أحمد عرفات شاب عنده 33 سنة حاصل على دبلوم التلمذة الصناعية .. أول ما خلص دراسته اشتغل فى أكثر من مهنة لكنه اتمرد عليهم جميعا وبدأ فى تكوين مشروع خاص وبعد تفكير عميق قرر تقديم خدمات الانترنت والكمبيوتر للشارع اللى عايش فيه وبدأ فى التوسع بشكل تدريجى وقدر انه يقف على رجله وبقى بيضمن دخل مادى بيزيد مع مرور الوقت .

صمم أحمد على انه ينجح أكثر من كده وتخطى الحدود المحلية فإتعلم اللغة الانجليزية لدرجة الإتقان بنسبة كبيرة وفتح شركة استيراد وتصدير وأول حاجة كانت هتقضى على حلمه هو الروتين اللى واجهه عشان يفتح الشركة دى .. إلا أنه صمم بدون يأس لغاية لما أسسها فعلًا، وعن طريق الانترنت قدر إنه ينفذ أول صفقة تصدير إلى دولة أوكرانيا فعلا سافر لمدينة لفيف غرب أوكرانيا عشان يتطمن على سير العمل، وهناك جاتله فرصة للعمل في فرنسا وفعلا سافر لباريس في زيارة سريعة للاتفاق على عقود جديدة .

أحمد بيحلم إنه يفتح فروع لشركته في جميع دول العالم وانه يغرق جميع الأسواق التصديرية بالمنتجات المحلية اللى بتشتهر بيها مصر، ورغم الصعوبات اللى واجهها أحمد إلا إن مجال التصدير هيكون هو الانطلاقة الحقيقية له فى عالم البيزنس .

ربنا يوفقه ويوفق كل شاب أخد خطوة إيجابية