لسة مكملين كلامنا عن العناصر اللى أقدر أعمل بيهم ( Positioning ) صح واتكلمنا الحلقات اللى فاتت عن عناصر الخدمة والمواصفات

هنتكلم النهاردة عن العنصر البشرى كتالت عامل أقدر أكوٌن بيه صورة ذهنية واللى بيتقسم ل3 أنواع فى أى مشروع ( الشركاء – العاملين – العملاء ) وهنتكلم بالتحديد عن العاملين كعنصر أساسى ورئيسى فى نجاح أى شركة أو بيزنس .

العنصر البشرى ( People ) .... فكرة إن أحياناً بنروح نشترى من أماكن بس علشان إحنا بنستريح للناس اللى بنتعامل معاها ؟ فيه مفهوم كنا بنشوفه فى الأفلام اللى هو جواهرجي العيلة .... النهاردة هتلاقى فيه جزار بتستريح إنك تشترى من عنده ... سوبر ماركت متعود تروحله رغم إن حواليك أكتر من واحد جربتهم كلهم ولقيت الأسعار متشابهة بس انت بتحب تشترى من ده ... أنا شخصياً فيه بنك لما بروح أخلص فيه معاملة ببقي مبسوط وبنك تانى ببقى شايل هم الدخول له .... بلاش أنا شخصياً البنك اللى بتعامل معاه بحب أروح فرع معين فيه رغم إنه بعيد عنى علشان الناس اللى فيه معاملتهم مختلفة .... طيب فيه شركة طيران الناس بتحجز فيها بالرغم من أسعارها علشان طاقم الطيارة مختلف ؟؟ ولا ده مبيحصلش ...... العامل البشرى مهم جداً جداً جداً وبيوقع شركات ومنتجات علشان الإدارة بتقصر فى الاختيار والتدريب والمتابعة والتحفيز .

وبالتركيز على موضوع التحفيز ده هحكيلكم عن قد إيه مهم جدًا أى شركة تهتم بالموظفين بتوعها علشان تقدر تكسب من خلالهم زى ما عمل مصنع "باتا" فى اندونيسيا وأكيد كلنا عارفين باتا بيصنع إيه .. أحذية رياضية طبعًا

بالرغم إن العمالة فى آسيا متبهدلة ورخيصة .. المصنع ده معمول جوا حديقة من حدائق جاكرتا جواه ملاعب خضراء للعب كرة القدم وعيادات على أرقى مستوى وبيطلع العمال وقت الغداء يتغدوا فى الحدائق الخضرا مع عيادات محترمة وتوفير اتنين كانتين كبار جوا المصنع .... الاهتمام ده خلا شركة "بينستار" وهى شركة ومصنع أمريكي تختار "باتا" لتوريد أحذية رياضية غير قابلة للعرق بتكلفة أكبر بكتير من سعر توريد حذاء نايك الشهير (سعر كوتشى "نايكى" كان اتنين دولار وسعر الحذاء الغير قابل للعرق كان أربعة ونص دولار فى الوقت ده) ولأنهم بيدوا العامل أكتر ب30% من دخل أى عامل اندونيسى قدروا يوردوا الحذاء الغير قابل للعرق وبكده انعكس اهتمامهم بموظفينهم على أرباحهم ولأنهم نجحوا فى تكوين صورة ذهنية من خلال اهتمامهم بالعامل البشرى المتمثل فى تحفيز موظفينهم .

الخلاصة لو عايز تهتم بالعملاء والمنتج إهتم بالموظفين وهما هيهتموا بالعملاء والمنتج