"مافيش وقت محدد عشان تبدأ رحلة النجاح"... "كل ما تبدأ بدري كل ما فرصة نجاحك تزيد"

طيب إيه بقى!! أي مقولة فيهم هي اللي صح؟ أبدأ براحتي وقت ما أحس إنها اللحظة المناسبة؟

ولا البيزنس بتاعي بياخد وقته وفرصته صح لو بدأت بدري وأنا صغير؟ خلينا نجاوب على السؤال ده برأي خبير في البيزنس وأسرار النجاح وهو"كارمين جالو".

"جالو" هو كاتب أمريكي لمجموعة كبيرة من أنجح وأكتر الكتب مبيعا زي Talk Like TED و The Storyteller's Secret- وكمان دكتور جامعة وصحفي ومراسل ومذيع، وعنده مؤسسة جالو وبيدرب فيها على الاتصالات وفنون التواصل وتقديم بريزينتيشن ناجح.

جالو بقى بيقولنا إيه؟ سن 35 كمتوسط هو السن المناسب عشان تبدأ تكون رائد أعمال ناجح، وده عكس ما كتير كانوا شايفينه بإنك كل ماتبدأ بدري بيبقى عندك وقت تحاول، وفرصة إنك تجرب وتفشل وتعيد المحاولة تاني.

بس بيرجع جالو وبيأكدلنا إنه فيه بالفعل قصص نجاح كتير لرواد ورجال أعمال بدأت في العشيرينات من عمرهم، بس لو صممنا إن النجاح يبدأ من عمر صغير، هنبقى بنضغط على نفسنا وبنحكم عليها بالفشل من قبل ما نبدأ.

بيحكيلنا جالو قصته الشخصية وإزاي إنه لما قرر في سن الـ35 يسيب وظيفته إلي دخله منها كان حوالي 1 مليون دولار سنويا ويبدأ البيزنس الخاص بيه، كان فاكر إنه اتأخر وإنه ضيّع فرصته في إنه يكون رائد أعمال ناجح.

وكان وقتها عنده مشروع صغير دخله قليل جدا وكان كمان مستني ولادة طفله، لكنه حس إن ده الوقت المناسب وإنه أسس عيلة خلاص ولازم يبدأ البيزنس الخاص بيه هو مراته.

وده الرأي اللي أكدته دراسة جديدة نشرت جريدة "وول ستريت جورنال" الأمريكية نتايجها وبتقول إن الأفراد اللي عمرهم أكتر من 35 هما اللي عندهم احتمال أكبر إنهم يبدأوا بيزنس وينجحوا فيه بنسبة 50% زيادة عن إلي بيبدأوا وهما أصغر في السن.

أكدت الدراسة كمان إن أصحاب المشاريع اللي ممكن نسميهم "رواد الأعمال منتصف العمر" في منتصف عمرهم الوظيفي وهو سن "الثلاثينات" بيكون احتمال نجاحهم أكتر 5 مرات بعد تأسيس مشروعهم بخمس سنين، وده مقارنة بإلي بدأوا البيزنس بتاعهم بعد الجامعة مباشرة.

طيب إيه السبب بقى في إن سر النجاح في البيزنس بيبدأ بعد سن 35؟

الدراسة بتقولنا سببين:

1- لازم تاخد وقت تفكر فيه إنت عايز إيه، وتجرب فيه، وتبني خبرات متراكمة:

وده اللي جالو بيأكده فبيقول إنه استغرق حوالي 15 سنة من تخرجه عشان يوصل للي هو عايزه، وجرب في الفترة ديه وظايف كتير، اتعلم من كل وظيفة منها، وقدر يحدد إيه اللي هو بيحبه وإيه إلي بيكرهه، وإيه هي الحاجات إلي هو شاطر فيها ومحتاج يطورها أكتر عشان يبدأ بيها البيزنس بتاعه.

2- رجال الأعمال "الأقدم" أو "الأكبر" بيكونوا أكثر احتمالا إنهم يمولوا نفسهم بنفسهم:

لو بتشتغل في كارير كويس سنين طويلة هتقدر تدخر مبلغ تبدأ بيه البيزنس بتاعك في الثلاثينات، ولو ما قدرتش تدخر هتقدر وقتها نتيجة الخبرة الكبيرة اللي خدتها إنك تصيغ خطة عمل كويسة تقنع بيها مستثمرين يمولوا مشروعك، كمان لو عليك أي التزامات أو ديون تقدر تكون سديتها.

خلاصة القول إن احتمال النجاح في البيزنس بيزيد بنسبة كبيرة بعد سن الـ35، لأنك بتكون خدت خبرة كبيرة في مجالك، واتعلمت كتير، وطورت من نفسك ومن مهاراتك، عكس إلي بيبدأ في العشرينات بعد التخرج مباشرة وهو لسه ماخدش خبرة في الحياة العملية.