ما هو التسويق الشبكي ؟

تعالي نتعرف علي حكاية التسويق الشبكي ديه، من حوالي 8 سنين مع بداية ظهور نماذج جديدة للشركات في السوق لقيت في يوم تليفون جايلي من شخص كان بيدرس معايا في نفس المدرسة اتقطع ما بينا التواصل من زمن بعيد قوي لدرجة أني مكنتش عارف افتكره كويس في بداية المكالمة.

المهم بعد ما افتكرته وتبادلنا حديث سريع عن أحوالنا وأوضاعنا لقيته بيقولي أنه بيكلمني بخصوص فرصة استثمارية مربحة وأن العائد بتاعها ممكن يوصل لأكثر من 400%، طبعاً أنا اندهشت من الرقم وقولتله أني مهتم أني أسمع أكثرن فبناءً على اهتمامي طلب مني أننا نتقابل في كافيه مشهور.

وفي يوم المقابلة وصلت الكافيه قبل معادي وانتظرته شويه بعد كده لقيته وصل وبيسلم على أكثر من شخص في الكافيه وبيدعوهم أنهم ينضموا لينا في اجتماعنا.

وبعد ما جمعنا وقعدت مع ناس أنا أول مره أشوفها، بدأ الراجل ده كلامه بأنه جاي بفرصة استثمارية ممكن تخلينا نحقق ثروة في وقت قياسي وأن المشروع ده عبارة عن أننا بنشتري منتج من شركة معينه وبعد كده بننضم لفريق عمل الشركة في التسويق الشبكي وأننا بنتحول من مجرد عملاء لأشخاص بيكون المطلوب منهم أنهم يجيبوا ناس جداد يشتروا نفس المنتج ده، وأن الناس اللي هنجيبها يجيبوا ناس تانيين لحد ما نوصل لشكل شجرة من المشتريين بيجيبوا ناس جديدة ومع كل عميل بيشتري أنا بكسب فلوس من غير ما اعمل أي مجهود.

أنا من واقع شغلي ومقابلتي لنماذج مشابهه أبديت عدم اهتمامي بالموضوع وأني مش شايف من وراه عائد مفيد ليا وطبعاً في ناس تانيه اقتنعت وقررت أنها تشتري وتستثمر مبلغ مالي كبير في التسويق الشبكي.

النتيجة كانت إيه ؟

من حوالي أسبوع قابلت واحد من الناس دول صدفة وسلمت عليه وفكرته أنا مين وسألته أيه مشروع التسويق الشبكي، وكان الرد منه كالآتي (بعد ما اشتريت بشهر ومحاولاتي المستمرة أني أجيب ناس جديدة حسيت أني فعلاً أتضحك عليا وأن فلوسي دي راحت في الأرض) فقلتله طب والمنتج ما استفدتش منه فكان رده أن المنتج كان عبارة عن ساعة عادية جداً محستش بفرق ما بينها وما بين الساعات التانيه الموجودة في السوق وأنها باظت من فتره وبطل يستخدمها.

الموقف اللي أنا حكيته ليك دلوقتي هو عبارة عن تطبيق خاطئ لنوع من أنجح الأنواع في التسويق وهو التسويق الشبكي والنوع ده بيكون عبارة عن تحويل العميل من مجرد مشتري لشخص بيسوّق لعلامتك التجارية وبيدعمها وبيدافع عنها ومن واقع التجارب اللي تمت في الدول الأجنبية تبين أن

عشان تنجح في التسويق الشبكي عليك بالآتي:

1. لازم يكون عندك منتج أو خدمة جيدة وسعرها منافس في السوق، ولازم تشرح المنتج كويس جدا، ولازم تشرح السيستم وتجيب عميل فعلا محتاج المنتج وهيجربه وهيبدأ يسوقله مش بس واحد عاوز يكسب فلوس وخلاص وفي الاخر هو مش عارف المنتج ولا مقتنع بيه لان التسويق الشبكي من اهدفه بناء قاعدة عملاء مستمرة.

ومهم جدا أنك تطمن العميل وتديله أحساس بالمصداقية زي أنك تعرفه عمر الشركة وبيانات عنها وهل المنتجات اللي بتقدمها هي فعلاً منتجات أو خدمات ممتازة يستخدمها المستهلك ولا لأ، وكمان خطة الدفع وإزاي هيحصل على فلوسه وهل الشركة هتديله تدريب على بيع المنتج ده ولا لاء.

2. لازم تكون فاهم قبل تطبيق التسويق الشبكي في شركتك أن ده عبارة عن أليه تسويقية زيها زي الدعاية وأن الهدف منها أنها تساعد على زيادة البيع يعني لازم يكون المنتج اللي بتقدمه فعلاً مفيد وقابل للاستخدام ولو منتج طويل الأجل لازم يكون ليه خدمات ما بعد البيع وخدمات صيانة.

3. من أهم الحاجات اللي لازم تعملها عشان تنجح في التسويق الشبكي أنك تخصص قسم في الحسابات للجزئية دي، وتجاهل الجزئية دي بيعتبر من الأخطاء الشائعة اللي بتقع فيها الشركات اللي بتستخدم النوع ده من التسويق لأن مزج حسابات المسوقين مع باقي الحسابات بيتسبب في لخبطه بتسبب مشاكل في توريد الفلوس للعملاء.

4. فهم العملاء دايماً أن دي مش وظيفة بدوام كامل وأنهم مينفعش يسيبوا شغلهم الرئيسي عشان يشتغلوا معاك إلا بعد ما يتأكدوا أن الشركة مستقرة، وأن الدخل اللي يحققوه يساوي أو أكبر من الدخل اللي بيحققوه من شغلهم الرئيسي عشان ما يجوش بعد كده يتهموك بالنصب في حين أن هما اللي مكنش عندهم مهارة البيع لان التسويق الشبكي استثمار زي اي استثمار معرض للخسارة أو الربح.

5. مهم جدا أن العملاء يدعموا بعضهم البعض يعني يساعدوا بعض على وضع خطة تسويقية، وتديهم الأدوات اللي هيستخدموها عشان يتواصلوا مع بعض في أي وقت وأنك توفر ليهم مساعدة من داخل الشركة زي خدمة عملاء مخصصة ليهم.

سؤال بيتردد كتير علي صفحة إعمل بيزنس عن التسويق الشبكي والفوركس

وده الرد بكل وضوح

أولا بالنسبه للتسويق الشبكي

كان فيه زمان حكاية كده إن تاجر عايز يشتري 10 ألاف عده نوكيا 6110 واللي هايجيبهم هيكسب في القطعة 1000ج يعني 10 مليون ج في عمليه واحده وأنا في الوقت ده كان تجارة الموبيل من ضمن أنشطتي ومع ذلك ولا كأني سمعت بيها وكل يوم يقابلني 20 واحد سابوا كل حاجه في الدنيا علشان يكسبوا ال10 مليون في خبطه واحده وطبعا محدش كسب حاجه (الموضوع طلع إن الشركه الوكيله عايزه تعرف مين اللي بيجيب العدد المهربه فحتي اللي كان هايلاقي العدد غالبا كان هيتقبض على.

ثانيا الفوركس

المشكلة إن اللي بيسوق في مصر فوركس شركات غير قانونيه وشركات تداول بتكسب من التداولات سواء العميل كسب أو خسر وهي دي المشكلة إن الشركات بتشجع الشباب إنهم يدخلوا سوق العملات بلا خبره فبيخسروا 100% من رأس مالهم والشركات بتطلع عامله عمولات كويسه وحتي لو كسبت في شهر 100% ممكن تخسر في اللي بعده اللي كسبته وكمان رأس مالك وحتي لو كسبت وجيت تسحب بتطلع الشركات نصابه وبترفض السحب وطبعا انت مش هتروح تشتكي لأنه نشاط أصلا غير قانوني.

من الآخر يا جماعه متخلوش حد يعمل عليكوا شغل وابعدوا عن النشاطين دول الأول علشان نصب والتاني علشان المكسب فيه صعب جدا جدا وعن تجربه.