إزاي تحدد شغفك؟

ماهو الشغف
"حب ما تعمل حتى تعمل ماتحب".. بنقول لنفسنا كده كتير عشان نصبر ونكمل في وظيفة مرهقة، أو شغل مش حاسيين ولا لاقيين نفسنا فيه، طيب رددنا الجملة ديه كتير و"حبينا مانعمل"، عايزين بقى نوصل لمرحلة " نعمل مانحب".

بس عارفين المشكلة فين؟ إن كتير مننا مش عارف أصلا هو بيحب إيه؟ يعني حتى لو الفرصة أتيحت قدام أي حد إنه يفكر ويشتغل في اللي هو عايزه، هيقف محتار ومش عارف يعمل إيه؟

هيسأل نفسه كتير نفسي في إيه؟ وبحب إيه؟ إيه الحاجة إلي أنا شغوف بيها عشان أدخل المجال بتاعها أو أبني شركة ومشروع فيها؟.. بس قبل مانعرف إزاي نحدد الشغف بتاعنا خليني أقولكم إيه هو "الشغف"؟ وليه مهم إننا نحدد الشغف بتاعنا؟ علماء النفس بيعرفوا الشغف (passion) إنه الميل القوي ناحية نشاط معين بتحبه و بتعتبره مهم و بتديله جزء كبير من وقتك وطاقتك.

و هتستفيد ايه لما تعرف شغفك، يعني هيفرق معاك في إيه؟
دراسات كتير أكدت إن الإنسان بيقضي أكثر من 50% من وقته في الشغل، فتخيل بقى لو نص عمرك بيضيع في حاجة مش بتحبها، ده معناه إنك هتكون إنسان غير سعيد، وهتزيد احتمالات إصابتك بالاكتئاب، وأمراض تانية عضوية زي السكر والضغط وأمراض القلب.

السعادة ليها علاقة بالشغف، وكمان النجاح ليه علاقة بالشغف، يعني الشخص اللي بيشتغل حاجة هو شغوف بيها هيبقى سعيد، ودايما الشخص السعيد بيقدر ينجح في حياته وشغله أكثر من الإنسان المكتئب والمجبر على شغل مش بيحبه.

كيف تحدد شغفك
1-جاوب على السؤال ده "لو الفلوس مش مهمة كنت هتشتغل إيه؟"، إجابة السؤال ده بدقة مهمة، لأن معظم اختياراتنا في الحياة العملية ليها علاقة إما بنظرة المجتمع أو بأهمية الحصول على دخل مادي كويس، واجابة السؤال ده هتخليك تعرف إنت بتحب إيه بجد وهتحددلك نقطة بداية رحلة البحث عن شغفك.

2-جرب حاجة جديدة، ممكن يكون شغفك حاجة لسه ماجربتش إنك تعملها، يعني لو إنت بتحب السفر والسياحة، هتعرف إزاي لو مجربتش تسافر!.

3-حاول تتطوع للشغل في المكان اللي بتحبه، ماتشتغلش فيه عشان الفلوس، اشتغل بس عشان تتعلم أكتر عن الحاجة اللي بتحبها.

4- ممكن تستعين بأهلك وأصحابك واسألهم شايفين إيه مميز فيك، شايفينك شاطر في إيه.

5- ماتخفش من الفشل لأن ده من أكبر المعوقات اللي هتمنعك من تحديد شغفك، خليك واثق في نفسك وفي قدراتك، آه لازم تخطط كويس وتحسب المخاطر وترتب الأولويات، بس إياك تخلي الخوف من الفشل يوفقك مكانك.

6- بعد ماتعمل كل الخطوات اللي فاتت، ركز مع نفسك، وتأمل حياتك كويس، عشان تحدد إيه الحاجة إلي بتدخلك في حالة "التدفق"، وحالة التدفق (Flow) دي هي الاستغراق التام في نشاط ما لحد ماتنسي الوقت واحتياجاتك الأساسية زي الأكل والشرب، الحاجة اللي بتخليك تدخل في حالة التدفق هي شغفك.

ماتيأسش أبدا، دور واتعب وهتلاقي الحاجة اللي بتحبها، و إوعى تقول إتأخرت، مافيش وقت محدد عشان تبدأ فيه تعيش حياتك، وتستمتع بشغفك في الحياة.