إزاي تدير موظف لا تحبه؟

كمدير أو صاحب بيزنس احتمال كبير في أي مرحلة من مراحل ادارتك تكون مضطر تتعامل مع موظف مش حابه، وبغض النظر عن حجم الشركة سواء كبيرة أو صغيرة فمن المستحيل إنك هتكون بتحب كل الناس فيها، وغالبا لو كنت بتدير شخص مش بتحبه، ممكن تلاقي نفسك بتعامله بطريقة مختلفة عن زملاؤه بسبب مشاعرك الشخصية دي.

وبما إن العلاقة المثالية بينك وبين موظفيك لازم تقوم على التفاهم خاصة لو كان الموظف ده قايم بشغله على أكمل وجه، هنا هيكون من الضروري كمدير إنك تعدل أسلوب ادارتك وده لمصلحتك انت ولمصلحة شركتك بشكل عام، وفي طرق كتير ممكن تعملها وتقدر من خلالها إنك تحافظ على علاقة عمل احترافية بينك وبين الموظف اللي انت مش بتحب التعامل معاه:

• اعرف سبب عدم حبك له: من المهم قبل ما تحاول تعرف ازاي ممكن تتصرف معاه، إنك تشوف الأسباب اللي وراء عدم حبك للموظف ده، ممكن يكون شخص دايما بيتطفل على مكتبك وبيفتح أحاديث طويلة معاك، أو ممكن يكون شخص مزعج بشكل عام أو صوته عالي وهو بيتكلم في التلفون، أو ممكن شخص بيحب يتكلم عن نفسه وأفكاره ومعتقداته كتير، معرفتك لسبب انزعاجك منه هيخليك تعرف ازاي ممكن تديره صح، وحط في اعتبارك إنك ممكن متقدرش تغير من شخصية موظفك لكنك قادر تغير من أسلوب اداراتك له دايما.

• انت مش مضطر تكون صداقات مع كل موظفيك: إدارة وقيادة فريق مش هتكون عبارة عن ايه اللي بتحبه واللي مش بتحبه، لازم دايما تحط حد فاصل بين الشغل والعلاقات الشخصية، وممكن يحصل إنك تاخد موقف من موظف معاك بسبب حاجات ليها علاقة بالشغل، بس حتى لو كانت المسألة شخصية ليها علاقة بمشاعرك تجاه الشخص ده فحاول دايما إنك تحاول تشرح اسلوبك له بطريقة تساعدك في تهدئة أي صراع ممكن يحصل في المستقبل، وافتكر ان وجود الخلافات بيكون أحيانا شيء مفيد لأنه ممكن يساعدك في إعادة تقييم أداء فريقك.

• انت مدير بسبب قدراتك: انت بقيت مدير عشان سجل النجاحات اللي حققتها وبسبب قدراتك، عشان كده طالما الموظف ده مسببش لك أي مشكلة تعيق شغلك، انت من واجبك إنك تساعده على إنه يكون ناجح من خلال تقييم شغله بشكل موضوعي وتعرفه دايما باللي انت متوقعه منه.

• خليك إيجابي: من خلال إنك تحافظ على علاقة مهنية ودية مع أي موظف حتى لو كان وجوده مسببلك ازعاج لإن هي دي الطريقة الوحيدة اللي هتخليك تركز على المهام المطلوبة منك وتجنبك أي خلافات ملهاش لازمة في مكان الشغل.

• حافظ على الموظف الموهوب: من واجبك كمدير إنك تركز دايما على الفايدة اللي بيقدمها الموظف للشغل، وده من خلال إنك تركز دايما على استغلال مواهبه وإمكانياته اللي بتخلي له قيمة عالية للشغل وازاي تقدر تستفيد من مهاراته بشكل أكبر بغض النظر عن شخصيته.

• طبق اللوائح والإجراءات عشان تتغلب على مشاعرك: كمدير مطلوب منك إن معاملتك لموظفيك تكون على قدم المساواة، لأنك لو معملتش كده هتسمع شكاوى كتير عن تفضيلك لشخص بعينه أو وجود محسوبية في المكافآت مثلا، وفي حالة لو مفيش لائحة تنظم الشغل، ممكن تلاقي نفسك بتدي امتيازات خاصة للشخص اللي بتفضله وبترفضها للي مش بتحبه، ومن هنا لازم يكون هدفك اعداد لائحة إجراءات تقدر تعالج بيها المشكلات الشائعة وتقود موظفيك كلهم بناءا عليها.

• قيم النتائج: تأكد من إن كل مشروع له اهداف ممكن قياسها وقياس طريقة انجازها، وبكده هتكون ضامن إنك عندك معايير موضوعية تقدر تحاسب كل موظفيك وفقا ليها، وبالتالي تركيزك هيكون على اللي بيقدمه الموظف أكتر من تركيزك على الموظف نفسه.

• متتهاونش في الأخطاء: انت فضلت استمرار الموظف ده في عمله بالرغم من مشاعرك السلبية اتجاهه لسبب أو لآخر، فلو كان سلوك الموظف ده مزعج أو أدائه لمهماته ممكن يبطئ فريق عملك فلازم تفهمه ده كويس وتعرفه إن السلوك ده غير مقبول واقترح عليه طرق بديلة يتعامل من خلالها.

• راقب طريقة معاملة الاخرين له: لأنك ممكن تكتشف إن الغلط في أسلوب تعاملك معاه مش فيه هو كشخص وفي الحالة دي لازم تغير من أسلوبك خاصة لو مكنش بين وبين زملائه أي مشاكل مسببالهم ازعاج من ناحيته.
في النهاية خلينا نكون واقعيين، انت في خلال مسيرتك المهنية هتكون مضطر تتعامل مع أشخاص كتير منهم اللي مش هتكون مستلطفهم أو مش حاببهم لسبب ما، ودي طبيعة بشرية ممكن متكونش ذنبك أو ذنبه، لكن في حالة وجود موقف زي ده، لازم تحاول تتعلم ازاي تقدر تتعامل معاهم، وكل ما كنت أسرع في تطوير عاداتك وأسلوب إدارتك لزميل العمل الغير مثالي بالنسبالك، كل ما هيكون أفضل لك ولشركتك.

إزاي تدير موظف بتكرهه

مقالات مشابهة

دليلك المختصر للتعرف على وظيفة مدير تطوير الأعمال بالتفصيل

تعرف على الفرق بين المستويات الثلاثة للإدارة ومهامهم

كل ما ترغب في معرفته عن مهام المدير التجاري المحترف

تعرف على الفرق بين تخطيط القوى العاملة وتخطيط الموارد البشرية؟

الأكثر قراءة

لغة الجسد: مفهومها وأهميتها وكيفية قراءتها؟

أخلاقيات العمل المهني: مفهومها أهم المبادئ الحاكمة لها

4 أنماط للقيادة الإدارية بين المزايا والعيوب

إستراتيجية حل المشكلات وإتخاذ القرارات

كيف تنجح في إدارة مطعمك: 9 استراتيجيات إحترافية لتتفوق على المنافسين

السلوك التنظيمي في إدارة المؤسسات: المفهوم والمبادئ والأهمية

أهمية إدارة العلاقات العامة وتأثيرها في المؤسسات

كيف تدير مديرك؟ تعلم 11 استراتيجية ناجحة لتدير مديرك بنجاح

تعرف على أهمية إعداد تقرير إداري وما هي خصائصه؟