هنتكلم النهاردة عن تالت أكبر شركة إتصالات فى العالم سواء من حيث عدد المشتركين أو من إجمالى الأرباح اللى بتحققها .. هنتكلم عن شركة فودافون واللى بدأت بداية متواضعة جداً فى مقاطعة بيركشاير الإنجليزية .

انتشرت فكرة الهواتف الخلوية بشكل كبير فى فترة التمانينات نتيجة شراكة كلًا من شركة راكال للإليكترونيات وشركة ميليكوم على يد "إيرنست هاريسون" و"جيرى وينت" تحديدًا سنة 1984 لتقديم خدمات الهاتف المحمول ودى كانت نواة بداية شركة فودافون وبعدها بسنين قليلة اتغيرت ملكية شركة فودافون واتغير كمان معاها الإسم كذا مرة مع نموها المستمر لغاية أما استقرت على مجموعة فودافون سنة 1991 .

فودافون اختصار ل "Voice Data Phone" .. يعنى البيانات الصوتية عن طريق التليفون .. فترة التسعينات لفودافون كانت بداية النمو والإزدهار فى كل أنحاء إنجلترا من خلال الإستحواذ على العديد من الشركات الصغيرة وفضل معدل نموها ثابت وفى سنة 1997 أعلنت فودافون عن شعارها "Power To You" واللى معروفة بيه لحد النهاردة .

بدأت فودافون تندمج مع شركات كبيرة زى شركة "Air Touch" للاتصالات عشان تبقى تالت أكبر شركة خدمات محمول فى العالم .

فودافون دخلت مصر سنة 1998 تحت اسم مصر فون للإتصالات ( كليك جي إس إم سابقًا ) وفى يناير سنة 2002 إتغيرت العلامة التجارية للشركة من كليك جي إس إم إلى فودافون مصر Vodafone Egypt .. كمان دخلت فودافون الهند سنة 2007 .

سياسة فودافون كانت تقديم أفضل خدمة لعملائها من خلال شعار " القوة بين إيديك " بتقديم مختلف الخدمات اللى تناسب احتياجات العملاء وبتسعى دايمًا للإبتكار وتقديم العروض والخدمات الجديدة لعملائها زى خدمة التجوال الدولى ( Roaming Call ) وكانت أول شركة توفر خدمة الإنترنت أثناء التنقل من خلال خدمة فودافون لايف .. كان ليها كمان ابتكارات كتير زى خدمة نقل الأموال ( Vodafone Money Transfer Service) واللى كانت ناجحة جدًا وجدير بالذكر إن عدد المشتركين النهاردة وصل ل400 مليون مشترك على مستوى العالم .

لأن الحاجة بقت ملحة للإتصال والتواصل الإجتماعى .. فودافون كانت دايمًا الإختيار الأول فى كتير من بلاد العالم ونجحت خلال 30 سنة إنها تبقى تالت أكبر شركة اتصالات على مستوى العالم من خلال تواجدها فى أكتر من 30 بلد والدخول فى شراكة مع أكتر من 20 شركة عالمية .

التركيز الكبير على خدمة العملاء وتلبية احتياجاتهم بشكل مستمر وبجودة عالية كان أحد أسباب نجاح فودافون ووصولها للمستوى ده عالمياً

تعليق : العميل هو أهم أصل من أصولك فى عالم البيزنس ..