البوكيمون

اتكلمنا قبل كده عن مشروعات كبيرة فى العالم دلوقتى بتقوم على فكرة بتخدم احتياج الناس عن طريق استخدام تطبيق أو موقع وازاى ان تعلم لغات البرمجة للأطفال أصبح ضرورة مُلحة مع انتشار بيزنس التطبيقات بشكل كبير .

هنتكلم النهاردة عن لعبة البوكيمون واللى انتشرت انتشار غير عادى فى العالم كله واللى بتعتبر من صناعة الترفيه والألعاب الالكترونية .

جون هانك، الرئيس التنفيذي ومؤسس شركة Niantic الشركة المنتجة للعبة كان مؤسس لأحد الشركات اللى اشترتها جوجل عشان تنتج بعد كده Google Earth بالاضافة كمان انه كان ليه بصمات على برنامج خرائط جوجل Google Maps قبل انشاؤه لشركة Niantic واللى انفصلت عن جوجل سنة 2015 .

فكرة اللعبة باختصار تعتمد على التحرك من خلال خريطة حقيقية ودقيقة جداً مستفيدين طبعاً من خبرة سنين طويلة من العمل على Google Earth و Google Map والوصول لأهداف متحددة للبحث عن البوكيمون ومع بداية اطلاق اللعبة من أسبوع وصل عدد المشتركين لغاية كتابة البوست أكتر من 7.5 مليون مشترك وسبب وصول المشتركين للرقم ده ان المشتركين نفسهم بيضيفوا أماكن للعبة وبالتالى أصبح المستخدم مش مجرد لاعب بيتخطى مراحل لأ .. ده بيوجد أماكن جديدة وبيضيفها لاعدادات اللعبة عن طريق مشرفى اللعبة واللى وافقوا على أكتر من 5 مليون مكان لحد دلوقتى ( فى استراليا فقط ) فى خلال سنتين ونص .

النهاردة وصلت قيمة اللعبة السوقية وصلت ل7.5 مليار دولار ورفعت من أسهم شركة Niantic للألعاب بنسبة 9.3 % بعد أسبوع واحد من اطلاقها ولسة الرقم فى زيادة ومحدش عارف ممكن يستقر عند كام ..

الحاجة اللى نقدر نطلع بيها ان مصممين اللعبة اشتغلوا فترة كبيرة فى جوجل على تطوير برامج متخصصة ساعدتهم بعد كده على ابتكار فكرة لعبة جديدة وده اللى دايماً بنتكلم عنه وهو انك ما تبدأش بيزنس اللى لما تكون عندك الخبرة الكافية فى مجالك واللى تسمحلك انك تبتكر فكرة جديدة بالكامل من خلال تخصصك أو خبرتك .

تقدر تخرجك أفكارك للنور من خلال برمجتها بشكل سهل وبيقدم خدمة للناس تسهل عليهم حياتهم أو حتى تقدملهم الترفيه أو أى احتياج انسانى تانى بالاضافة الى معرفة بالتسويق ودراسة سوق محترمة وشغل كتيرعلى الفكرة وتطوير ليها لغاية أما توصل للنجاح المطلوب وربنا يوفق الجميع