إطلاق منتج جديد غالباً ما بيمثل مشكلة لأى شركة لأن الناس مش عندهم خلفية أو معلومة واضحة عشان تحكم بيها على المنتج ده وكتير من المنتجات الجديدة بتنزل السوق وبتختفى بسرعة بدون أدنى تأثير .

فى نظرية تسويقية بتقول إن الآراء بتتشكل سواء من تجربة مباشرة أو معرفة آراء المؤثرين والقادة فى المجتمع ولكن معرفة رأى الشريحة دى فى منتج معين والوصول ليهم أمر صعب شوية .. زى بالظبط أما شركة منتجات غذائية جديدة بتقدم عينات مجانية للمطاعم والشيفات اللى شغالين فيها عشان يعرفوا رأيهم قبل ما يتقدم للزبائن وطبعاً لو كان المنتج كويس هينقلوا ده للعملاء بتوعهم عن طريق ال word of mouth .. فى بعض الشركات بتاخد خطوات إضافية وبتختار مشاهير لإتمام الموضوع ده .

اعتمد استخدام الأسلوب ده " Häagen-Dazs" وهى شركة متخصصة فى إنتاج الآيس كريم فى بريطانيا .. غالبية الناس مكنتش تعرفه لأنه موجه بالأساس لشريحة وضعها الإجتماعى مرتفع جدًا لأنه غالى التمن .. المنتج اتعرف إنه غالى التمن لكن كان لسة مش مشهور .. طب إيه الحل ؟

بدأت الشركة تتجه للأحداث العامة الرياضية زى بطولة ويمبلدون للتنس وسباق القوارب وبطولات الجولف وبدأت توزع عينات من الآيس كريم مجانية .. كانت النتيجة إن الملايين من مشاهدى التليفزيون شافوا الجماهير أو ( الفئة المستهدفة من الشركة وهى الأعلى إجتماعيًا من حيث الدخل ) وهما بياكلوا الآيس كريم خلال البطولات الرياضية المختلفة اللى قلنا عليها .. الشركة نجحت فى الوصول للشريحة المستهدفة عن طريق تقديم العينات المجانية وتم نقل العلامة التجارية الفاخرة بشكل فعال للغاية، واللى هيسهل عليها أنها تأسس نفسها فى السوق بشكل قوى .

قبل ما تطبق الفكرة دى على البيزنس بتاعك لازم تراقب سلوك صناع الرأى كويس جداً أو المؤثرين وتعرف سلوك الناس تجاههم عامل إزاى ومعرفة كمان ايه الشئ الرابط بينهم وبين منتجك اللى هتبدأ رحلة تسويقه وتبدأ توفره ليهم بكل الطرق