FB Instagram Twitter Youtube Linkedin أهمية خطة العمل.. ضرورية ولا تضييع وقت وطاقة؟ | أكاديمية اعمل بيزنس
 
الرجوع الى المدونة

أهمية خطة العمل.. ضرورية ولا تضييع وقت وطاقة؟

أهمية خطة العمل.. ضرورية ولا تضييع وقت وطاقة؟

اهمية خطة العمل business plan

لما يبقى عندك فكرة بيزنس رائعة، وتبدأ تحول فكرتك لواقع وتأسس مشروع أو شركة، أكيد هتكون حريص إنك بنسبة كبيرة تبقى ضامن نجاح مشروعك، بس الفكرة إن الناس اختلفت على النقطة ديه:
هل خطة العمل business plan تضمن نجاح المشروع
عندنا هنا وجهتين نظر..

الأولى بتقول إني أبدأ الشغل كده من غير ما أتردد، أرمي نفسي في السوق من غير تخطيط، وأبدأ أشوف الدنيا واخداني لفين،

التانيه شايفه إن خطة العمل قبل بدء الشغل مهمة جدا، وهي اللي بتضمن بنسبة كبيرة نجاح المشروع، طيب ..خلونا هنا نستعرض سوا مبررات كل وجهة نظر منهم، ونشوف.

وجهة النظر الأولى بتأكد إن محاولة التخطيط للمشروع قبل ما يبدأ هو أمر عبثي ومالوش أي أهمية، عشان مفيش حد عنده قدرة على التنبؤ بالمستقبل، أو يقدر إنه يسيطر على متغيرات زي ظروف السوق، والمنافسين، والعملاء، والوضع الاقتصادي.. إلخ، مهما كانت دقة خطة العمل.

وبالتالي مش ممكن تكتب خطة عمل تديلك إحساسا مزيف بالسيطرة على أمور مش ممكن تتحكم فيها.
عشان كده لازم نبدأ - وفقا لوجهة النظر الأولى- ننسى القلق الناتج عن عملية التخطيط، ونسمي الأمور بالمسميات الدقيقة بتاعتها، بمعني إن اللي بنعمله قبل ما نبدأ المشروع بيبقى عبارة عن "تخمين" مش تخطيط.

والاتجاه ده بيعتبر الدخول في عالم التخطيط خطأ كبير، لأنك بتخطط بناء على الماضي والحاضر، يعني بتخلي ماضيك والواقع اللي إنت فيه يسيطر على مستقبلك، وده ممكن إنه يضيع عليك فرص كويسة كان ممكن تاخد بالك منها في المستقبل لو إنت مش مسستم نفس إنك ماشي على خطة عمل محددة.

كمان بتهاجم وجهة النظر ديه التخطيط لأنك بتبدأ تحط خطة العمل قبل ما تبدأ مشروعك، وده معناه إنك بتعتمد على نتائج وتوصيات غير دقيقة، وغلط إنك تعتمد عليها في اتخاذ قرارات حاسمة في البيزنس بتاعك.

أما وجهة النظر التانية شايفة إن خطة العمل الدقيقة الشاملة تعتبر من أهم عناصر نجاح أي بيزنس، طبعا خطة العمل بتختلف شوية حسب النشاط بتاع الشركة وحجمها والدولة اللي إنت فيها وظروفها الاقتصادية والسياسية كمان، لكن فيه شوية عناصر مشتركة أساسية في أي خطة عمل زي: خلاصة تنفيذية للنقط الرئيسية لتخطيط العمل، وصف المنتجات والخدمات، نظرة عامة عن الصناعة والمنافسين، استراتيجية التسويق، وصف الإدارة والموظّفين، وكمان خطة مالية بتشمل الميزانيات الأوّلية والبيانات والدخل وبيانات السيولة النقدية، وبيقول أصحاب وجهة النظر ديه إن فوائد خطة العمل كتير، وإنها أساسية لنجاح أي بيزنس عشان أسباب كتير وأهمها:

- بتساعدك تتعرف على الأسواق المحتمل إنك تدخلها.

- بتخليك توصل لتحديد طريقة تمويل مشروعك.

- بتظهر لأي مستثمر أو ممول قد إيه إنت جد في مشروعك، فبتقدر تحصل على فلوس لمشروعك في حالة إنك هتعتمد على تمويل خارجي.

- بتساعدك تحدد متطلبات المشروع والإمكانيات المتوفرة.

- تقليل احتمال الفشل وتقليل الخسارة، لأنك بتدرس العقبات المحتملة وهتواجهها إزاي.

- بتوضح الخطة المالية والهيكل التنظيمي الداخلي للمشروع.

- بتوضح خطة العمل آلية الانتاج للمنتجات والموارد المتاحة وكمان المطلوب توافرها.

إحنا كده عرضنا وجهتين النظر بمبرراتهم، بس حابين تشاركونا رأيكو.. شايفين من المهم إننا نحط خطة العمل قبل ما نبدأ أي بيزنس؟ ولا هي فعلا إهدار للوقت والجهد؟