النهاردة هنتكلم عن الاستراتيجية الخامسة والأخيرة من استراتيجيات الاستهداف وهى استراتيجية عمل منتج واحد لشريحة واحدة ..

هنلاقى هنا ان الشركة بتركز على انتاج منتج واحد بس لشريحة واحدة بس ومثال على كده مثلاً "ماونتن فيو" فى مصر .. هنلاقى ان الشريحة المستهدفة هى اللى تقدر تسكن فى عقار تمنه أكتر من 3 مليون جنيه .. أو زى اسكان الشباب اللى بيستهدف الشباب اللى لسة هيتجوز او متجوز جديد مثلاً أو مثلاً مشروع ابنى بيتك اللى بيستهدف نفس الشريحة .

كل جهود التسويق بتركز على مخاطبة الشريحة دى بكل مكوناتها أو هنلاقى مثلاً "On The Run" واللى هتلاقى فيها مثلاً الشاى أو النيسكافيه أغلى 10 أضعاف أو أكتر من سعره العادى وقيس على كده كل المنتجات اللى بيعرضها عنده .. هو هنا مركز على شريحة واحدة فقط وبيوجه ليها كل أنشطته التسويقية .

أشهر مثال كمان هو "شاى العروسة" واللى بيستهدف الطبقة المتوسطة والطبقة اللى تحتها على طول أو سلسلة محلات التوحيد والنور أو "صيدناوى" أو عربيات "نصر" فى فترة السبعينات والتمانينات أو سجاير "كيلوباترا" .

لو ركزنا فى الاستراتيجية دى هنلاقى ان أغلبنا بيستخدمها فى التسويق للبيزنس بتاعه وهى الأكثر شيوعاً حتى على أصغر المستويات ..

احنا كده خلصنا استراتيجيات الاستهداف بأنواعها الخمسة .. وهنبدأ فى الحلقة اللى جاية نتكلم عن ال Positioning