فاكر أيام ما كنت متحمس قوي لشغلك؟ لما كنت بتروح شركتك فرحان وبتركز قوي في شغلك؟ لما كان حماسك بيخليك تستمع بالمهام بتاعتك، وتطلع أفضل ما عندك عشان تنجح؟ نسيت الأيام ديه.. صح؟
بص بقى طبيعي كلنا مهما كنا بنحب شغلنا ومهما كنا شغوفين بيه، إنه تمر علينا أوقات كتيرة نحس فيها بالملل والزهق من الشغل، وإن يبقى عندنا شوية مهام روتينية لازم نعملها بشكل دوري، وده بيخلينا نحس بالزهق.
طيب إزاي نقدر نقاوم روتين وملل الشغل، ونرجع تاني للحماس إلي كنا فيه؟
- تحديد السبب:
أول وأهم حاجة لازم نعملها إننا نحدد السبب اللي بيخلينا نحس بالملل والزهق، لأن السبب هو اللي هيخلينا نعرف إزاي نتصرف عشان نبعد الإحساس ده ونتخلص منه، ممكن يكون سبب الملل مهام روتينية لازم تعملها بنفسك كل يوم، ممكن يكون إحساس الإرهاق، أو يكون الشغل الكتير من غير راحة أو إجازة.. إلخ.
- التركيز على الإيجابيات:
طول ما إنت مركز على صعوبات الشغل، هتكون مشاعرك سلبية، وهتحس بالملل أكتر وأكتر، حاول تركز على كل ما هو إيجابي في شغلك، زي التفكير في أهمية اللي بتعمله سواء بالنسبالك أو بالنسبة للناس اللي بتساعدهم بوظيفتك.
- الموازنة بين العمل والترفيه:
طبيعي إنه مافيش غلط في إنك تجتهد في شغلك، لكن الجد في العمل طول الوقت لازم هيدخلك في حالة من الرتابة والملل، لازم تركز على إنك ترفه عن نفسك كويس برضه، عشان تقدر تواصل الشغل من غير ماتدخل في دوامة الروتين، الموازنة هي المفتاح الأول لمقاومة الملل في العمل.
وهنا لازم نأكد على إنك تقضي أجازتك بشكل مختلف، سافر لو تقدر، لو صعب ممكن تخرج، تقابل صحابك، تعمل هواية بتحبها.. المهم يوم الإجازة يبقى مختلف.
- حّفز نفسك:
بدل ما تقعد طول وقت الشغل مركز على الشغل بس، ويجيلك إحساس بالملل اللي هيكون سبب في ضياع وقت طويل مش هتنجز فيه أي حاجة، ممكن تكسر الحالة ديه بحاجات بتحبها وتحّفز بيها نفسك على الشغل، زي سماع الموسيقى وإنت بتخلص شغلك.
- اتحرك:
بغض النظر عن الأضرار الجسدية اللي هتحصلك نتيجة إنك قاعد مكانك ساعات طويلة متواصلة، فذهنك كمان بيتأثر وبيصيبه الملل والخمول من القاعدة ديه، حاول كل ساعة تتحرك ولو دقيقتين من مكانك، ده هيساعك جدا ماتحسش بأي ملل، وفي النقطة ديه هتلاقي تمارين رياضية كتير ممكن تعملها في المكتب.
- خد استراحة:
مش لازم تستنى الويك إند عشان ترتاح وتعمل حاجة مختلفة، وإنت في وسط شغلك وقت الغدا مثلا ممكن تنزل تاكل في مطعم قريب، أو تنزل تشرب قهوتك في مكان بتحبه جمب شغلك، ده ليه تأثير كبير في كسر أي روتين بتمر بيه في الشغل.
- تجنب الفراغ:
الفراغ هو أكبر سبب للإحساس بالملل، قاوم الفراغ واعمل لنفسك جدول في الشغل يكون زحمة شوية، تخلص مهمة تروح للتانية، مش هتلاقي فرصة تخليك تحس بأي روتين أو ملل.
ولو خلصت شغلك ممكن بسهولة تعرض المساعدة على أي حد من فريقك في الشغل، أو تحدد لنفسك مهارة جديدة محتاج تتعلمها وتبدأ تقرأ وتذاكر في وقتك الفاضي في الشغل.
في النهاية مش عايزين حد يستهين بالملل، ويشوف إنه حاجة بسيطة وهتعدي، لازم تقاوم الإحساس ده وتغيره، لأن الملل ليه تأثير سلبي كبير على شغلك، هيخليك تفقد تركيزك وتتراجع كفاءتك ويقل معدل إنتاجك.
ولو حاولت كل الطرق اللي قولنا عليها ومالقتش نتيجة، فممكن قوي يكون ده الوقت اللي لازم تغير فيه مكان شغلك، أو مجالك.
الرئيسية
تسجيل الدخول
