسبة، كمان في شركات بتخاف وتبدأ تتفاوض مع صاحب الإشاعة علشان يوقف الهجوم مقابل تعويض بيتفقوا عليه.

كل اللي فات ده مجرد حلول مسكنة ومش دايمه هدف الشركات منها إنها تتخلص من المشكلة في أسرع وقت، لكن الطريقة الصحيحة وطويلة الأمد إنك تعمل درع ليك او جدار يحميك، الدرع أو الجدار ده بيكونوا "العملاء"، لو بصيت كويس على كل مرة بتنزل فيها شركة "أبل" موبايل iphone جديد هنلاقي كمية إشاعات وهجوم رهيب على الشركة بسبب إن الموبايل فيه مشاكل ؛ وكل واحد من صاحب الإشاعات بيختارله مشكلة ويبدأ يكبر فيها وينزل بوستات كتير بهدف إنه يركب موجة الـ Brand attack، لو بصيت برضك كويس هتلاقي إن شركة "أبل" ولا هى هنا من الإشاعات دي ودا بسبب عملائها هم درع ليها وبيردوا على كل الإشاعات دي وبالدليل.

من أهم الطرق اللي تخلي العملاء بتوع درع ليك أو جدار حامي ليك :

1- رقم واحد وهو الأهم "جودة المنتج" ؛ لإن ببساطة لو المنتج بتاعك مبيقدرش يلبي إحتياج العميل إيه اللي هيخلي العميل يطلع يدافع عنك

2- إنك تربط العملاء بالبراند بتاعك ؛ ودا بيتم في الأساس من خلال خدمة العملاء وقسم المبيعات وخدمة ما بعد البيع، وهتلاقي في مصر أمثلة لشركات بقى إسمها "زي الطبل" بسبب خدمة العملاء وخدمة ما بعد البيع ؛ كمان هتلاقي العكس في شركات كل يوم بتخسر رصيد عند عملائها بسبب سوء خدمة العملاء وخدمة ما بعد البيع ودا اللي بيأدي طبعاً لإنخفاض نسبة المبيعات

3- إنك تخلق بينك وبين العميل روح الود والألفة ومتحسسوش إن شركة بتتكلمة معاه، دايما اسأله عن رأيه في المنتجات والخدمات، ورأيه في أخر حملة إعلانية عملتها، وإيه اللي بيتمناه في الفترة الجاية .. الخ

4- دايما عرف العميل بأخر أخبارك علشان يحس بالمصداقية ؛ وكل ما تهتم بالعميل فيه إنك تعرضلة أخبارك كل ما العميل يحس إنك جزء من يومة الطبيعي، إعمل تحديث مستمر للـ website بتاع الشركة بكل الأخبار الخاصة بالمشروعات وكمان إعرض الأخبار دي على صفحات السوشيال ميديا الخاصة بالشركة، كمان ممكن تعمل حملة بريد إلكتروني توضح فيها المنتجات أو الخدمات اللي بتخطط الشركة إنها تقدمها قريب

الملخص إنك متحاولش تدور على حلول مؤقتة وطارئة للإشاعات لأنها هتخليك في قلق دايم على ؛ دا غير إنك ممكن تخسر كتير ويتم إستنزافك عن طريق إشاعة او خبر متقدرش تواجهه بقوة، عليك إنك تحل أي مشكلة من جذورها وانك تبني مجتمع متكامل يثق فيك، كمان لازم تبذل مجهود في بناء البراند بتاعك مها استهلك فلوس أو وقت ؛ ودا لإن البراند القوي هو اللي هيخليك زي الجبل في السوق حتى لو في أشد الظروف صعوبة.