دور المرأة في وقتنا الحالي ليها تأثير كبير جدا في عملية الشراء، وده لأنها بتتحكم في حوالي 20 تريليون دولار كل سنة كنفقات استهلاكية على حسب موقع Inc.com، وكل ده خلى رجال التسويق يدوروا على طرق واستراتيجيات تساعد الشركات على إنها تخاطب المرأة بأفضل طريقة ممكنة بما إنها المسيطر الأول على القرارات الخاصة بعملية التسوق والشراء بنسبة 85% سواء بشكل مباشر أو غير مباشر.

اختار الاستراتيجية المناسبة في التسويق

وعشان كده ظهرت استراتيجية في التسويق اسمها التسويق الوردي Pink Marketing وهي استراتيجية بتستهدف النساء بشكل خاص وده باستخدام طرق تجذب المرأة بشكل أكبر من الرجل، وده عشان المرأة ليها سيكولوجية بتختلف عن الرجل وبالتالي الأسباب اللي هتخليها تشتري منتج معين بتختلف عن الأسباب اللي هتخلي الرجل يشتري نفس المنتج، فعلى سبيل المثال:

- النساء مثلا بيركزوا على التفاصيل والمعلومات بشكل أكبر من الرجل وعشان كده لو منتجاتك موجهة للمرأة حاول دايما تكتب كل التفاصيل المتاحة عن منتجك.

- على حسب دراسة قامت بيها وكالة تورنتو الاستشارية عن الاختلاف في الطريقة اللي بيتفاعل بيها الرجال والنساء على تجربة التسوق، لقت إن الرجل بيركز اكتر على العناصر المادية زي وجود جراج لسيارته وان المنتجات اللي عايزها تكون موجودة في المحل، وده على عكس النساء اللي بيهتموا أكتر بطريقة تعامل موظف المبيعات معاهم وديكور وتصميم المحل مثلا.

- المرأة بتركز أكتر على الجانب العاطفي اللي بيمثله المنتج في الوقت اللي الرجل بيركز أكتر على الجانب العقلاني والمنطقي.

- الرجال دايما بيركزوا هل ممكن المنتج يتم اعتباره أنثوي ولا لا وده حتى لو كان مفيد بالنسبالهم، على عكس المرأة اللي مش بيهمها تحديد الجنس الموجه له المنتج.

- المرأة ممكن تاخد وقت أطول من الرجل عشان تقرر تشتري أي منتج، إنما الرجل عادة أول ما بيلاقي المواصفات اللي عايزها في المنتج بيشتريها.

ولو كنت بتقدم منتجات بتستهدف النساء وعايز تعملهم حملة تسويقية سواء للمرة الأولى أو عشان تزود من فعالية الحملات اللي انت بتعملها، فالبوست ده هايقولك على الطريقة الصح اللي تسوق منتجاتك ليهم ومنها:

- اعمل بحوث خاصة : بيك قبل ما تبدأ في إطلاق أي حملة، فالبحوث دي هتساعدك تلاقي أفكار عظيمة وهتقدر من خلالها تختبر الرسايل اللي هتوجهها عشان تتأكد إنها فعالة ومتاخدش اتجاه تاني انت مكنتش عاوزه، ومجموعات التركيز ممكن تساعدك برده في إنك تبعد عن الصور النمطية وأي تعبيرات ممكن تتفهم غلط.

- حدد جمهورك بشكل دقيق: كلمات زي "النساء" أو "البنات" طبعا معناها واضح لكنها كمان ممكن تكون بتمثل مليارات الأشخاص واللي بيكونوا مختلفين، عشان كده لازم تحدد انت عايز توصل لأنهي نساء؟ ومين هما البنات اللي بتحاول تستهدفهم، وده سواء كنت بتخاطب الأمهات أو طالبات الجامعة أو سيدات الأعمال .. إلخ، وبعد تحديدهم بدقة لازم تعرفهم بمنتجك وتقولهم هو هيفيدهم في ايه وتحاول تخلق ارتباط عاطفي بينهم وبين المنتج.

- تخلى عن اللون البينك، بالرغم إن التسويق للنساء بيطلق عليه التسويق الوردي إلا إن ده مش معناه إنك تخلي كل منتجاتك لونها وردي أو إن حملتك التسويقية يكون اللون البينك هو اللون الأبرز فيها، لأنه مش هو اللي هيخلي منتجك بشكل تلقائي تكون للسيدات، فعلى حسب كتاب "Don’t thing pink" فأكتر من 50% من السيدات بيشتروا منتجات بيكون معروف عنها إنها ذكورية نوعا ما زي السيارات ومنتجات تحسين وصيانة المنزل والإلكترونيات الاستهلاكية وده مش معناه إن عشان النساء بيشتروا الحاجات دي فنبتدي نغير لونها للبينك ولكن بيكون من الأفضل ساعتها هو إلغاء تنميط السلع على أساس الجنس وعمل حملات تسويقية تكون لها صدى كويس مع الجمهور المستهدف من النساء.

- افهم الفرق بين الرجل والمرأة، في حملات كتير بتحاول إنها تفصل بين الجنسين وبينتهي بيها الوضع في النهاية إنها متعرفش توصل لجمهورها الأساسي، شركة نايك من أفضل الشركات اللي عرفت تعيد صناعة علامتها التجارية عشان تكون مقبولة بشكل أكبر للسيدات، فبدأت إنها تركز على الأداء الرياضي للمرأة وإن نايك مناسبة لحياتهم بشكل عام وكان شعارها " Unlimited You" ومحطتش شعار "Just Do It" واللي كان مناسب أكتر للرجال وبالتالي نتائج الحملة كانت مختلفة وفعالة.

- استخدم السوشيال ميديا: فعلى حسب إحصائية Pew Research Center اللي اتعملت في 2012 فكان عدد السيدات اللي بيستخدموا مواقع السوشيال ميديا 56%، وإنهم نشطين أكتر على السوشيال ميديا من الرجال خاصة على فيسبوك وبينترست، وعشان كده لو كنت بتسوق للنساء من غير استخدام السوشيال فالمجهودات بتاعتك هتكون محدودة جدا.

في مقولة شهيرة بتقول "المرأة نصف المجتمع" بس يمكن في عالم التسوق والشراء هي أكتر من كده بكتير، وبما إن المرأة بتمثل جزء كبير ومهم من الجمهور المستهدف لأي بيزنس فلازم يتم استخدام أفضل الطرق اللي تخاطبهم بيها وتبعد فيها عن النمطية والقوالب المعادة والمكررة.