إرادة التغيير ..

- بعد ما فتحت الشركة ب 11 سنة وتحديداً سنة 2008 الشركة إتعرضت لأزمة مادية عنيفة لأسباب مختلفة إتجمعت في وقت واحد بعضها بسببى وبعضها خارج عن إرادتي وكنت فاكر إن أهم حاجة هو الحفاظ علي كيان الشركة وموظفينها اللي تعبت جداً في تجميعهم وتدريبهم وهما رأس المال الحقيقى .

- كانت الأولوية هى إن أول الشهر يعدى بأى شكل علي أمل إن الوضع يتحسن بعد كده سواء عن طريق بيع أصل من أصول الشركة ولما خلصت أصول الشركه بدأت فى أصولى الشخصية ولما خلصت دخلت فى سكة القروض .... وهكذا

- فى الوقت ده أكتر من حد كان بينصحنى بأهمية التغيير الجذري ومش لازم يبقى الأولوية فقط إن الشهر يعدى ورا الشهر طالما مفيش حاجة بتتغير وأنا مُصر على الذهاب فى طريق إتجاه واحد لحد ما فيه حد من أصحاب الخبرة حكالى قصة عن إن بعض الباحثين وضعوا ضفدع فى مياة ساخنة لدرجة الغليان فقفز منها فوراً وبعدين وضعوا نفس الضفدع بدرجة حرارة الغرفة وبدأو يسخنوا المياه ببطء شديد والضفدع مش حاسس بالتغيير لحد ما وصلت المياه لدرجة الغليان فمات الضفدع .

- فى الحالة الأولى المياه كانت بتغلى فالضفدع حس بيها كصدمة فقفز بسرعة وده أنقذ حياته وفى الحالة التانية جسم الضفدع تأقلم مع الإرتفاع التدريجى فى درجة الحرارة لحد ما مات وده اللى بيحصل لكتير مننا سواء على المستوى الشخصى أو على مستوى الشغل إننا بنتأقلم تدريجياً على الوضع السيء اللى في الآخر بيبقى السبب فى قتلنا أو إفلاسنا أو تعرضنا لمواقف قاسية جداً والحل إنك لازم متتأقلمش مع الوضع السيء تحت أى ظرف أو تحت أى مصلحة ولا تستسلم للوضع ده بأى شكل .

- النصيحة دى كانت السبب فى إنى آخد مواقف جذرية داخل الشركة واعتبرت إن الوضع السيء هيستمر على طول وبناء على الفرضية دى بدأت أتحرك فى كل حاجة سواء قفل فروع أو تخفيض عمالة أو خفض رواتب مع الوعد بالتعويض لما الأزمة تنتهى ( الحمد لله لما الأزمة انتهت الناس اتعوضت بأرقام أكتر من اللى انخفضت وبأثر رجعي )

- المهم إننا في وسط سلسلة إدارة البيزنس وقت الأزمات وهنبدأ نتكلم عن عيوب السوق وقت الأزمة وإزاى نتغلب عليها وبعد كده نتكلم عن مواصفات القائد أو صاحب العمل لكى يعبر الأزمة ... لو انت متبني موقف الضفدع المتكيف مع الظروف الصعبة وشايف إن كده كويس وليس في الإمكان أبدع من الإمكان أنصحك متكملش قراءه باقى السلسلة لأنك هتقرأ أى نصيحة على إنها غير عملية وغير قابلة للتطبيق على البيزنس بتاعك ... إنما لو عايز تستفيد من السلسلة لازم تكون حاد وجاد وحاسم فى التغيير لأنك ممكن تكون بتموت ببطء وانت مش عارف