FB Instagram Twitter Youtube Linkedin الطابور اللذيذ | أكاديمية اعمل بيزنس
 
الرجوع الى المدونة

الطابور اللذيذ

الطابور اللذيذ

اللى عايز يعرف يعنى إيه التميز هو مفتاح النجاح فى أى سوق يروح مطعم "حمزة" فى مدينة نصر ويتفرج على الناس بتقف طوابير لمدة ساعة أو ساعتين علشان تاخد طلبها وفى نفس الشارع فيه أكتر من 20 محل للأكل ومحدش بيفكر رغم الزحمة والبطء الشديد فى تسليم الطلبات نتيجة الزحام و سوء التشغيل إنه يروح لمطعم من ال20 اللى جنبه علشان هو عارف إنه بيعمل حاجة مختلفة ومميزة

زي "حمزة" فيه "صبحى كابر" و"الرفاعى" و"البرنس" و"بحة" وأماكن كتير فى القاهرة و"بلبع" و"حوده جندل" و"حسنى" و"العربى" و"برغش" فى اسكندرية

لما كنت عازب كنا بنتجمع بعد الشغل كعزاب ونبدأ نفكر هناكل فين النهاردة واكتشفت إن القاهرة ممكن يبقي فيها 10 آلاف مطعم بس فيهم حوالى 500 مطعم متميز و حوالى 100 مطعم مميز جداً لما تروحلهم تبقى عارف إنه بالحجز وغالباً بيبقي أغلى من معظم المطاعم اللى زيهم وده طبيعى نظراً لقانون العرض والطلب أو قانون الندرة للاقتصاد

نظرة واحدةعلى أعداد الناس اللى منتظرة هتفهم كويس إن السوق المصرى بعكس ما يشاع عنه سوق بيقدر التميز تقدير كبير جداً والناس مستعدة إنها تسافر وتدفع أرقام كبيرة علشان بس تحصل علي حاجه مختلفه ومميزة .

اللى يسرى على الأكل فى مصر هو ما يسرى على الشرب وعلى اللبس وعلى أى صناعة ..... هتلاقى برنامج حسابات بيتباع ب 1000 ج وبرنامج حسابات ب 40 ألف ج ... اللى يخلى ده بألف وده ب 40 هو اللى خلي مطعم عليه طوابير وجنبه مطاعم مش شغالة خالص .

التميز اللى هو اسمه فى علم التسويق (Differentiation) له 5 أسس وقواعد أساسية لازم نحترمها ونلتزم بيها لو عايزين ننجح كبيزنس إنما نقعد نتحجج ونقول إن المصريين أهم حاجة عندهم السعر ده طبعاً اسمه تعليق شماعة الفشل على العميل اللى هو بيثبت كل يوم إنه مش عايز الرخيص لأ عايز المتميز لكن لو كله زى بعض يبقى ياخد الأرخص لأنه أولى بفرق السعر

السوق المصرى يه زى أى سوق بيقبل على المتميز وموضوع الأرخص دى بيخترعها الفاشلين اللى مقدروش يعملوا حاجة مميزة بشكل واضح فلازم يجيبوا المشكلة فى السوق والمستهلك بدل ما يواجهوا نفسهم بالفشل علشان يجاوبوا على سؤال مهم ... ليه العميل يشترى منى وما يشتريش من غيرى ؟؟؟؟ 

ياريت محدش يتهم السوق وبدل كده يحاول يتعلم ويقرأ ال 5 أسس للتميز اللي احنا مغطينهم في الحلقات من ال 30 لحد ال 34 من سلسلة التسويق اللى بتنزل كل يوم الساعة 2

وربنا يوفق كل اللى عايز يتعلم وعايز ينجح فى أى سوق وعلشان ينجح لازم يتميز