البنك 2

بمناسبة إعلانات البنوك اللي شغاله دلؤقتي واللي فيها محمدين بياخد قرض وبينجح ويكسر الدنيا وده النموذج الإيجابي وحسنين بيشتغل في وظيفة والدنيا بتبهدله ويبقي فاشل ويندم علي الفرص اللي بتعدي منه وده بيقدم علي إنه نموذج سلبي أحب أقول شوية نقط :-

أولاً مين اللي قال إن كلنا لازم نفتح شركات ونسيب الوظائف ؟

طيب ما فيه ناس معندهاش الإمكانيات المادية أو النفسية وفيه ناس ربنا يسر لها إنها تكون في أماكن وظيفية مرموقة ونجاح مادي ومعنوي من غير ما يبقوا أصحاب شركات وعلشان كده 85% من المشروعات الناشئة بتقفل خلال 18 شهر لأن اللي بيقبل علي فتح الشركة مؤهل جدا كموظف وغير مؤهل كصاحب عمل

ثانياً مين اللي قال إننا علشان نعمل بيزنس لازم نكون أصحاب البيزنس فقط ؟

طيب ما انت كشريك في شركة أو كمدير لشركة او قائد لفريق عمل أو موظف في بداية طريقك مانت بتعمل بيزنس أو علي الأقل بتساهم في نجاحه بمجهودك وكفائتك .

ثالثاً إنك تكون صاحب مهنة محترف فاهم لشغلك ومتقن لوظيفتك أفضل 100 مرة من إنك تكون صاحب مشروع فاشل نهايته إنه بيقفل مشروعه أو يبدد مدخراته أو لا قدر الله يكون مصيرة السجن ....فالأصل هو النجاح في عملك أيا كانت صورته مش تحقيق صورة معينة أيا كان مصيرك بعد تحقيق الصورة دي .

رابعاً الضغط علي الناس بالإعلانات علشان تروح تاخد قرض دون تأهيل زي ما أخدك من إيدك وأرميك في البحر وانت ما بتعرفش تعوم غالبا هاتغرق أو حد ينقذك في أخر لحظة وده الفرق بين الإعلانات ومشروعنا هنا في إعمل بيزنس ....في الإعلانات بيخاطب فيك عنصر واحد فقط للنجاح وهو الدافع لكننا في مشروع إعمل بيزنس بنحاول ننمي الدافع والمهارات والعلم اللي هما ال 3 أضلاع للنجاح ...يعني لو عندك الدافع بس يبقي زي ما حد يديلك بندقية ويسخنك علي الصيد بدون تمرين ساعتها هاتقتل حد أو تجرح حد وممكن يكون الشخص ده هو انت .

خامساً التعامل مع البنك خصوصا في القروض عملية معقدة جداً ولا يقدر عليها إلا شركات ضخمه لأنها بتحتاج إمكانيات محاسبية معقدة وكمان بتعمل ضغط نفسي رهيب بيخليك تاخد قرارات غلط وبتبقي محتاج لإمكانيات نفسية ضخمه وبالذات في مصر لأن البنوك في مصر في حالة عدم السداد بتسعي إنها تسجنك انت والضامن مش زي أي مكان في العالم تخسر المشروع مثلا ..لأ السجن وده لأنها بتأمن علي 50% من قرضك علي حسابك برضة وعلشان البنك يقبض التأمين لازم يقدم لشركة ضمان المخاطر إثبات إنه سجنك وبكده مفيش أمل يحصل الفلوس منك ...وعلشان كده لا ينصح إنك تاخد قرض وتبدأ بيه مشروع لأنك بتزود علي نفسك مخاطر إضافة للمخاطر الطبيعية الناتجة عن المنافسة وسوء الإدارة وتقلب السوق .عموما أتمني ألا ننساق وراء الإعلانات وناخد قرارات مصيرية لأن الموضوع مش وردي ولازم نفكر بشكل أعمق ونضع المخاطر أمام أعيننا ونعرف إن الموضوع خطير جدا

وربنا يوفق الجميع للنجاح بكل صورة وليست بصورة واحدة فقط