FB Instagram Twitter Youtube Linkedin المحتوى هو الملك | أكاديمية اعمل بيزنس
 
الرجوع الى المدونة

المحتوى هو الملك

المحتوى هو الملك

مهارات الكاتب الجيد

إنشاء وكتابة محتوى قوي بالنسبة للشركات والمشاريع التجارية دلوقتي بقي من أهم الوسائل التسويقية وجزء لا يتجزأ من نجاح أي شركة أو مشروع في عالم الأعمال حاليا، وده سواء كان المحتوى أونلاين أو أوفلاين لأنه المعبر عن أهداف الشركة ومهمتها ومنتجاتها أو خدماتها.

وعشان كده عالم كتابة وإنشاء المحتوى بقى مزدحم جدا، الشركات بتدفع لمنصات التواصل الاجتماعي عشان تزود من معدلات وصول المحتوى بتاعها وتستحوذ على عدد أكبر من القراء، بس مع استمرار الشركات في إنتاج المزيد والمزيد من المحتوى والمنافسة على زيادة اهتمام العملاء المحتملين بيه، أصبحت عملية إنشاء محتوى العملاء يتفاعلوا معاه التحدي الأول والأهم اللي بيواجه رجال التسويق حاليا وده على حسب التقرير اللي أصدره Content Marketing Institute سنة 2016.

وعشان يتم التغلب على التحديات دي بيجي الحل من خلال إن الشركة تعرف تضم لفريق عملها كاتب محتوى موهوب ومُدرب، لأن كاتب المحتوى الجيد يقدر إنه يعلى من قيمة العلامة التجارية للشركة فوق مستوى منافسيها، وكمان مساعدة الشركات في زيادة الوعي والثقة بين جمهورهم وزيادة تفاعل العملاء المحتملين مع المحتوى المقنع واللي له صلة بيهم وبالتالي زيادة عدد العملاء المحتملين ومعدلات تحولهم.

ولو أي شركة حبت تعين عندها مسوق محتوى هيقوم بإنتاج كمية كبيرة من المحتوى أو تضم كاتب تزود بيه فريق التسويق بتاعها، ففي مجموعة من المهارات كاتب المحتوى ده لازم يكون بيتمتع بيها، وفي البوست ده هنتكلم عن المهارات اللي لازم تكون موجودة في كاتب المحتوى الجيد واللي منها:

• جودة الكتابة: الأساس عند أي كاتب محتوى جيد إنه يكون متمكن من اللغة اللي هيكتب بيها سواء من قواعد نحو وتهجئة، وكمان يكون عنده القدرة على استخدام مصطلحات مختلفة وفي بعض العلامات المهمة اللي هتعرفك إنك قدام كاتب محتوى متمكن من الحتة دي وهي:

1. اختيار عناوين جذابة: الكاتب الجيد هيقدر يكتب عناوين هتخلي عملاؤك المحتملين مستحيل ميقروش المحتوى بتاعك.

2. القواعد النحوية: في دراسة اتعملت من Global Lingo لقت إن 59% من 1029 شخص في إنجلترا قالوا إنهم مش هيتعاملوا مع شركات عندها أخطاء نحوية في محتوى مواقعهم الإلكترونية، عشان كده مينفعش تعين كاتب أفكاره جيدة لكن كتابته سيئة لأنك باستمرار هتكون مضطر تراجع وراه اللي بيكتبه، بس ده مش معناه إنك تستبعده عشان أخطاء بسيطة لكن لو الأخطاء اللغوية كتيرة ومستمرة من الأفضل إنك تشوف غيره.

3. طريقة الكتابة: واحدة من أهم جوانب استراتيجية المحتوى بشكل عام هي الحفاظ على نغمة ثابتة في الكتابة (Tone of voice) تكون ماشية على خط واحد مع العلامة التجارية، سواء كانت الطريقة والاستايل ده رسمي أو غير رسمي، تقني أو بالعامي وكاتب المحتوى الجيد اللي لازم تضمه ليك هو اللي هيكون قادر على إنه يكتب بنغمات وطرق مختلفة وفقا للمطلوب منه.

• البحث الصحفي: بنشوف الأيام دي كتير من الشركات بتفضل تعين صحفيين عندهم خبرة وده لأنهم بيعرفوا يعملوا بحث جيد وفعال عن الموضوعات واللي بيكون مهم جدا عشان يتم إنشاء محتوى جذاب للعملاء، وده غير إن معظم الصحفيين بيحاولوا ياخدوا المعلومات من مصادر بتكون موثوق فيها، بس طبعا ده مش معناه إن كل كُتاب المحتوى ورجال التسويق لازم يكونوا صحفيين ولكن بيكون من المهم إنهم يقدروا يطبقوا بعض من استراتيجيات البحث الصحفي زي: 
1. تحديد احتياجات العملاء: فيعرف يدور عن اهتمامات العملاء والمشكلات اللي بتقابلهم والاحتياجات اللي نقصاهم وده عشان يقدر يكتب محتوى ذو صلة بيهم ويشجعهم على التفاعل.

2. يحدد نقاط التميز: من خلال انه يعرف نقاط التميز في المنتجات والخدمات اللي الشركة أو المشروع بيقدمها ويقدر يعرضها بطريقة مناسبة في المحتوى اللي بيكتبه.

3. يسد أي فجوة بينك وبين المنافسين بتوعك: بمجرد ما يفهم احتياجات العملاء والحاجات اللي بتميز منتجات وخدمات الشركة، لازم يبدأ في البحث عن المنافسين بتوعك ولو عرف يقوم بالبحث كويس هيقدر يشوف الفجوة اللي بينك وبين المنافسين بتوعك ويعزز الفجوة دي في المحتوى بتاعه وبالتالي هيقدم محتوى مش موجود في مكان تاني غير عندك.

• السرعة في الكتابة: كاتب المحتوى الجيد لازم يقدر يشتغل تحت جدول زمني واضح ومحدد وقادر على إنتاج محتوي في وقت سريع وقت اللزوم، فأي شركة لازم يكون عندها تناسق مش بس في جودة المحتوى اللي بتقدمه والموضوعات اللي بتغطيها أو النغمة اللي بتميزها ولكن كمان يكون فيه تناسق في مواعيد نشر المحتوى الجديد.

• خبرة الكتابة: في حالة لو كنت عايز محتوى متخصص في مجال معين فلازم تتأكد من إن الكاتب مألوف بالنسباله الكتابة في المجال ده، وعشان كده اطلب عينات من الأعمال السابقة في إعلان الوظيفة، والكاتب اللي هتقوم بتوظيفه لازم يكون عنده مقالات متشابهة مع المحتوى اللي انت عايزه من حيث المعرفة والأسلوب والطول والموضوعات.

المحتوى هو الملك دلوقتي لأسباب كتيرة ذكرناها في بوست سابق لينا قبل كده وعشان تقدر تقدم محتوى يكون فعلا ملك فلازم تضم لفريق عملك مجموعة من الكُتاب الجيدين اللي ممكن بالمحتوى اللي هيكتبوه يخلوا شركتك أو مشروعك ملوك السوق كمان.