FB Instagram Twitter Youtube Linkedin ادارة الأزمات.. فن! | أكاديمية اعمل بيزنس
 
الرجوع الى المدونة

ادارة الأزمات.. فن!

ادارة الأزمات.. فن!

حياتنا كلنا مؤخراً بقت كتلة من الأزمات واللي كلنا بنحاول نسيطر عليها بشكل مستمر وفي مننا اللي بينجح وفى اللى ما بيقدرش وده كله علي المستوى الفردي والشخصى ما بالكم بالأزمات علي مستوى البيزنس؟! إدارة الأزمات بالنسبة للشركات فن وعلم وعدم معرفته بيوقع الشركات في مشاكل كبيرة وطبعا حصل في مصر أشكال كتير من الأزمات واللى جاى مجرد أمثلة.

١- أزمة نجيب ساويرس وشركة موبينيل

من أشهر أزمات البيزنس علي الاطلاق مشكلة نجيب ساويرس اللي أثرت بشكل مباشر علي موبينيل وكانت سبب فى بيع حصة نجيب ساويرس لشركة أورانج.

بدأت الأزمة لما نزل ساويرس علي حسابه علي تويتر صورة لميكى وميمى ماوس لابسين فيها جلابيه ونقاب والصورة دي أثارت غضب كتير من متابعينه وبعضهم رفعوا عليه قضية، وده أثر علي مبيعات موبينيل بشكل مباشر وأعلنوا خلالها خسارة ما يقارب 42 مليار دولار سنة 2011.

بعد تصاعد الأزمة نجيب ساويرس اعتذر ووضح انها مجرد صورة علي سبيل الهزار و وحذف الصوره من حساباته في محاولات لتدارك الأمر ولكن الأمر كان انتشر بشكل كبير علي كل مواقع التواصل الاجتماعي وظهرت حملات لمقاطعة موبينيل أو التحويل منها لشركات تانية وفضلت الأزمة مشتعلة وكانت سبب لبيع نجيب لحصة من موبينيل وبعدها فعلاً بدأت الناس تهدأ.

٢- سويڤل والـ Cost of Greatness

موخراً انتشر اكتر من بوست علي السوشيال ميديا لموظفين في شركة "SWVL" عن رفدهم من الشركة بسبب شكوتهم من بعض المشاكل اللى بتواجهم وانتشرت البوستات لفترة وبعدها بدأت تختفى لحد ما قرر موظف شغال في الشركة انه يسجل ڤيديو يتهم فيه كل الموظفين بانهم مش قادرين يضحوا ويستحملوا الضغط لانهم في شركة كبيرة وان كل هم الموظفين حالياً هو الفطار والبريك وده اللي خلي الازمة تتجدد من كل اللي ما عجبهومش كلامه لان رد فعله كان غير مدورس تماماً وفردى وكلف الشركة كتير.

طيب رد الفعل الصحيح فى الأزمات دي ايه؟

أول خطوة هى اجتماع كل أقسام الشركة بما فيها فريق التسويق، فريق السوشيال ميديا وفريق خدمة العملاء للتفكير فى حلول للخروج من الأزمة.

طب أيه هي الخطوات اللي ممكن تتعمل للخروج من أزمات البيزنس؟

١- الإعتذار عن الأزمة ونشر بيان توضيحي لتوضيح تفاصيل الأزمة وخطوات حلها.

٢- تحديد متحدث رسمي واحد عن الشركة للتحدث عن كل تفاصيل الأزمة ويكون مدرك وملم بكل الأحداث.

٣- أكيد في أي أزمة بيبقي ليك مساندين زي ما بيبقي في معارضين لازم تستفيد منهم ومن أرآهم لتخفيف الضغط الواقع عليك.

٤- بمجرد حل الأزمة لازم تتعلم من التجربة لأن التعلم من أخطائك هو أفضل طريقة لضمان عدم تكرار الأزمة.

دي الخطوات الشهيرة والمتعارف عليها دلوقتي دوركم تشاركونا لو انتوا اصحاب قرار في اى أزمة من اللي اتكلمنا عنهم ايه هى الخطوات اللي ممكن تعملوها علشان تتجنب الوقوع في أزمات أو لحل أى أزمة طارئة.

شارك المقال :