التسويق بالكواليس

التسويق بالكواليس.. ورا كل بيزنس حكاية

في سنة 2001 قناة ديسكفري الأمريكية بدأت تبث برنامج تلفزيوني وثائقي بعنوان How it's made 1، والبرنامج كان بيتناول مراحل صناعة أي منتج بنشوفه حولينا، زي الآيس كريم والعربيات وحتى اللاب توب!

والبرنامج عمل نجاح كبير وشعبية واسعة على مستوى العالم، ووصل عدد الحلقات بتاعتة لـ 405 حلقة واتعملهم دبلجة لعدة لغات تانية وكان من بينهم اللغة العربية، والنجاح اللي حققه البرنامج ده دليل قوي على أهمية الـ behind the scene marketing أو التسويق بالكواليس.

واللي بتعتمد عليه شركات كتير أبرزهم شركة "أدوبي" اللي عملت على المدونة بتاعتها تصنيف تحت اسم Adobe Life، وكان القسم ده مخصص للموظفين في الشركة على مستوى العالم بيحكوا فيه عن طبيعة مهاهم، وعشان تشجع الموظفين أكتر على المشاركة، أطلقوا هاشتاج #AdobeLife عشان كل موظف في الشركة يكتب خواطره ويشارك صور من حياته في الشغل.

طيب تعالوا نشوف إيه المزايا اللي ممكن يحققها التسويق بالكواليس للبزنس بتاعك:

1. بيخلق طابع إنساني لشركتك، وبيظهرها في صورة مرحة وطريفة، وبيعمل روابط أعمق وأكثر عاطفية بينك وبين العملاء؛ وده لأن الناس بيفضلوا التعامل مع أشخاص على التعامل مع شركة أو مصنع.

2. بيشجع جمهورك على المشاركة والتفاعل وكمان دراسات التسويق بتقول إن استخدام الصور الحقيقية في الدعايا بيكون أكثر فاعلية بنسبة 95% من استخدام الصور التجارية.

3. كمان تطبيقه سهل جدًا وبأقل الإمكانيات يعني مش هيكلف شركتك موارد كتير خصوصًا لو كنت صاحب شركة ناشئة، يعني ممكن صورة أو فيديو بموبايل و(تويته) أو بوست على السوشيال ميديا يأدي الغرض.

ودي بعض الطرق السهلة اللي ممكن أي شركة -أيًا كان حجمها أو طبيعة نشاطها -تستخدمها في التسويق بالكواليس:

1. احكي قصص عن شغلك: الناس بتحب القصص، وكل منتج له تفاصيله اللي بتميزه عن غيره، فانت ممكن مثلًا تسلط الضوء على أحد مراحل التصنيع أو أحد الأقسام في شركتك، وممكن تجيب موظف مختص يشرح طبيعة العمل في المرحلة دي أو القسم، وتصوره فيديو وده هيخلي الناس تتفاعل معاك أكتر ويهتموا بمنتجك.

2. انقل آخر أخبارك: زي افتتاح مكتب جديد، أو تكريم أحد الموظفين شاطر، أو حتى انجاز صغير في أحد الأقسام في شركتك، ومهم جدًا تشارك الحاجات دي مع جمهورك مهما كانت صغيرة؛ لأنها بتحمل دلالة على إن شركتك بحالة "صحية" جيدة وماشية في طريق النجاح.

3. اظهر روح الفريق: فكر في طبيعة العميل اللي بتستهدفه وحاول تبرز الجانب اللي ممكن يعجبه في شخصية شركتك، كمان حاول تخليك صادق مش مصطنع، ولو انعكس لجمهورك صورة عن بيئة العمل في شركتك وأنها بيئة تسودها روح الأسرة، هيتولد عندهم شعورٌ بالطمأنينة وأنهم في أيد أشخاص بيحبوا شغلهم.

4. خليك مرح: احصائيات التسويق بتقول إن المحتوى الطريف بيجي ضمن قائمة أكثر ثلاثة أنواع من المحتوى اللي بتشجع المتابعين على التفاعل، بالتالي ممكن تشارك موقف طريف حصل في شركتك وحاول تستخدم حس الفكاهة في منشوراتك على مواقع التواصل الاجتماعي لتعمق صلتك بجمهورك وتشجعهم على التفاعل.

5. شارك محتوى شخصي: حاول تعرف جمهورك عليك وعلى فريق عملك من خلال مشاركة الأخبار السعيدة التي بتمروا بيها زي زواج موظف في شركتك، أو قدوم مولود جديد، أو ترقية موظف ...إلخ، كمان اعمل للموظفين Tag في المنشورات دي عشان يحسوا بالتقدير وتخلق روابط بينهم وبين جمهورك

6. استغل خبراءك: كل مجال عمل فيه متخصصين، ممكن تستضف أحد المتخصصين في شركتك سواء كان (مبرمج-مهندس... إلخ) وتسجل لقاء معاه، وتنشره على مواقع التواصل الاجتماعي، وده هيعمق الصلة بينك وبين الجمهور وهيشجعهم على طرح الأسئلة عن منتجك عشان يجاوب عليها الضيف المتخصص، كمان دي هتكون فرصة كويسة لدمج التسويق بالكواليس مع التسويق الداخلي Inbound Marketing.

في النهاية كل الأفكار دي ممكن تطرحها في أشكال كتيرة، سواء تويتات أو صور أو فيديوهات ...إلخ، وده متوقف على الـ platform أو المنصة اللي بتخاطب جمهورك من خلالها، أهم حاجة في الموضوع البساطة وإنك تكون حقيقي مش fake أو مبتزل ساعتها هتسيطر على قلب وعقل جمهورك.