زى ما احنا عارفين إن النجاح عمره ما كان مرتبط بسن معين .. النجاح دافع بيدفع الإنسان لتحقيق اللى هو عاوزه وهو اللى بيقدر يحافظ على الدافع ده بكل قوته بشكل مستمر ..

الحكاية ان إيفان ده ولد عنده 8 سنين بيحب الgames أوى .. فحب إنه يعمل مراجعات للألعاب دى (reviews ) على قناته على YouTube وبمساعدة من والده قدر إنه يعمل القناة ويبدأ ينشر عليها مراجعاته للألعاب للأطفال اللى فى سنه .. سن ال 8 سنوات

بدأت القناة من 3 سنين وبدأت الفيديوهات تزيد لغاية أما وصلت لحد كتابة البوست ده ل 400 فيديو

إيفان عنده كاريزما وشخصية جذابة قدر من خلالهم إن عدد المشتركين فى قناته يوصل لأكتر من مليون مشترك

بدأت المشاهدات كمان تزيد لأنه كان بيقدم حاجة جديدة وحصرية ( فى الحقيقة بعض الفيديوهات تخطت حاجز ال 5 مليون مشاهدة ) وطبعًا بدأت إعلانات ال YouTube تظهر على قناته وبقى ليه مصدر دخل من الفيديوهات دى وصل لمليون دولار من بدء إنشاء القناة

إيفان قدر فى السن ده إنه يصنع العلامة التجارية الخاصة بيه وده لينك قناة إيفان تقدروا تتفرجوا على فيديوهاته من هنا

http://goo.gl/89m5qT

الفكرة إنه وعلى الرغم من صغر سنه إلا إنه عمل حاجة بيحبها أوى وكانت النتيجة إنها بقت مصدر دخل ليه ولأسرته كلها .

الفكرة اللى عاوزين نوصلها إنك لازم تدور على اللى بتحبه وتكون مبدع فيه وساعتها مش هتحس إنك بتشتغل .. لأ إنت هتحس إنك بتقضى وقت ممتع وسعيد .

كمان وسائل التواصل الإجتماعى ومنها ال YouTube ممكن تبقى مصدر دخل لناس كتير ويقدروا يعملوا البيزنس بتاعهم عليها بس أهم حاجة إنك تقدم شئ إنت بتحبه وهيفيد الناس وهتلاقى النتايج مبشرة ..