تبقى الأول ولا التاني ؟؟؟؟

فيه مصطلح في البيزنس اسمه الباديء بالبيزنس ( First Mover ) والتابع ليه ( Second Follower ) وده بإختصار معناه إن فيه واحد بتجيله فكرة فبيحولها لبيزنس وتبقى الفكرة جديدة وممتازة ويبذل مجهود كبير علشان يعرف الناس بالفكره دي لحد ما السوق يستوعبها وتبقى فكرة موجودة وليها سوق وبعد كده يبدأ حد تاني يدخل السوق على الجاهز وكل مجهوده بيوجهه فقط لتعريف الناس بنفسه وبخدماته ويبدأ يشتغل علي شغل اللي قبله .

صاحب الفكرة الجديدة وأول واحد اشتغل عليها هو الأول وده ال ( First Mover ) وده أكتر واحد بيخاطر لأن ممكن أصلاً الناس متتقبلش الفكرة إنما التابع أو ال ( Second Follower ) بيدخل السوق على الجاهز ومبيدخلش الفكرة غير لما يبقى فيه سوق وفيه عميل جاهز عن طريق صاحب الفكرة الأول .

- ميزة ال ( First Mover ) هو إن الناس بتبقى دايماً فاكرة أول واحد عمل حاجة معينة وبيظل في ذاكرة الناس فترة طويلة إن ده الرائد وصاحب اليد الأولى وكانوا زمان بيقولوا ( الإيد السابقة غالبة ) بس طبعاً ده مش في كل الحالات لأن فيه مميزات كتير للي بيدخل السوق متأخر وهي إنه ما بيخاطرش بإن الفكرة نفسها تترفض وعنده ميزة مهمة إنه بيتجنب العيوب والمشاكل اللي بيقع فيها الأول وكمان ممكن يكون الأول اللي هو صاحب الفكرة فلوسه خلصت علي تعليم الناس وتثقيفهم ونشر الفكرة إنما التاني أحياناً كتير بيدخل برأس مال كبير وكمان رأس ماله موجه فقط لنشر اسمه هو وإصلاح أي عيوب ممكن تكون موجوده عند الأول ....

الموضوع ده هاتلاقيه من أول ( إتصالات ) اللي دخلت بعد ما ( موبينيل ) علمت الناس إستخدام الموبيل بالكارت وده كانت حاجة غريبة وقتها وموبينيل صرفت على نشر الفكرة كتير لحد عربية الفول اللي علي ناصية الشارع اللي كان صاحبها بيعامل الناس وحش جداً والفول بتاعه مش قد كده وبعد شوية ظهر شاب على بعد 100 م تعامله جميل وأكله حلو فالناس كلها راحت للتاني .....

المهم إن موبينيل كسبت كويس قبل ما اتصالات تبدأ إنما فيه أفكار كتير أصحابها بذلوا مجهود كبير علشان يوصّلوا أفكارهم الإبتكارية للناس وأول ما وصلت حد تاني فتح بشكل أحسن وبرأس مال أكبر وأخد كل السوق .

علشان كده دايماً بقول إنك ما تبدأش فكرة إلا لما تكون قادر على إكمالها والإستفادة منها مادياً كويس وتكمل فيها للآخر وإلا هتكون بتجهز الطريق لواحد تاني هييجي ياخد السوق على الجاهز ويسيبك بحسرتك