التسويق الإلكتروني هو واحد من أساسات العملية التسويقية لأغلب المشاريع الناجحة بسبب الزياده المستمرة لمستخدمي مواقع التواصل الإجتماعي و سهولة التواصل معاهم وده بيزود إرتباطهم بالعلامة التجارية و ده بيوصل البراند لجزء كبير من معادلة النجاح.

مع تزايد الدعاية للمنتجات وإنتشارها على منصات السوشيال ميديا ظهرت حاجة إسمها "إستراتيجيات السوشيال ميديا" ودي هدفها وضع خطط سليمة ومدروسة للعملية التسويقية على المنصات دي خاصة مع ظهور كتير من الإعلانات الدعائية المعموله بصوره غلط ودا طبعا بيأدي لخسائر في صورة البراند.

طيب النهاردة إنت صاحب مشروع ناشئ وناوي تبدأ تسوق لمنتجاتك أو خدماتك على السوشيال ميديا إزاي تعمل social media plan للموضوع ده ؟

أول حاجة لازم تجاوب على مجموعة أسئلة لأنها هترسملك الطريق بتاعك:

إيه الغرض من وجودك على مواقع التواصل الاجتماعي؟

مين هو الجمهور المستهدف وإيه هي احتياجاته؟

إيه نوع المحتوى اللي هتنشره وإزاي هيساهم في تلبية إحتياجات العملاء؟

إزاي المنافسين بيلبوا احتياجات العملاء على شبكات التواصل الاجتماعي؟

بعد إجابتك على الأسئلة دى بتقدر تكون صورة واضحة عن جمهورك ومنافسينك وبتبدأ مرحلة التنفيذ اللى بتمر بأكتر من مرحلة وهنحاول نشرحهم في النقط اللي جاية.

1- استهداف العميل المناسب

1 من كل 3 من مستخدمي الإنترنت بيستخدموا منصات التواصل الإجتماعي علشان يعرفوا معلومات أكتر عن المنتجات أو الخدمات اللى هيستخدموها، لو قدرت تعرف العميل المناسب للمنتج اللى بتقدمه على شبكات السوشيال ميديا فانت كده قطعت نص طريق النجاح في الإستراتيجية بتاعتك لأن ده هيساعدك في إختيار المحتوى المناسب ليهم، والإستهداف الغلط ممكن يبقى السبب الرئيسي في فشل خطتك التسويقية لإنك بتوجه رسايلك التسويقية لإشخاص غير مهتمين بيك.

من الأدوات اللي هتساعدك في عملية الإستهداف هى الـ buyer persona واللي من خلالها بتتخيل شكل العميل بتاعك من أكتر من إتجاه زي عمره، موقعه الجغرافي، مهنته، اهتماماته الشخصية، شبكات السوشيال ميديا اللي بيستخدمها، العلامات التجارية اللي بيتابعها، وممكن يكون للمنتج بتاعك أكتر من Buyer Persona وده هنتكلم عنه بالتفصيل الفترة الجاية.

2- تجهيز المحتوى المناسب

بمجرد تحديد الجمهور اللى هتستهدفه بتبدأ الخطوة التانية المفروض تبدأ تفكر إيه هو المحتوى اللي يجذب الجمهور ده ويقنعهم يشاركوه مع أصدقائهم ومتابعيهم، يستحسن إنك تقدم المحتوى المفيد والجذاب واللي ليه صله بنشاطك التجاري وبيجاوب على أسئلة العملاء واستفساراتهم وبيدي صورة إيجابية عن نشاطك التجاري.

حاول من خلال المحتوى إنك تقدم طابع إنساني علشان المحتوى والردود الرسمية بتدي صورة ممله عن البيزنس بتاعك ودا ممكن يخلي فيه نفور من بعض الفئات العمرية الشابه، انشر صور أو مقاطع فيديو من ورا كواليس علامتك التجارية، ده هيساعد إظهار الطابع الإنساني للبراند بتاعك وكمان هيظهر إن وراء شركتك مجموعة من الأشخاص اللي بيشتغلوا بجهد كبير لتوفير منتجات وخدمات عالية الجودة ودا طبعاً اللي هيساعدك على بناء علاقات أقوى مع عملائك.

في حاجت تانية كتير لازم تاخد بالك منها وانت بتبني إستراتيجية السوشيال ميديا هنحاول نذكرها في بوستات تانية، في النهاية حابين نوضحلك إن بناء وجود قوي للبراند بتاعك على مواقع التواصل الاجتماعي مابيحصلش ما بين يوم وليله، لكن بياخد وقت وصبر وإلتزام بالإستراتيجية المرسومة.

لو بتجهز للإطلاق البراند بتاعك على منصات السوشيال ميديا ومحتاج ترسم الإستراتيجية بتاعته إنضم لينا في اكاديمية إعمل بيزنس علشان تتابع كورس "إستراتيجيات السوشيال ميديا" للمحاضر للمحاضر "أحمد بسيوني" (الشريك المؤسس لشركة CSocial3 للتسويق الإلكتروني) .. بيساعدك إنك تبني إستراتيجية وخطة واضحة للبيزنس بتاعك ومن خلال الكورس هتعرف إيه هى الأخطاء اللي وقع فيها غيرك وهو بيبني تواجد ليه على السوشيال ميديا ودا بيكون من خلال Case studies.