الأهلي والزمالك كل سنة بينفقوا ملايين الجنيهات على تعاقدات مع لاعبين علشان يدعموا فريقهم علشان يقدر ينافس كل سنة وده بيحصل فى العالم كله فى موسم بيسمى موسم الإنتقالات اللى بيبقى مرتين فى السنة ... المشكله إن القاعدة اللى أى حد ممكن يلاحظها إن معظم الصفقات اللى بيتدفع فيها مبالغ كبيرة جدًا بتفشل وغالبًا برضه الصفقات اللى بتيجى بمبالغ قليلة بتنجح ... يعنى مثلًا الأهلى والزمالك إتخانقوا على "خالد قمر" و"معروف يوسف" من الشرطة واللاعبيين اتوقفوا بسبب انهم مضوا للقطبين والاتنين تقريبًا مستواهم مختلف تمامًا عن حد مثلًا زى "باسم مرسى" اللى الزمالك اشتراه بدون ضجة إعلامية وبسعر أقل من أى مهاجم اشتراه السنه اللى فاتت أو "مصطفي فتحي" اللي سعره 100 الف ج فقط .... برضه الأهلى اشترى 15 لاعب السنة اللى فاتت والسنة دى بس هتلاقى أفضل لاعبين عنده "رمضان صبحى" و"تريزيجيه" و"كريم بامبو" اللى هو مدفعش فيهم فلوس أصلًا ..... هتلاقى القطبين دفعوا ملايين كتيرة جدًا فى لاعبين مبيلعبوش حاليًا بسبب تنافس على الأفضل (شريف عبدالفضيل كمثال) .... القطبين اشتروا فى آخر 20 سنة حوالى 80 لاعب أفريقى كانوا نجوم فى أنديتهم من أول "أجوجو" و"أكوتى منساه" لحد "بيتر ايبي" ومعروف يوسف" وهتلاقى نسبة النجاح لا تتعدى 5 أفارقة من أصل 80 بالرغم إنهم برضه دفعوا فلوس كتير جدًا فيهم بالرغم إن على مدار ال 20 سنة أفضل نجمين ممكن تقول عليهم زى "أبوتريكة" و"حازم إمام"مكلفوش خزينة القطبين كتير باعتبار إن "أبو تريكة" جاى من الترسانة و"حازم إمام" الكبير جاى من نادى الصيد .......

طيب أنا عايز أقول إيه ؟؟؟؟

عايز أقول إن مش دايمًا وبالذات فى مجال الموارد البشرية مش لازم تبقى غالية علشان تبقي كويسه علشان كده ظهرت فى اختيار الوظائف على مستوى العالم حاجة اسمها الكفاءة (competence) ودي بقي خليط من الخبره (experience) والمهارة (skills) والعلم ( knowledge ) ودى بقى بتختلف من وظيفة لأخرى يعنى مش أى وظيفة لو جبتلها أحسن واحد فى الدنيا هايعرف ينفذها ... بمعنى آخر لو ممكن تعين فى وظيفة حد ومايعرفش يشتغلها ويجى حد أقل منه فى المهارات والعلم بس أعلى منه فى الخبرة مثلاً ..... إذن فالموضوع قائم على التحليل مش الإفتراض ولا التأليف .

كمثال عملى علشان نفهم نظرية الكفاءة دى ( competence ) من حوالى 15 سنة كده فى شركة عربيات عالمية قررت إنها تفتح فى مصر بماركة من العربيات الفاخرة اللى أقل عربية عندهم ب 300 ألف ج وانت طالع ... وعلشان هما بيستهدفوا فئة غالية جدًا عينوا ناس عندهم خبره 10 سنين ومهارة التحدث بالإنجليزية كأهلها وعلم لا يقل عن ماجستير فى الإدارة ومقابل كل ده حطوا مرتب كبير جدًا لرجل المبيعات وبدأوا وبعد سنة بيقيموا أداء المبيعات لقوها أقل بكتير من المتوقع بالرغم إن التسويق كويس جدًا والإحصائيات بتقول غير كده خالص .... فى السنة التانية عينوا ممثلى مبيعات من مستويات مختلفة فى الخبرة والمهارات والعلم وفعلاً المجموعة التانية حققت نتايج أفضل من الأولى ولما حللوا النتايج وجدوا إن فيه 4 محققين 50% من المبيعات وال 4 دول متشابهين جدًا فى إنهم عندهم من 3-5 سنين خبرة فقط .... بيتكلموا انجليزي معقول وأفضلهم معاه دبلومة فى المبيعات .... المهم إنهم ماعاندوش أخدوا نتايج التحليل ده وحطوها كمعيار ( standard ) للتعينات بعد كده .... طيب ليه الناس دى هى اللى بتعرف تبيع ؟ هاقولك معرفش

هاتقوللى ممكن يكون الناس اللي بتشتري ومعاهم فلوس مبيتكلموش انجليزى كويس ومستواهم الاجتماعي أقل ؟ هاقولك برضه معرفش

تحليل المواصفات جه كده ليه منعرفش ومش لازم نعرف المهم إننا وصلنا لمواصفات الوظيفة اللى بيها نقدر نعرف كفاءة اللى هايشتغل فيها ( competence ) ..... وده المهم ومش لازم يبقى له مقاييس مش كل حاجة ليها أسباب ظاهرة مفيش مرة انت مثلًا كنت بتنتج منتجين واحد حاطط فيه كل خبرتك ومتحمسله جدًا وشايف انه هايكسر الدنيا ومعجبش الناس خالص ومنتج انت شايفه منتج هايف وبسيط ومبذلتش فيه مجهود وتلاقيه عجب العملاء جدا ؟؟؟ ايه السبب ؟؟ محدش يعرف

محدش مثلاً يعرف ليه كل المدافعين الكويسين بيطلعوا من المحلة والمنصورة ( وائل جمعة .. محمود فتح الله .. محمد عبدالشافى .. أحمد المحمدى ... تامر عبدالحميد .....الخ ) ومحدش يعرف ليه الاسماعيلى بيطلع أحسن صناع لعب ومهاريين (خالد بيبو..محمد بركات .. عبدالله السعيد ......الخ)

بس فى الآخر هو تحليل لازم نحلل اللى فات ونشوف اللى ناجح ايه ونكمل عليه وبلاش نفترض إن الموظف اللى هياخد فلوس أكتر أو اللى معاه ماجستير أو اللى بيعرف يتكلم انجليزي أو اللى خبرته أكبر هو ده الموظف المناسب اللى هايحققلك كل اللى انت عايزه ..

لازم ننسى نقيم الموظفين بالخبرة والمهارة والعلم ونقيمهم بالكفاءة ( competence ) اللى هى خليط من كل دول

وخلينا نقول مش مهم مدي كفاءته بقدر ملائمته للوظيفة المطلوبه منه