الأرضية

الأرضية ..... عارف يعنى إيه تسيب أرضية للعميل ؟؟

فيه أنواع من البيزنس بتضطر إنك تبيع للعميل بمبلغ معين (مثلا 10 ألاف ج) أجل يعنى مش كاش ولما تيجى تحصل منه فلوسك القديمة بتديله بضاعة جديدة (يعني يقولك وإنت جاى تاخد الفلوس هاتلى بضاعة ب10 ألاف ج برضه) وبكده فيه مبلغ متجمد دايمًا عند العميل ده وبنسميه فى مصر ( أرضية ) وأحيانًا فرشة ( التسمية دى أقل ) وده معناها إنك طول مانت بتورد للعميل ده العميل هايفضل منتظم معاك لو وقفت البضاعة عنه غالبًا ما بيبدأ يماطلك فى سداد ال10 ألاف ج دول .... وعلشان أكتر من حد لقيته عنده المشكله دى ولأنى إقترحت على بعض الناس إقتراحات وجابت نتيجة ولأن نظام الشغل فى كتير من الصناعات بيعتمد على السداد المؤجل مش الكاش هانقول بعض الملاحظات ....

1- لازم تكون فاهم طبيعة البيزنس اللى إنت داخل فيه مينفعشى تدخل مجال أجل وفاكره إنه كاش .

2- لو عايز تحول العميل من أجل لكاش يبقى من الأول مش بعد ما تبدأ معاه (عميلك على ما تعوده)

3- لو عايز تشتغل فى صناعة بتتعامل بالأجل وعايز إنت تشتغل بالكاش يبقى لازم تقدم ميزة رهيبة .... يعني سعر قليل جدًا مثلًا.

4- لو هاتشتغل أجل زى باقي السوق يبقى لازم تشترى أجل وتبيع أجل ماينفعشى تشترى كاش وتبيع أجل وإلا محتاج بنك وراك يمول عملائك ولما فلوسك تخلص مش هاتعرف تجيب بضاعة تانية ولا هاتعرف تحصل القديم .

5- لازم تضمن فلوسك بطريقين طريق قانونى بشيكات بنكية (وصولات أمانة وما إلى ذلك مش ضمان) وكمان يبقى عميل سمعته محترمة (مش أى حد معاه دفتر شيكات بنكية ونازل من عربية جامدة يبقى أمين :) ) .

6- لازم يبقى عندك قسم تحصيل عالى قوى ( ممكن واحد على الأقل ) حد يبقي ذكى وبيفهم ويعرف يقدر الموقف وكمان يديلك إنطباعه عن العملاء لأنه هايبقي بيزورهم بشكل يومى ولازم تساعده يعنى لو عميل اشتكى منه تفهمه انه بيطلب حقه وإن الشركاء معينينه علشان يلم فلوس الشركة وإنك مزنوق وبرضه تخليه هو يضرب وانت تلاقى انما متقلوش مثلًا خلاص مش هابعتهولك تانى فهمه إنه أمر واقع وإنه بيمثلك (لازم تختار شخص كويس وتديله عمولة وتفهمه كويس يعمل إيه وتديله مستهدف ) .

7- لازم تكسب من العميل كويس قوى يعني متقليش أنا بدى أسعار كويسة طبعًا أسعار كويسة فى الكاش إنما الأجل لازم يكون فيه مكسب كبير يغطى إمكانية فقد الفلوس .

8- لازم ربحك من العميل اللى خد بضاعة ب10 ألاف ج مايقلش عن ألف ج فى الشهر علشان بعد 10 شهور يبقى إنت مشغله بالمكسب .

9- لازم الموردين بتوعك يبقوا متطمنينلك وممكن كل شوية تقعد معاهم توريهم الشيكات اللى معاك وتعيشهم فى الصورة علشان لو حصلت وقعة على السوق كله يشيلوك .

10- رأسمالك بتخليه علشان الصرف على تشغيل مكتبك والتسويق له وعلشان لو جه عليك شيك وإنت لسه محصلتوش وكمان لو فيه بضاعة وقعت قدامك بسعر محروق تشتريها وتكسب فيها مكسب كبير .

كل النصايح دى علشان تشتغل أجل لو مش هاتعرف تطبقها يبقى ماتشتغلشى فى الصناعة دى شوف حاجة تانية ..

وربنا يرزق الجميع