إزاي تعرف طباع المرشح للوظيفة في الانترفيو؟

نجاح الموظف في أي عمل مش متوقف بس على مهاراته المهنية، كلنا سمعنا عن ناس ذكية وشاطرة في مهنتها لكن مش بتقعد كتير في أي شركة تروحها، وده بيكون راجع لطبيعة شخصيتهم وطباعهم وصفاتهم، اللي مش بيقدروا بيها ينسجموا مع بيئة العمل حواليهم، وطبعا لما توظف إنت كصاحب شركة ناس من هذه الفئة وكل شوية يسيبوا الشركة وتبدأ تدور على غيرهم، فده بيمثل عبئ نفسي ومادي كبير على شركتك.

لكن المشكلة الكبيرة اللي بتواجه معظم المديرين وأصحاب الشركات هي إنهم مش بيقدروا يحددوا الطباع الشخصية للمرشح المتقدم للوظيفة خلال المقابلة الشخصية، وطبعا الشركات الصغيرة والناشئة هي أكتر حد بيعاني من النقطة، لأنها بتكون في أغلب الحالات ماعندهاش قدرة تحمل الخسارة الناتجة عن سرعة دوران العمالة في الشركة.

لكن رغبة الشركات ديه في التعرف على شخصية المرشح ومش مهاراته المهنية فقط بتوديهم كتير في سكة غلط، وهي إنهم يدوروا على أسئلة مبتكرة وذكية المرشح ما يعرفهاش ويشوفوا هيجاوب عليها إزاي؟.. وده اتجاه غلط وبرضه مش هيكشفلهم السمات الشخصية للمرشح.

عشان كده بنأكد على إنه مافيش أي داعي للأسئلة المبتكرة عشان تختبر ذكاء المرشح، إنت مش محتاج ده، إنت محتاج شخص يعرف يتأقلم كويس مع فريق العمل، ويتعامل بشكل كويس مع العملاء.

* لازم تدور على أسئلة تخلي المرشح اللي قدامك يتكلم عن نفسه ويحكي، والموضوع يبقى دردشة بينكو، وده هيساعدك جدا تحدد شخصيته إيه.. لو حد اجتماعي أو خجول، متعاون ولا أناني، يقدر ينسجم مع فريق عمل ولا مايعرفش غير إنه يشتغل لوحده.

* اطرح أسئلة مفتوحة تخلي المرشح يقدر يوصف الحاجات اللي بيستمتع بيها، يتكلم عن أبرز أحداث الأسبوع اللي فات مثلا، زي سؤال "إيه هي فكرتك عن قضاء أجازه مثالية وممتعة؟".

بمعنى إنك تتخيل أنكما قاعدين سوا في كافيه وبتتكلموا، لكن تحاول إنك تخلي أغلب فرص الكلام متاحة للمرشح، مش إنت إلي تتكلم.

* إنت مش محتاج تناقش المرشح في مؤهلاته، إنت محتاج من مرشحك إنه يكشف شخصيته الحقيقية، فلو لقيت نفسك على سبيل المثال مستمتع بكلام المرشح يبقى على الأغلب العملاء كمان هيحبوا يتكلموا معاه.

* إجراء المقابلة الشخصية فن وغريزة، مش علم وليه قواعد ثابتة بتحكمه، فيه مديرين بيلاقوا القصة ديه سهلة وبيعملوها بتلقائية ومديرين تانيين بيحسوا إنها مهمة صعبة قوي وتقيلة عليهم، لأنهم مش بيعرفوا يحكموا كويس على شخصية المرشح خلال المقابلة، عشان كده من المفيد إنه يكون معاك مساعد أو نائب ليك في المقابلة، حاجة كويسة إنه يكون فيه رأي تاني معاك ممكن يشوف إلي إنت مش قادر تشوفه.

* ماتتوقعش إن المرشح الأول هو المرشح المثالي، وماتتوقعش برضه إنك تقدر تحدد قرارك النهائي من أول مرة، اعمل مقابلات شخصية لكل المرشحين، وحدد مين منهم حابب تشوفه مرة تاني، واتصل بيهم هما بس.

* قيم كل مرشح على مقياس مكون من 10 درجات، وركز فقط على اللي هياخدوا على 9 أو 10 درجات.

* خليك متواضع، خلي المقابلات الشخصية ممتعة، بس خد بالك برضه إن ديه مهمة حقيقية لازم تنجزها بنجاح، لأنك محتاج موظفين كويسيين يشتغلوا باجتهاد في شركتك، وازن بين المتعة والجد، بس في النهاية ركز كويس عشان تختار الأشخاص المناسبين.