FB Instagram Twitter Youtube Linkedin اسباب نجاح مندوب المبيعات | أكاديمية اعمل بيزنس
 
الرجوع الى المدونة

اسباب نجاح مندوب المبيعات

اسباب نجاح مندوب المبيعات

عنوان نجاحك في المبيعات.. نبرة صوتك

تخيل معايا اتنين من مندوبي المبيعات كلموك على التليفون وكل واحد فيهم بيحاول يقنعك تشتري المنتج بتاعه، الأولاني صوته عالي ولحوح وكل اللي هامه إنك تشتري وخلاص بغض النظر عن هل المنتج ده مفيد ليك فعلا أو لا، أما التاني مش بيضغط عليك وصوته هادي وبيسمع اللي بتقوله وبيوضحلك ازاي المنتج هيفيدك، أغلب الظن بعد التخيل ده انت هتختار تشتري من التاني والسبب هو انه عرف يطور معاك علاقة ويختار نبرة الصوت اللي تقنعك باللي بيقوله.

نبرة الصوت ممكن تعمل حاجة من اتنين، إما تقدر تستحوذ بيها على انتباه العملاء وتقنعهم باللي بتقوله أو إنك تحسسهم بالملل لدرجة تخليهم يناموا منك أو يبقو عايزين يقفلوا السكة في وشك عشان تنزل من على ودانهم، عشان كده نبرة الصوت مهمة جدا في عملية البيع وخاصة عبر التليفون لأنها بتكون الوسيلة اللي بترسم شخصيتك بيها من خلال وسيط غير مرئي زي التليفون، وفي غياب لغة الجسد تأثيرك هيتم بنسبة 9% بس من كلماتك، و91% هيكون من خلال لهجة ونبرة صوتك.

وعشان تقدر تجذب انتباه أي عميل في أول 4 ثواني، فالScript اللي معاك ونبرة الصوت اللي بتستخدمها لازم توصل من خلالهم 3 حاجات مهمة عشان تعرف تغلق الصفقة مع العميل المحتمل بنجاح في النهاية وهي إنك تكون:

1. واضح جدا في أي حاجة بتقولها، محدش هايبقى عايز يستمع لشخص مش مصدقه، وإذا كان العميل متشكك من اللي بتقوله فأنت في الحالة دي مش هتكون بتعمل حاجة غير تضييع وقته.

2. متحمس بشكل قوي للمنتج وعندك شغف بيه ومؤمن جدا باللي تقدمه، الحماس ده بيحسس العميل إن فيه عرض رائع انت هتقدمهوله.

3. خبير وشخص محل ثقة، ده بيوصل للعميل إنك مش مجرد رجل مبيعات بتحاول تبيعله منتج ولكن كمان صاحب سلطة، لأن كل واحد مننا بيتعلم من صغره يحترم ويستمع للأشخاص اللي بيمثلوا السلطة.

وعشان تتقن فن البيع، فلازم كل كلمة ترتبط بنبرة صوتية قوية وخفية تفضل معلقة في ذهن العميل على المستوى العاطفي، وطبعا مفيش نبرة صوت واحدة تقدر تستخدمها مع كل المواقف والأشخاص، لكن في إطار عام ممكن تكيفه على أنواع مختلفة من الشخصيات وده هتتقنه لما هتعرف:

• تستخدم طبقة صوتك صح
النساء عادة طبقات صوتهم بتكون أعلى من الرجال، وبغض النظر عن طبيعة طبقة صوتك فيه غلط بيقع فيه كتير من الناس وأنهم مش بينوعوا من طبقة صوتهم وهما بيتكلموا وده بيخليهم مملين، وبتبقى من أسرع الطرق اللي ممكن تخسر بيها العلاقة مع العميل.

ولجذب الانتباه بيكون من الأفضل إنك دايما تغير من طبقة صوتك في أجزاء معينة من الجملة عشان تنقل الحماس والإثارة للعميل بغض النظر عن الموضوع اللي بتتكلم فيه.

على سبيل المثال، استخدم طبقة صوت عالية للكلمات الرئيسية في الجملة زي مثلا أما تقول "مساء الخير، أنا أحمد رفعت من أكاديمية إعمل بيزنس" فلما تيجي تنطق أكاديمية اعمل ييزنس استخدم طبقة صوت أعلى.

برده لازم تعرف تتحكم في طبقة صوتك سواء عالية أو منخفضة في وقتها الصح، لو بتطرح سؤال ابتدي بشكل تدريجي تعلي من طبقة صوتك، لأن عادة الأسئلة الساخرة والتهكمية الطبقة الصوتية اللي بتُستخدم فيها بتكون منخفضة.

• تستخدم مستوى الصوت المناسب اللي يظهرك كشخص واضح ومحل ثقة.
أول حاجة العميل المحتمل هيلاحظها هي مدى علو صوتك وانت بتتكلم، لو كنت بتتكلم بهدوء فالعميل ممكن يفسرها على إنك مش واثق في اللي بتقوله وإنك خايف ومتوتر، وأسوأ حاجة ممكن تحصل إن العميل المحتمل كل شوية يقولك "إيه بتقول إيه" لأن ده معناه إنك خسرت العميل خلاص.

في المقابل الصريخ في العميل المحتمل والكلام بصوت عالي ده ممكن يحسسه إنك هجومي أو عدواني، عشان كده في نقطة لطيفة في النص بحيث تتكلم بصوت أعلى شوية عن المتوسط، ده هيضمن إن كل كلمة هتقولها هتتسمع كويس وهتظهرلك على إنك واثق في نفسك ومتحكم في اللي بتقوله وصاحب سلطة.

• تستخدم السرعة والإيقاع المناسب
تخيل إنك بترد على التليفون ولقيت واحد بيقولك: " مساء الخير آآااااااا.. أنا أحمد وحضرتك متعرفنيش بس أنا آااااااااااا.. بتصل من شركة كذا، ممكن أخد آااااااااااا دقيقة من وقت حضرتك".

لو الجملة دي كانت مؤذية وانت بتقراها، فتخيل وضع العميل المحتمل لما بيسمع الصوت المتردد ده في التليفون؟

عشان كده سرعة وإيقاع الصوت عامل مهم في طريقة استقبال العميل المحتمل لعرض البيع بتاعك، لو بتتكلم بسرعة أعلى من المتوسط فالعميل ممكن يترجم ده على إنك مش عارف المنتج اللي بتتكلم عليه كويس بمعنى إنك "بتقلبه" ولو ده فعلا صحيح، ليه لازم يحط ثقته فيك؟

وفي نفس الوقت لو اتكلمت ببطء ده مش هيخلي العميل يفهم اللي بتقوله، فبيكون الحل الأمثل إنك تتكلم بسرعة فوق المتوسط بشوية بس مش لدرجة إن الكلمات والمعنى بتاعها يطير ولكن يكون سريع كفاية بحيث تتسمع كويس وتظهر كشخص واثق وذكي.

• النص المكتوب Script
كل عملية بيع هتقوم بيها مش هتمشي كلها في سكة واحدة، لكن لما بتستخدم Script لكل مرحلة من عملية البيع ده هيخلي عندك يقين تام بكل حاجة ممكن تحصل في أي موقف، هدف الScript هو انك تكتب بشكل مسبق رد على أي اعتراض أو استفسار ممكن العميل المحتمل يفكر فيه.

والscript هيساعدك أثناء التدريب على إتقان نبرة الصوت الصح اللي لازم تستخدمها مع كل كلمة وجملة، ولازم تراعي وانت بتدرب إن ميبنش إنك بتقرأ من ورقة مكتوبة قدامك ونبرة الصوت هي اللي هتساعدك في كده، عشان كده اعرف انك لو قدرت تظبط نبرة صوتك مع الكلام المكتوب صح، هتعرف تغلق البيعة بنجاح في النهاية.