جربت تعين موظف في شركتك، وكان مقنع جدًا في الإنترفيو بالنسبالك، وحسيت أنه متحمس أوي للشغل، وفي أول شهر ليه مكدبش ظنك، وفعلًا كان نشيط وأداؤه عالي جدًا، وبيحقق التارجت في معاده.

لكن مع مرور الوقت بدأ مؤشر الأداء بتاعه يقل، ومبقاش بيخلص التارجت في المعاد المحدد، وكمان جودة شغله انخفضت بشكل ملحوظ، وده من غير أي أسباب واضحة بالنسبالك!

لو ده حصل معاك فعلا فده مش معناه إن الموظف خدعك في الإنترفيو وإنه مش بتاع شغل؛ وده لأن المشكلة دي بتعاني منها معظم الشركات، وهي مشكلة متعلقة بال employee engagement أو مشاركة الموظفين، ومعناها ببساطة ضعف شغف الموظف في الشغل نتيجة ضعف التواصل أو المشاركة بينه وبين الشركة أو المدير بتاعه.

طب والحل ؟!

في البداية مشكلة ضعف التواصل بين الموظف والشركة" employee engagement " ليها بُعدين:

• البعد الأول هو المشاركة بين الموظف والشركة بشكل عام: ودي متعلقة بدرجة ثقة الموظفين في الإدارة العليا والقيادة التنظيمية للشركة، ودرجة قبولهم لأهداف وقيم الشركة بشكل عام.

• البعد التاني هو المشاركة بين الموظف والمدير المباشر: ودي متعلقة بشعور الموظف بقيمته في الشغل، وإن المدير بيعامله بشكل عادل، وبيعلق على شغله ويوجهه، يعني من الآخر العلاقة ما بينهم قوية في حدود الشغل، وفيه احترام متبادل.

باختصار أي خلل في البعدين دول بيمثل خلل في" employee engagement " أو المشاركة بين الموظف والشركة، ودي بعض النصايح اللي ممكن تساعدك على حلها:

1- تعامل بشفافية مع الموظفين:

حاول تخلي أهداف الشركة واضحة للموظفين؛ عشان ميكنش فيه شكوك إن الشركة بتخدم أغرض معينة هم مش عارفينها مثلًا، وكمان خلي فيه ثقة في الموظفين، وسيبلهم مساحة لإبداعاتهم في الطريقة اللي بيشتغلوا بيها، ومش شرط تكون الطريقة النمطية المتعارف عليها في الشركة.

عندك مثلا شركة جوجل بتحاول تخلق ثقافة الشفافية بينها وبين الموظفين، وبتسيبلهم مطلق الحرية في انهم يختاروا الطريقة اللي بيشتغلوا بيها، وهنا الشركة بتركز على النتايج بشكل عام بصرف النظر عن طريقة تنفيذ المهام، وده بينعكس على مشاركة الموظفين بتوعها، وكمان بيغير من الطبيعة النمطية للشغل.

2- اقضي معاهم جزء من وقتك:

في 2011 فيه دراسة اتعملت على مجموعة موظفين في 77 شركة ومؤسسة أسترالية، والنتايج بتاعتها أكدت إن الفرق بين الشركات اللي فيها مشاركة الموظفين عالية، والشركات اللي فيها المشاركة ضعيفة، هو الوقت اللي بيقضيه المدير مع الموظفين في الشغل، والوقت ده مش مقتصر على الشغل بس، ممكن تدريب أو حتى مشاركتهم في الأكل في أوقات الراحة.

3- أخلق المعني أو القيمة:

Gary Browning الرئيس التنفيذي لشركة penna بيقول "ببساطة ، تحتاج الشركات إلى تقديم أكثر من مجرد وظيفة"، وده عشان بالبلدي كده مفيش موظف هيكون متحمس في الشغل إلا إذا حس بقيمة اللي بيعمله.

شركة Southwest Airlines Co بتحاول توصل للموظفين بتوعها إنها مش مجرد شركة طيران، لكن بتعمل خدمة إنسانية في إنها بتساعد الناس يوصلوا للأشخاص والأماكن اللي بيحبوها".

4- خليهم يشتركوا في القرارات:

سلسلة محلات John Lewis & Partners الأمريكية بتتبع سياسة منح السلطة للموظفين، يعني بتخليهم يتشركوا في القرارات المهمة في الشركة، وبيقدموا حلول للمشاكل اللي بتواجههم، وبالتالي بيحسوا بالمسؤولية تجاه القرارات اللي بياخدوها وده بيزود مشاركتهم.

5- اهتم بآرائهم ومشاكلهم:

شركة virgin ودي شركة بتقدم منتجات متعددة أبرزها في الإنتاج الفني والأدبي بتهتم من وقت للتاني إنها تعرف رأي الموظفين بتوعها في طبيعة الشغل، ومدى رضاهم عن بيئة العمل، وكمان أبرز المشاكل اللي بتواجهمم بشكل عام، وبالتالي بينعكس على أداءهم بشكل إيجابي وبيحسوا إن الشركة بتحترمهم وبتقدر آرائهم.

وعادة ده بيتم عن طريق استطلاع رأي بتتوزع على الموظفين، وبيتم تحليل نتايجها وبيعرفوا مشكلات الموظفين وبالتالي بيعملوا إجراءات لحلها.

6- اظهرلهم احترامك:

استطلاع رأي عملته شبكة shrm على مجموعة من الموظفين، و67% منهم أكدوا إن معاملتهم باحترام من جانب المديرين هي اللي بتشجعهم أكتر على الشغل وبتخليهم متحمسين.

7- التدريب وتنمية المهارة:

لو الموظف حس إن المكان مش بيضفله مهارات، وإنه مش بيتعلم حاجة جديده، هيفقد شغفه في الشغل وهيتحول لموظف روتيني ومع الوقت هيقرر يمشي؛ فحاول تهتم تنمية مهاراتهم ومتخليش ده يدخل في إطار إلزامي سيبهم براحتهم يتعلموا وحاول تخلقلهم انت الفرص عشان يتعلموا زي عمل ورش مجانية ليهم.

طبعًا دي مش كل الحاجات اللي هتساعدك علي زيادة مشاركة الموظفين أو employee engagement في شركتك؛ عشان الموضوع ده صعب الإلمام بيه في بوست، ده غير إن كل شركة بيكون ليها طبيعة مختلفة، لكن بشكل عام النصايح دي هتقدر من خلالها تحقق جزء من التفاعل والمشاركة، وبالتالي ده هينعكس على أداء الموظفين، ودرجة حماسهم بشكل عام.