إدارة الصراع بين فريق العمل داخل الشركة ....

مفيش حد عنده أى إعتراض إن فريق العمل هو أهم مكونات أى مشروع ناجح مهما كان حجم المشروع ورأس ماله ورغم كده كتير مننا بيغفل عن كيفية إدارة فرق العمل وبييمشيها بشكل عشوائى أو حتى على حسب هواه.

النهاردة هنكلم عن نقطة واحدة بس وهى إدارة الصراع بين فريق العمل. واحد هايسألنى يا كابتن محمد هو فيه حاجة اسمها صراع بين فريق العمل هو مش المفروض فريق العمل ده يبقى حاجة كده زى السمن على العسل والدنيا بالنسبة ليهم زى الإخوات وأكتر، أقولك طبعًا لأ لأنك بتدير بيزنس مش شلة أصحاب فلازم يبقى فيه صراع ناتج من حاجات كتير منها اختلاف وجهات النظر منها التنافس على الصدارة منها التملص من المسئولية وإلقائها على الآخرين وقت المشكلة وهكذا....

طيب لو فريق العمل اللى أنا بديره مفيهوش أى نوع من أنواع الصراع ده معناه إيه ؟ معناه ياسيدى إن عندك مشكلة كبيرة ألا وهى إن علاقة فريق العمل قلبت صحوبية جامدة جدًا وفى الحالة دى هيبقى عندك مشكلة ألا وهى إنهم هايجاملوا بعض وهايداروا على بعض على حساب الشغل .
يعنى إيه الكلام ده؟ يعنى إنهم هايجاملوا بعض لما أى واحد فيهم هايقدم اقتراح بدل مالمجموعة تناقشه مناقشة حقيقية وتطلع المشاكل اللى فيه وممكن ترفضه رفضًا تامًا هايبقى الموضوع مجاملات وبرافو عليك يا جميل واقتراح هايل حتى لو شايف إنه هايودى المشروع أو الشركة فى داهية بس هو خايف على زعل زميله أكتر من خوفه على مصلحة الشغل.

يعنى برضه لو أنا فى خدمة العملاء وجايلى عميل صاحبى بتاع المبيعات باعله بيعه غلط أو (نصب) عليه هاحاول إنى أفهم الشركة إن العميل هو اللى غلطان علشان صاحبين مايتإذيش مثلًا وده طبعًا هايأثر على سمعة الشركة.

وبتوصل أحيانًا إنى ممكن أنا كراجل عضو فى فريق المبيعات وعارف إن فيه مقابلة مع عميل دلؤقتى وعارف إن زميلى حالًا أهو المفروض يروحله بس زميلى فى الفريق قاعد على القهوة ومش هايروح للعميل ولما المدير يسأل عليه أروح أقوله ده راح للعميل والعميل كان مبسوط وبيفكر يتعاقد معانا كمان ....

الموضوع ده على فكرة أنا كنت بعمله بشكل طبيعى وكنت حاسس إن دى حاجة غلط لحد ماقريت فصل كامل عن الموضوع في كتاب ( الأخطاء الخمسة للمدير التنفيذى ) واللى أكدلى أهمية المنافسة إللى بتوصل للصراع المحموم جوا أى شركة أو فريق عمل.

اتكلمنا فى حلقة قبل كده عن ضرورة وجود منافسة وأحيانًا صراع داخل أى فريق عمل لكى يستفيد الفريق وتستفيد الشركة.

(ولكن يجب أن يتم إدارة الصراع بين فريق العمل بشكل جيد ومحترف ويضمن حد أدنى من العلاقات الشخصية المتبادلة بين أعضاء الفريق فى نفس الوقت يستفيد الفريق من هذا الصراع وعلى قائد فريق العمل أو صاحب البيزنس أن يلتزم ببعض التعليمات حتى يضمن ذلك وهى :

أولًا: لابد من وجود جو ودى خارج أجواء العمل زى مثلًا إنكوا كل أسبوع يبقى بتتغدوا مع بعض مرة أو بتلعبوا كورة أو أى نشاط رياضى مرة واحدة علشان نصلح ما يفسده الإختلافات فى الرأى أو الصراع .

ثانيًا: تحديد إختصاصات كل شخص Job Description والهيكل الإدارى والمستهدف له بدقة شديدة.

ثالثًا: تحديد شكل المحاسبة مسبقًا حتى لا يكون هناك افتعال لمواقف من المدير عند زيادة التوتر.

رابعًا: تحديد طريقة التواصل بين أعضاء فريق العمل يعنى هانتكلم بالميلات ولا بالورق ونمضى عليه ولا بإيه بالظبط؟

خامسًا: (أهم نقطه على الإطلاق ) من أكتر ما يفسد التنافس بين أعضاء فريق العمل ويخللى بينهم معركة عدائية هى تفضيل القائد لأحد أعضاء الفريق والانحياز له فى أى صراع وده بيخللى الأجواء متوترة تمامًا وأى محاولات لتقريب وجهات النظر بعيدة تمامًا عن مستهدفها.

وخللى بالك يا قائد الفريق أو مدير الشركة إن الناس بتفهم كويس قوى إذا كنت عادل ولا غير عادل فى التعامل مع فريق العمل أو موظفين شركتك وإنك لو غير عادل وحاولت تقول بالكلام غير كده الناس هانفهم وهاتعتبرك كذاب.

سادسًا: محاولة إدارة الإجتماعات بحرفية وعدم السماح لشخص أن ينتقد شخص ولكن ينتقد فكرته ولا يسفهها أو يتريق عليها ينقدها نقد موضوعى.

سابعًا: الإعلان عن المنافسات والمكافأت وكيفية الحصول عليها والإعلان عن الفائز بها وأسباب الفوز وقبل كل ده إحنا بنختار الفائز بناء على إيه.

وربنا يوفق الجميع ويقدركم على إدارة الصراع وتحقيق أففضل النتائج ليكوا ولفريق العمل بتاعكم