تجربتي مع البنك ... "الضمانات"

طبعاً كلنا أو معظمنا لما ييجي يفكر في مشروع جديد أول حاجة بيفكر فيها هي البنك بس بعيداً عن الجانب الديني اللي إحنا مش هنتكلم عنه لأنه خارج تخصصنا في عندنا شوية عوائق في مصر بتخلينا ننصح أصحاب المشاريع الصغيرة والمتوسطة إنها تبعد تماماً عن البنوك في التمويل وهنتكلم النهاردة بس عن نقطة الضمانات ...

مبدئياً نحب نوضح إن القطاع الخاص فى مصر إعتماده على القروض البنكية ضعيف بالنسبة لباقي العالم يعني بنتكلم في 700 مليار ج من أصل إقتصاد 2800 مليار ج يعني بنتكلم في 40% بعكس دولة زي أمريكا بنتكلم فوق ال 100% والصين اللي بتوصل حجم التمويل البنكي ل 200% من حجم الإقتصاد الصيني بينما البنوك المصرية مقرضة للحكومة 900 مليار جنيه .

كان فيه رجل أعمال كان بيتكلم مع مدير ائتمان في بنك في وجودى فكان بيقوله إن البنوك في مصر بتسعي لسجن صاحب الشركه الصغيرة والمتوسطة ولما حاولت أفهم منه هو يقصد إيه قاللى شوف فرق الضمانات اللي هيطلبوها منك والضمانات اللى أنا هشترطها عليهم وده فرق كبير إن البنوك بتبقي شايفه الشركات الكبيرة أو رجل الأعمال الكبير ضمانة في حد ذاته إنما الشركه الصغيرة أو المتوسطة فلازم صاحبها يقدم ضمانات كتير تفوق قيمة القرض بكتير جداً .

البنك مش بس بيحتاج ضمانات كبيرة لكن كمان بيحتاج شيكات بنكية من صاحب الشركة المتوسطة أو الصغيرة بقيمة القرض بالإضافة للفوائد وده معناه إن لو لاقدر الله المشروع فشل يبقى صاحب المشروع مش بس هيخسر مشروعه لكن كمان هيتسجن وده ضغط عصبي رهيب.

كل اللي فات ده كوم واللي جاي بقي كوم تاني واللي هو إن البنك كمان بيطلب ضامن يمضي على القرض وعلى شيكات بنكية وده بقى معناه إن أبوك أو أمك أو مراتك أو أخوك أو أختك هيبقوا كمان معرضين للسجن في حالة عدم سداد القرض وده بقى حمل نفسي أكبر من أي حاجة تانية .

في النهاية الضغط النفسي الناتج عن كل الضمانات دي والناتج عن التهديد المستمر بتخللي أي صاحب مشروع بياخد قرارات غلط بتؤدي إن المشروع يفشل والبنك بيتحول من عامل مساعد لعامل تهديد مع باقى العوامل زى تقلب السوق والمنافسة ..... الخ .

الضمانات دى عامل من العوامل هنتكلم بعد كده عن باقي العوامل اللي بتخلينا ننصح أصحاب المشروعات في مصر بالتوجه بعيداً عن البنك