تعويم الذهب والدولار والجنية - ج4

اتكلمنا قبل كده عن مميزات تخفيض الجنيه أمام الدولار وايه هو أثره على إقتصادنا وبشكر كل اللى قام بالتعليق أو شارك على الموضوع وبعذر كل اللى اختلف لأن طبعاً الثقافة الإقتصادية قليلة جداً عند معظمنا وحابب أتكلم على أكتر من نقطة ....

أولاً : إحنا لما بنتكلم فى تخفيض الجنيه بنتكلم من جهة رد الفعل لأصحاب المشاريع اللى هو هدف الصفحة ومساعدتهم على إدراك وفهم البيئة الإقتصادية بشكل عام والمصرية بشكل خاص مش بنتكلم كمتخذ قرار لأننا أكيد إحنا أو الناس اللى بتعلق على الموضوع لسنا جميعاً أصحاب قرار

ثانياً مدرك تمام إن منظومة التعليم المصرى القائمة على التلقين بتخلى أى فكرة بتطرح ضد ما هو ثابت بالنسبة لك تعتبر جريمة غير قابلة للنقاش لأن التعليم المصرى قائم على نموذج الإجابة المُعد مسبقاً وليس النقاش والتحاور ... وبرضه مُدرك تماماً إننا وصلنا لمستوى تربوى متدنى تخلى ناس المفروض إنها محترمة تشتم لمجرد طرح رأى علمى إقتصادى ضد ما هى مقتنعة بيه

ثالثاً كل اللى يهمنا هو إن أصحاب المشاريع أو الناس اللى بتعمل بيزنس تاخد بالها من مشاريعها وتعرف ايه اللى هيحصل الفترة اللى جاية وهو ببساطة لو انت بتصنع منتجك هيغلي محلياً وهيرخص خارجياً حتى لو بيدخله مواد مستوردة وده فرصة ليك إنك تفتح أسواق خارجية جديدة سواء فى الخليج أو أوروربا وأمريكا ...... ولو انت بتستورد لازم تخللى بالك إن سعر المنتج اللى انت بتستورده هيزيد وهيبقى أغلى من المنتج المحلى المنافس ليه وده هيخليك إما تتنازل عن جزء من هامش ربحك أو تتدور على منتجات أرخص أو توقف إستيراد فترة معينة ..... المهم إنك تفهم إيه اللي هيحصل وتستفيد منه

رابعاً موضوع على الهامش ..... الناس فاهمة كلمة تخفيض الجنيه غلط هى الحكومة مش هتخفضه إنما بتتخلى تدريجياً عن دعمه وده نتيجة إنها مش قادرة تدعمه ... زى أب مثلاً بيصرف على إبنه فترة طويلة على أمل إنه يعتمد على نفسه لحد ما بقى مش قادر فبيبدأ يتخلى عن الدعم ده .... وبرضه قيمة الجنيه الحقيقية مش إن الحكومة تدعمه المفروض إن عملة أى دولة معبرة عن الإقتصاد يعنى لو الإقتصاد قوى العملة بتبقى قوية والإقتصاد لو ضعيف العمله بتضعف ..

خامساً الصين لما لقيت إن عندها تباطؤ إقتصادى خفضت عملتها لأن ده إسمه علم .... ألف باء إقتصاد لما تبقى عندك الواردات أكبر من الصادرات تلجأ لتخفيض العملة علشان منتجاتك ترخص أمام السوق العالمى فيبقى عندك فرصة للمنافسة والواردات تغلى فالناس تلجأ للبديل المحلى بدلاً من المستورد لكن طبعاً معظم اللى علقوا على البوست الأول لم يدرسوا إقتصاد علشان كده إحنا بنحاول نوصلهم المعلومة كعلم ..

فى النهاية بأكد علي هدفنا إحنا مش أصحاب قرار وبنتعامل مع الحقائق الإقتصادية بما يتناسب مع صاحب المشروع أو البيزنس اللى بيحاول يكون رد فعل مناسب لقرارات إقتصادية فى البيئة اللى هو بيشتغل فيها ورد فعله ده ملوش علاقه باقتناعه من عدمه  ....

وربنا يوفق كل اللى بيدور على معلومة علشان يستفيد منها ويشتغل عليها ويبقى شخص عملى ..