هنتكلم النهاردة عن خامس وآخر عنصر وهو عنصر ( العلامة التجارية )

قوة العلامة التجارية ..... طبعاً كلنا عارفين كويس يعنى إيه قوة العلامة التجارية اللى بنسميها البراند (البراند) وباختصار كده كلنا عارفين إن التى شيرت الأصلى مثلاً للاكوست ( لا كوست ) ممكن يبقى 10 أضعاف قيمة تصنيعه وده موجود فى كل البراندات زى لو اشتريت ترينينج سوت "أديداس" مثلاً أو بدلة أرماني أو أي علامة تجارية قوية .... الناس دي صرفت كتير جداً علي قوة العلامة التجارية علشان النهاردة الناس ( تثق) في منتجاتها وتدفع فيه رقم الناس اللي بتدفع عارفه كويس قوي إنه أكبر بكتير من التكلفة ومن المنافسين لكن ثقتهم فى العلامة التجارية بتخليهم يدفعوا وهما مطمئنين إنهم بيدفعوا في العلامة التجارية علشان اللي وراء العلامة من جودة أكبر بكتير من جودة وخدمة ما بعد البيع وشركة كاملة قوية واقفة وراء البراند ده .

زى مثلاً اللى بيشترى عربية "BMW" عارف انه بيشتريها عشان القوة والفخامة وياخد برستيج معين بعكس اللى بيشترى عربية "تويوتا" عشان بتستهلك بنزين أقل وعملية وقع غيار أرخص .

أو لما تحب انك تشترى ساعة بتفكر فى ايه ؟ أكيد تفكيرك بيروح على الساعات السويسرى وتحديداً منها ال "Rolex" واللى بتعتبر العلامة التجارية رقم واحد فى العالم من حيث الثقة والمصداقية من جانب العملاء فى سنة 2014 .. أكيد اللى اتصرف على بناء علامة تجارية بالقوة دى مش قليل خصوصاً لما نعرف ان "Rolex" من أكبر المعلنين فى العالم ومش بس الاعلانات .. كمان الثقة والدقة وجودة الصناعة والفخامة والاهتمام بالعملاء هما اللى ساهموا فى صناعة علامة تجارية بالقوة دى على مدار عشرات السنين .

وبكده نكون خلصنا ال 5 اتجاهات الرئيسية في التميز اللي لازم تحط منتجك أو شركتك فيه