شركة فيها موظفين كتير، وفي واحد منهم شاطر جدا، مبدع في شغله وكفاءته عالية، ويمكن يكون هو اللي ورا نجاح معظم الشغل في الشركة، بس محدش واخد باله منه، محدش يعرف إنه شاطر وشايل كل الشغل تقريبا، وفيه موظف تاني في المكتب اللي جنبه، شاطر جدا برضه، بس اجتماعي مع كل زمايله، ومتصاحب قوي على المدير، وبيتكلم باستمرار عن شغله، بيعرف اللي حواليه هو بيجتهد قد إيه في الشغل.

النتيجة إن أغلب المسئولين في الشركة فاكرين إن الموظف التاني هو الوحيد المجتهد أو الشاطر، ومش واخدين بالهم من الموظف الأول خالص".

سمعت القصة ديه قبل كده؟ كتييييييييير، ليه؟ لأنها موجودة في كل الشركات تقريبا.

دايما بنلاقي موظفين كتير بيعرفوا يعرضوا نفسهم ويروجوا لشغلهم في مكان عملهم، سواء كانوا بيشتغلوا فعلا، أو مهاراتهم ضعيفة وشغلهم سيء، ويبان إنه هما النجوم واللي بيعملوا كل حاجة.

ومن ناحية تانية بنلاقي موظف مجتهد، بيعمل الشغل كله تقريبا، مبدع ومتفاني في عمله، لكن عنده مشكلة الفشل في التسويق لنفسه، فبيتظلم ويبان إنه مش بيشتغل، وممكن مجهوده يتسرق، ده غير الآثار النفسية السيئة لعدم تقدير شغله.

إزاي بقى أتجنب ده، إزاي وأعرف أروج لنفسي ولأسوق لشغلي في الشركة أو المكان اللي بشتغل فيه؟ لو مش عارف تعمل ده إزاي خلينا نساعدك بشوية نصائح:

1- غير فكرتك السلبية عن "التسويق الذاتي":

إذا كانت فكرة التسويق الذاتي بالنسبالك إنك بتقلل من قيمة نفسك، أو إنك هتبالغ في عرض المجهود أو الشغل بتاعك عشان تترقى أسرع من زميلك، فالنصيحة الأولى عشان تسوق لنفسك صح إنك لازم تغير فكرتك السلبية عن التسويق الذاتي لشغلك.

أولا: لازم تتقبل فكرة التسويق الذاتي كجزء من حياتك المهنية، ثانيا: تفهم كويس إنك مش بتتفاخر بشغلك ولا بتبالغ في إبراز إنجازاتك، إنت ببساطة بتشرح وتوصف الشغل اللي إنت عملته عشان مديرك يبقى واصله كويس اجتهادك في الشغل.

2- افهم نفسك كويس، وحدد أفضل مهاراتك وإنجازاتك:

قبل ما تبدأ تسوق لنفسك، لازم تحدد هتسوق لإيه؟ اقعد مع نفسك وفكر واكتب أبرز مهاراتك، وأفضل انجازاتك في الشغل.

3- اعرض المشروعات الناجحة اللي ساهمت فيها:

عشان تتجنب فخ إنك بتتباهى بنفسك أو بتلغي جهد باقي فريق العمل، إبدأ بعرض عام للمشروعات الناجحة اللي إنت كنت جزء منها، وبعد كده اشرح بشكل واضح ومباشر دورك الفعلي في النجاح ده، من غير أي تقليل من مجهود الآخرين.

4- اعرض نفسك كخبير في مجالك:

لو كنت جد في إنك تبقى ناجح في حياتك المهنية، يبقى ملفك الوظيفي على LinkedIn والمواقع المشابهة مينفعش يبقى عادي، لازم تفصل خبراتك كويس، ومشروعاتك الناجحة، وكل الإنجازات اللي ساهمت فيها.

ادخل كمان على المواقع وحسابات تويتر وغيرها الخاصة بمجالك، وساهم برأيك واعرض خبراتك، ببساطة خلي الناس تعرفك.

5- تواصل مع الأقسام والإدارات المختلفة:

لما تكون في بريك في الشغل أو في أي أوتنج مع الشركة، تواصل مع زمايلك ومع المسئولين في الإدارات والأقسام التانية، وعرفهم بنفسك، وممكن قوي تعرض أي خدمة تقدر تساعد بيها في أي قسم تاني، ده هيفيدك جدا، غير المهارات اللي هتكتسبها من التعامل مع الأقسام التانية واللي هتضيف جديد للسي في بتاعتك.

6-بادر بالتطوع:

لو لقيت مديرك أو أي مسئول في شغلك بيقدم فرصة للي عايز يتطوع يعمل شغل معين، بادر بالتطوع، اعرض خدماتك وأكد قدرتك على إنك تشيل المسئولية ديه، ده هيبين قد إيه إنت شخص يمكن الوثوق فيه.

7-استخدم السوشيال ميديا بشكل فعال:

ممكن تعتبر صفحتك على الفيسبوك أو حسابك على تويتر آليات بتستخدمها للتسويق لنفسك، وتعرض عن طريقهم شغلك أو مهاراتك.

8- بطل تقلل من قيمة نفسك:

اتبع النصيحة إلي بتقول "كن كبيرا.. وإلا لن تحقق شيئا"، خليك دايما حريص إنك تبين مهاراتك وإمكانياتك، خليك واثق في نفسك بس احذر إنك تقع في فخ الغرور.

9- خليك اجتماعي:

تواصل مع زملائك، ووسع دايرة علاقاتك جوه الشركة، احرص إنك تكون متواجد في المناسبات المتعلقة بمجال شغلك، حتى لو كانت مناسبات اجتماعية أو ترفيهية.

10-امدح زمايلك واشكر في شغلهم:

نادرا ما هتلاقي نفسك الوحيد المسئول عن نجاح مهمة في الشغل، امدح زملاك اللي شاركوا معاك، اشكر شغلهم وجهودهم، ده هيخليك كمان شخص محبوب وهيخلي الناس تحب تشتغل معاك.

في النهاية لازم نكون مدركين إنه الترويج لمجهودنا والتسويق لنفسنا في الشغل مش رفاهية، ده بقى جزء ضروري من حياتنا المهنية، ومش معني إني بسوق لنفسي إني أكون خبيث أو منافق، لكن ببساطة أنا بتعلم إزاي أخلي مديري أو المسئول عني في المؤسسة يعرف أنا اشتغلت إيه وبذلت مجهود قد إيه.