ياريت يا جماعة نركز شوية في موضوع نفتح مشروع

مش أي حد معاه فلوس وخبرة يبقى يفتح مشروع بدون ما يدرس الموضوع كويس يعنى لازم نفكر شوية فى النشاط اللى هنفتحه لازم يبقى عندنا حالة من التالي :

1 - نشاط جديد تماماً : يعنى على المستوى العالمى حاجة زى الموبيل مثلاً أو الفيس بوك .... إلخ

أو نشاط جديد للبلد زى مثلاً شركات التاكسى اللى موجودة فى العالم كله من زمان وبدأت تدخل مصر آخر سنتين .

2 - تطوير نشاط قائم : زى مثلاً إدخال عصارات القصب داخل المولات .

أو زيادة التخصص زي مثلا تطوير فكرة مولات الملابس لمول ملابس رياضية وزى اللى عملوا أكشاك الزلابية

3 - وجود فجوة في السوق : بمعنى مشكلة موجودة فى السوق زى ان الناس بتنزل من بيوتها من غير ما تفطر فبقي فيه ناس عايزة تفطر برة بيتها فنشأت عربيات الفول مثلاً تغطى الفجوة دى.

4 - سوق كبير جداً : لو فيه سوق كبير ومفيش تغطية كفاية زى محلات الموبيل مثلاً أو شركات الإنترنت من 10 سنين وهكذا

إنما واحد ماشي في شارع فيه 10 محلات ملابس مثلاً والناس بتتفرج كتير ( محدش بيشترى ) فيلاقي زحمة فيفتح جنبهم .... الناس دى حتى لو بتبيع كويس مع كثرة المحلات وتوزيع العملاء عليهم مش هيلاقي عملاء تخليه يكسب

المشكلة دى وقعت فيها شركة عالمية اسمها "ستاربكس" وهحكيلكم عملوا إيه بعد كده إن شاء الله

ياريت منتسرعش وندخل مجال من خلال السمعة إن المجال ده ماشى ومتحكمشي عليه في ساعة معينة أو موسم معين لأنك هتدفع إيجار ومصاريف السنة كلها مش إيجار الموسم بس