تصوير المنتجات الحل الأمثل لزيادة المبيعات!

لو كانت الصورة تساوي ألف كلمة، فصورة المنتج الجذابة هتساوي زيارات لموقعك ومبيعات لمنتجك.

يومياً بنشوف منتجات مختلفة أونلاين وأكتر حاجة بتجذبنا هي"صورة المنتج" كل ما كانت صورة المنتج جذابة بتأثر علينا في قرار الشراء والعكس الصور السيئة أو الغير واضحة بتخلينا نحكم على المنتج إنه مش كويس وبنرفض نشتريه على الرغم ان وارد جداً يكون المنتج جيد لكن طريقة تصوير الصورة وعرضها كانت السبب فى تجاهل المنتج وده بيوضحلنا إن صورة المنتج هي اللي بتتحكم في عملية شراء العملاء سواء بالرفض أو القبول!

دي بعض النصائح إللي هتساعدك في تصوير المنتجات بشكل إحترافى رغم عدم وجود إمكانيات كبيرة.

1- استخدم كاميرا موبايلك.

مش شرط إنك تستخدم كاميرا بروفيشنال وبمواصفات عالية، ممكن تستخدم كاميرا يكون تصويرها إلى حد ما كويسة وصورها نقية مع إستخدام بعض الـ options الإضافية أثناء التصوير وده هيحسن اللقطات الخاصة.

2- إستبدل الـ كروما بورق حائط.

غالباً بيحتاج المصورين لـ كروما لمساعدتهم في التصوير لإنهم بيستخدموها كخلفية لصور المنتجات، ومن أحسن ألوان الخلفيات هي اللون الأبيض ولإن الـ كروما بتكون تكلفتها عالية إلى حد ما فمن الممكن ان يتم استبدالها بورق حائط متوسط التكلفة.

3-حامل الكاميرا Tripod.

ضروري جداً إنك تستخدم حامل للكاميرا علشان تقدر تتحكم في الصورة كويس وماتطلعش مهزوزة، و مش شرط تستخدم حامل للكاميرا من الأنواع الغالية تقدر تستخدم الحوامل الخاصة بالموبيلات.

4- اختيار المكان المناسب للتصوير.

مكان تصوير المنتج ليه عامل في إن الصورة تطلع بشكل كويس أو لأ، يفضل إن يكون المكان واسع و يكون فيه مصدر للضوء زي مثلاً " نافذة " أو يتم التصوير في مكان مفتوح، لإن كل ما كان في ضوء كويس في المكان ده هيأثر على وضوح الصورة وهاتظهر بشكل كويس.

5- استخدم شريط لاصق لتثبيت ورق الحائط.

مهم جداً إن يكون الورق الحائط إللي بتسخدمه يكون متثبت بشكل كويس لإن عدم تثبيته هيأثر على شكل المنتج في التصوير وهايظهر في الصور، تقدر تثبته بـ شريط لاصق أو مشابك بحيث يتم تثبيت الخلفية بشكل مظبوط.