الدون.. التوربينى.. وحده وحده كرستيانو رونالدو..

الدون.. التوربينى.. وحده وحده كرستيانو رونالدو..

رونالدو مدهش! يمكن أن يسجل للفريق ويجعل الفريق فائزاً سواء كان بضربه رأسيه أو بقدمه اليسرى أو اليمنى.. لاعب استثنائي “فابريجاس"

بيتهيئلي من المقدمة دى عرفنا احنا النهاردة هنتكلم علي مين وقبل ما تسألوا وايه علاقة ده بالبيزنس دلوقتي هنشرحلكم.

فريق الكورة ما يختلفش كتير عن تكوين أى شركة بداية من مدرب الفريق لللاعبين والجهاز الإدارى ومجلس الإدارة وهكذا، وزي ما أى فريق فيه لاعبين بتمشي أو تحترف أو تروح إعارة ده كمان بيحصل لأى موظف فى حياته لما بيقرر يدور على فرص أفضل سواء لإحساسه بانه خلاص مش هيقدر يقدم للمكان أكتر من كده أو لإنه عايزة فرصة أفضل ومرتب أحسن وده اللي حصل مع كرستيانو رونالدو لما انتهى عقده وطلب التجديد براتب أعلى وبشروط تانية متعلقة بالضرايب وهنا نادى ريال مدريد كان عنده رأى تانى لما قرر ما يجددش لرونالدو خصوصاً مع الكلام عن ان رونالدو سنه كبر وانه مش هيقدر يقدم أفضل من كده للنادى.

بمجرد الاعلان عن احتمالية انتقال رونالد ليوڤينتوس بدأت الصحافة تتكلم عن إزاي ريال مدريد هينجح من غير رونالدو وكان الرد بإن "الفريق مش بيقف علي حد" وان ريال مدريد مش هيتأثر برحيل رونالدو وتم الاعلان عن انتقال رونالدو فى صفقة هى الأغلى وبمرتب سنوى 30 مليون يورو.

لكن واضح ان رونالدو كان ليه رأى تانى خصوصاً مع اجتهاده اللانهائى ورغبته المستمرة في الفوز والنجاح خصوصاً ان هو السبب الرئيسي فى عبور يوڤينتوس للدور التالى فى بطولة أبطال أوربا اللى خرج منها مدريد بأداء ضعيف بعد ما كانت البطولة المفضلة للريال لكن حالياً بقى اسمها "دورى أبطال رونالدو"????

كل اللى فات يعرفنا ان برضه الشركات بتتأثر برحيل الموهوبين والمتميزين وانها عادى جداً ممكن تقف على حد وان أغلى استثمار لأى شركة هو العنصر البشرى خصوصاً لو كان من النوع المجتهد اللي بيتعلم بشكل مستمر زى رونالدو ????

يلا ده دوركم تتناقشوا معانا وتقولولنا يا ترى ممكن الشركات تعرف انها ممكن تقف على حد وبعدها تقرر ترجعه تانى؟ ولا هتفضل سياسية الشركات انه عادى يخسر دلوقتي لكن الدنيا هتترتب تانى ويعوضوا خسارة أى موظف ناجح ????