اجتهد عشان تنجح

الأهلي والزمالك ضموا السنة دى فقط 8 لاعبين كانو محترفين فى أوروبا وال8 مقدروش يثبتوا نفسهم فى الأندية الأوروبية فرجعوا مصر وتعاقدوا مع الأهلي والزمالك زى كتير قبلهم من اللاعبين المصريين ..... طيب ده معناه إيه أو نستفيد منه إزاى ؟

أولاً واضح لأى حد إن مقاييس النجاح عندنا مختلفة تماماً عن مقاييس النجاح خارج مصر فهناك الموهبة وحدها لا تكفى وإنما لازم التعب والجهد والعرق والالتزام ويمكن كنت قبل كده كتبت عن "خافيير زانيتى" المحترف الأرجنيتيني في صفوف الإنترميلان اللى النادى نزل بيان سنه 2014 إن لاعبه الأرجنيتيني هيتأخر علي المران لأول مره منذ إنضمامه سنه 1995 وكان بيوضح سبب التأخير ... تخيل لاعب محترف يتأخر عن التمرين لأول مره بعد 19 سنة من الإحتراف ... قيس بقي الكلام ده علينا وعلى موظفينا وعلى لاعبينا وعلى كل المنظومة اللى احنا عايشين فيها هتعرف ليه صعب إننا ننجح خارج مصر (طبعاً الكلام مش على الإطلاق فيه ناس ناجحة وهتكمل نجاح زى " أحمد حسن" و "ميدو" و"عبد الظاهر السقا" قبل كده و"محمد صلاح" الآن) .... يبقى لازم نفهم إننا علشان ننجح خارج مصر لازم مهما كانت موهبتنا وإمكانياتنا نكلمها بالالتزام بالنظام اللى هما بيحترموه أكتر من الموهبة .

ثانياً إن النجاح فى مصر سهل لعدم وجود تنافسية .... طبعاً فيه ناس فاهمة إن النجاح خارج مصر أسهل وإن بره النجاح سهل وانت ياعم مشوفتش فيلم "النمر الإسود" ولا فيلم "همام فى أمستردام" ..... طبعاً الكلام ده مش صح تماماً .... النجاح في مصر أسهل لأن المنافسة مش صعبة ولا كبيرة علشان كده هتلاقى فى شركات كبيرة وصغيرة ناس مش ماليين مكانهم ولا مؤهلين إنهم ياخدوا المكان ده ولما تدور وراهم هتلاقى إن هو ده أفضل المتاح وإن الشركات حاولت تجيب الأفضل لكن مقدرتش فاكتفت بالمتاح ..... ركز كده شوية وشوف فرص الترقى لأى حد بيشتغل كتير وبيقلل من كلامه هتلاقيها أكبر من أماكن كتير عندهم ما يسمى بالتنافسية .

ثالثاً مرتبطة بالنقطتين اللى فاتو وهى إنك تخرج من دايرة إتهام البيئة المحيطة وتبدأ تضغط على نفسك شوية وتشتغل وتشد حيلك علشان ربنا يكرمك .... بطل تقنع نفسك إنك لو كنت فى دولة تانية كنت هتبقى ناجح أكتر من كده لأن غيرك جرب دولة تانية واكتشف إنه منجحش فيها ونجح هنا علشان التنافسية هنا شبه معدومة واللى تخللى لاعبين مش لاقية مكان في دورى الدرجة التانية فى إيطاليا أو البرتغال وتيجى هنا تلعب لأكبر ناديين في مصر وأفريقيا .... فلو انت مقدرتش تنجح في بيئة سهلة (غالباً ) مش هتنجح فى بيئة صعبة إلا لو غيرت من نفسك كتير قوى .... طيب لو غيرت من نفسك فى نفس البيئة هتعمل إيه ؟؟؟؟

ربنا يجعلنا من المجتهدين اللى بيحاولوا ينجحوا مش منتظريين النجاح ينزل على دماغهم من السما وغالباً السماء لا تمطر ذهباً أو فضة