هنتكلم النهاردة عن أشهر موقع تسوق إليكترونى على مستوى العالم وهو موقع Amazon.com

تعالوا نعرف قصته …

مؤسس الموقع هو "جيفرى بريستون" اللى اتولد سنة 1964 فى ولاية نيومكسيكو .. كان عنده شغف من صغره بمعرفة الحاجات اللى حواليه بتشتغل ازاى زى مثلاً تفكيك سريره اللى بينام عليه وهو فى سن صغير جداً وفى المرحلة الإبتدائية حول جيفرى جراج البيت لمعمل بيختبر فيه الدوائر الكهربية للبيت بتاعه "واضح ان دماغه بدأت تشتغل من بدرى أوي"

خلال سنوات مراهقته برع "جيفرى" فى المدرسة وبدأ حبه للكمبيوتر والعلوم الخاصة بيه وأسس أول مشروع تجارى وهو فى المدرسة الثانوية وكان اسمه "معهد الأحلام" وكان عبارة عن مخيم صيفى لطلبة الصف الرابع والخامس والسادس وفى نهاية تعليمه اتخرج "جيفرى" بامتياز مع مرتبة الشرف وشهادة فى علوم الكومبيوتر والهندسة الكهربائية .

بعد تخرجه اشتغل "جيفرى" فى وول ستريت وفى سنة 1990 بقى أصغر نائب رئيس فى شركة الاستثمارات DE .. وفى سنة 1994 جاتله أول فكرة لبداية عمله الخاص على الإنترنت واللى كان سببها الإحصائيات المتوفرة عن شبكة الانترنت واللى كان معدل استخدامها فى التوقيت ده بيزيد 2300 % فى الشهر .. هنا لاحظ ان فى امكانية كبيرة لسوق الأعمال التجارية من خلال الإنترنت .

بدأ "جيفرى" بتسجيل قائمة من 20 منتج شاف انهم ممكن يتباعوا بشكل كويس من خلال الإنترنت منهم السيديهات وبرامج الكومبيوتر والكتب واللى كانت تعتبر مكتبة افتراضية كبيرة على الموقع بتاعه وطبعاً كانت اكبر ميزة موجودة إنه غير مقيد بعدد محدد زى الأرفف الموجودة فى المكتبات الحقيقية ومن هنا وجد "جيفرى" الفرصة المناسبة ليه وترك عمله فى وول ستريت وحصل على مكافئته وأخد مراته والكلب بتاعه واتجه للإقامة فى ولاية سياتل .

جمع "جيفرى" مليون دولار من عائلته وأصدقائه وبدأ هو وخمس موظفين العمل من جراج بيته على ترتيب الكتب وبدأ رسمياً موقع Amazon العمل فى يوليو 1995 تحت شعار " أكبر مخزن للكتب على وجه الأرض" وبعد سنة واحدة من إفتتاح الموقع حقق 15.7 مليون دولار مبيعات وبدأ الشركة الجديدة تكبر لغاية أما وصلت ل100 موظف .

استمر "جيفرى" فى التوسع وتنويع العروض الموجودة على أمازون من خصومات على السيديهات والفيديوهات فى سنة 1998 وبدأ بإضافة الإليكترونيات والملابس ولعب الأطفال من خلال شراكات مع بعض المواقع .

أشهر منافس ل "جيفرى" كان موقع اسمه Barnes & Noble واللى انضم للسوق بعد ما شاف نجاح أمازون الكبير لكنه انضم متأخر جداً وكان صعب عليه انه ياخد خطوة أكبر من أمازون فى التوقيت ده .

بعد انتهاء فقاعة الإنترنت فى التسعينات بدأ أمازون ينمو بشكل كبير سنة ورا سنة وبدا يحقق أرباح بدأت ب510 ألف دولار سنة 1995 ووصلت ل17 مليار دولار سنة 2011

كل النتايج بتقول إن مفيش مؤشر قوى على تراجع أرباح امبراطورية أمازون فى الوقت الحالى لأن "جيفرى" مستمر فى تقديم المنتجات الجديدة المبتكرة .. "جيفرى" له رؤية هتستمر فى قيادة الطريق للجيل القادم من مواقع التسوق الإليكترونى .

كعادتنا فى كل قصص النجاح اللى بننشرها فى الفترة الأخيرة نحب نعرفكم إن ثروة "جيفرى " دلوقتى وصلت ل28.9 مليار دولار