يوم الأحد اللى فات قناة صدى البلد ذاعت مباراة لكرة اليد بين الأهلي والزمالك في قمة الدوري المصري ... أنا شخصياً دورت على القناة باعتباري محترف قديم لكرة اليد وفتحتها يمكن لأول مره أنا وغيري والمشاهدات عليها كانت ضخمة جداً ... القناة عملت حاجة ظريفة جداً جابت مشاهدات كتير وعملت إعلانات وكسبت فلوس أو مشاهدات بإنها دورت على حاجة محدش شايفها خالص واشتغلت عليها ... يعني مثلاً لو اللي بيتابع كرة القدم في مصر 50 مليون واللي بيتابع كرة اليد 5 مليون بس لو حد ذاع ماتشات كرة اليد اياخد ال 5 مليون كلهم بينما ال 50 مليون دول عليهم منافسه ضخمة جداً وسعرهم عالي جداً ...

إيه اللي أنا عايز أقوله ؟؟؟

عايز أقول إن فيه سوق بيبقى عليه منافسة شديدة جداً ومكسبه في النهايه نتيجة المنافسة بيبقى بسيط وفيه سوق مستخبي ومكسبه ضخم

تعرف ليه الراجل اللي بياخد منك الأوردر بيقعد يقولك مش عايز بطاطس زيادة أو مش عايز رز زيادة ؟ .. لأن الناس كلها بتعرف سعر الساندوتش وبتقارن بينه وبين المطاعم التانية ومكسبه بيبقي مش كبير بينما طبق البطاطس الزيادة أو الرز الزيادة مكسبه فوق ال 100% لأن تكلفته بسيطة ومحدش بياخد باله من سعره .... البطاطس أو الرز هنا هو السوق المخفى اللى محدش بيتنافس فيه كتير ومحدش بياخد باله من سعره بس بيعمل مكسب أكتر من السوق الأصلي

كنا اتكلمنا في حلقات التسويق عن قصة كوكاكولا في التمانينيات لما عيّنوا مدير جديد وسألهم جسم الإنسان بياخد كام لتر مياه فقالوله ممكن 14 لتر في اليوم .. طيب ممكن يشرب كام لتر مياه غازية قالوله 2 لتر ... فرد عليهم يعني احنا وبيبسي مقطّعين بعض منافسة على 2 لتر وسايبين 12 لتر وخد قرار ينتج مياه صحية داساني ومشروبات للطاقة ومشروبات كحولية وأي سوائل بتدخل جسم الإنسان ... هو كده ساب السوق الأصلي اللي هو 2 لتر وفيه منافسة شرسة ومكسبه قليل وراح لسوق مخفي محدش واخد باله منه ولعب فيه براحته ...

كل واحد فينا ممكن يدور على سوق مختفي بدل ما عقله مركز بس على سوق واحد الكل بيتنافس عليه